2010-9-17 AD
|
||||||
|
名校女生Ｃ中五 畢業，成績相當唔錯，只有一科中文攞Ｄ，其他八科都係Ｂ。就因為咁，佢就要到外國升學，如無意外，十二月起行，依家唔駛返學，有乜好做？一間補習學校請咗 佢做散工，時薪四十元，高出「最低工資」好多（據講係廿八元），每日返四小時，一星期五日，呢份散工做乜o架？據講係同小學生對功課，具體內容就係好忙嘅 家長送子女到補習學校，幫子女溫習功課，學生在補習社內做功課，做完就由女生Ｃ指導，保證做足、做齊之後就可以放學生回家。 香港家長咁捨得 畀子女到「補習學校」，連輔導子女做功課都交由補習社執行，唔怪得最近有一個調查顯示（明愛青年義工小組調查），八成半受訪學生曾經補習，其中約七成目前 正參加補習班，每人每月平均開支約一千元，伸算之下，全港四十七萬名中學生計（其實根據香港年鑑資料，○三○四年有四十六萬八千八百名中學生，○八○九年 已下降至三十六萬九千，比明愛數字少咗十萬人），總補習費每月三億元，係一個好龐大嘅數字，唔怪得香港盛產補習天王，專買豪宅。 每月一千， 每學年隨時用夠一萬至一萬二千元補習費，加埋每個月校巴費用又係幾百，香港學生最大嘅開支就係補習與校巴。相形之下，一年開學，買新書用幾多錢？九月十五 日出版嘅《選擇》月刊（消費者委員會出版）指出，今年中學平均購書開支為2,016元，以一個學年等於十個月計，每月用201.6元，同比上升6.9%， 即係等於一個月補習費嘅五分之一。有時好唔明白，香港家長每月咁捨得一千蚊補習費，四至五百蚊校巴費，點解消費者委員會每年例牌嘈一次── 書費太貴？你估教科書作者寫一本書嘅代價一定要平過補習費好多嘅咩，唔通人腦資本唔值錢，捉題目吹水就貴過六安士白銀？究其實，清貧家長可申領書簿津貼， 中產家長碌咭買書嘅話，一啲書局提供免息分期，最重要嘅係政府發放書簿津貼要在九月後，學生買書在八月，中間有時差（time difference），如果政府提前一個月發放，問題也就解決了，消委會不如每年調查吓補習費、校巴費，對家長更有貢獻得多。 |
||||||