|
||||||
|
搞咗差唔多兩個 月既國美「陳黃對決」前日終於有賽果，曾經當選今年世界最具影響力囚犯之一嘅黃光裕，今次隔空發功迫宮失敗，罷免唔到主席陳曉（圖），又委任唔到親信入 局，淨係阻止到國美響嚟緊呢一年唔可以發新股攤薄佢嗰份，真係贏唔到粒糖兼輸埋間廠！咁呢啲爭權奪位嘅嘢最後梗係有人歡喜有人愁啦，正當黃光裕係獄中黯然 神傷嘅時候，保得住個位嘅陳曉，梗係即時去風騷快活！聞說陳曉為首嘅一班「國美人」一知道win咗，「詐詐淋」開埋個董事會就拖行馬殺落金鐘北京樓慶功。 據有份在場暢飲嘅老友透露，當晚成班「國美人」好似總裁王俊洲、執董孫一丁、總裁助理高群，同埋貝恩嘅代表等等，全部飲到貓晒，有啲仲要人抬番上酒店房， 有人就飲到唔識番屋企，更勁嘅係，成班友仲要hyper到現場大合唱公司係今年初推出嘅主題曲「國美之歌」！ 呢首歌唔係講笑，一聽真係成個人醒晒，再嗒真啲歌詞，真係有理由懷疑陳曉早有預謀同黃光裕反枱架！（有興趣不妨上網search嚟睇睇） 股東會開就開完，但好多人都覺得呢單嘢仲有手尾，大部份券商噚日都率先唱衰話「未解決」，黃光裕隨時可以再玩嘢，370幾間非上市門店可能要分家，對上市公司點都有影響。 李華華 |
||||||