|
||||||
|
今日係利物浦足 球會嘅大日子，如果到咗今日賣盤不成，無力償還RBS（蘇皇銀行）二億八千萬鎊嘅話，就可能由信貸管理人接管，跟住球隊在英超聯嘅分數要罰扣九分之多。利 物浦打咗七場，只得六分，排在第十八位「降級三人組」內，若果扣足九分，變成負三分，咁就好難捱，成季都要打護級戰，由Big 4豪門變成降班「穩膽」，羞家咯。今天還記得阿倫漢森、桑尼斯、基謹、魯殊、比亞士尼、湯遜、杜格列殊、班尼斯等等球星年代嘅球迷，無不唏噓，希望今日之 前，利物浦有新東家啦，買家（波士頓紅襪隊班主嘅公司）畢竟出價三億鎊，已足夠還債有餘。一位星加坡富豪Peter Lim （林榮福）又話出三億二千萬鎊，不知鹿死誰手。 上星期參加一個會議，開會前碰到利物浦大學校友、利物浦擁躉教授C，與佢講起利物浦，佢就非 常勞氣，認為Gillet與Hicks（現時班主）應該滾蛋，另外佢認為利物浦今季戰績差，與教練鶴臣不無關係，佢認為最近十餘載，鶴臣教慣中型班，以穩 守突擊戰術為主，亦少應付大球星，到利物浦需要一段融合時間，但對於為債所困嘅利物浦，今日只爭朝夕，時間係奢侈品，況且如今奪標無望，只求不降班，不如 就趁曼城有意之際，在明年一月賣走托利斯，攞番四五千萬鎊，然後重建球隊。 教授C之言，不無道理，但如何重建呢？不妨向歐洲學習，德國用新 人為主，在南非世界盃表現出色，德國雄師拜仁慕尼黑失咗年青小將之後，到目前為止，俾後起之秀緬因斯搶晒鋒頭，而緬因斯嘅主將只是二十出頭嘅年輕人；西班 牙方面，傳統班霸皇馬與巴塞隆拿暫時俾賣咗兩名大牌球星嘅華倫西亞比下去，當初冇咗大衞韋拿與大衞施華，加上負債纍纍，華倫西亞諗住前景黯淡，點知馬死落 地行，逼住重用後生兵團之後，戰績十分出色，呢兩隊足以為利物浦借鏡！賣走老牌球星，打現代足球，十上十落，攻門就盡量向前，防守就全軍退守，前鋒變後 衞，勝過托利斯在前場行行企企，唔多識回防。鶴臣是否可以將利物浦變成新華倫西亞呢？如果唔得，不如搵奇連士文做教練，起碼美國佬識得呢位德國球星先。 |
||||||