|
最近，港島南區赫蘭道二號獨立屋招標，叫價逾十五億元，此大宅逾六十年歷史，最初由美資AIG旗下 的American Life Insurance Company持有，於一九五五年以$15.7萬售予潮州鐘錶商人莊立頓（Lipton），並以其太太鍾賽玉（Florence）持有，兩年前，貴為太平 紳士的莊老太辭世，後人遂把古董大宅出售，繼而揭開一則悲情故事。 莊老太的長子莊澤基娶了花旗女子Marilyn Dreesman為妻，育有兩子一女，莊澤基不幸於八四年英年早逝，妻子帶年幼子女於夏威夷定居；八七年Marilyn趁聖誕假期與子女返到家鄉Iowa 探望雙親，十二月三十日當一家人準備坐低食午飯，Marilyn弟弟Robert Dreesman突然拿起手槍「隊冧」老豆、老母、家姐及三名孩子後，再吞槍自殺，這宗謀殺案當年成為大新聞；警方後來估計兇手有精神病記錄，因「眼紅」 父母對姐姐及其子女寵愛有加而動殺機，這幢古董豪宅都算與花旗國交織出一個傳奇故事。 金融逍遙客：拆「天香樓」招牌 游走於中港台併購、私募投資的金融多棲動物，現為多間上市公司主要股東及董事 講飲講食，逍遙客可能比不上樓上嘅楊公子嘴刁，但也算是個業餘老饕，後生時已視蔡瀾為偶像。風流倜儻的他主持電視節目《活色生香》，介紹聲色犬馬去處，更 有一版又一版世界各地餐廳介紹。仍未知巴黎是何物的時候，已看到他介紹的巴黎美心餐廳，對其瀟灑生活羨慕到無以復加。另一偶像就是肥佬黎，多本著作如《我 的理想是隻糯米雞》、《事實與偏見》，更是對逍遙客做事做人至今仍有深遠影響。逍遙客不時按圖索驥，到訪兩位美食家介紹的知名餐廳。可惜結果往往差強人 意，前年在巴黎特往肥佬黎推崇備至的Chez L'ami jean，呢間貌不起眼的小店，每樣食物都鹹到甩肺，味道也平平無奇。逍遙客對越南粉有偏好，在墨爾本又特登吹雞十幾人、坐成個鐘頭車去試蔡瀾吹噓到天上 有地下無的勇記，湯無骨味，肉無鮮味，粉無彈性，食完兩啖，逍遙客已不停向友人「耍冧」。希望愈大、失望愈大，看來適用於大部分場景。最近有強國朋友想試 間較為特色的中餐廳，逍遙客就諗起兩位偶像常提的天下第一杭州菜「天香樓」。十多年未去過，呢間餐廳從擺設、枱布至菜式，真是五十年不變。名菜馬蘭頭及貴 到有點肉赤的蟹粉麵，看到賣相胃口已減一半，席間經那條可能已二十年未清洗過的小巷仔進洗手間，看見大門趟開的廚房，探頭一望那六十年代大牌檔的廚具及好 似賭輸馬模樣的落泊廚師，逍遙客僅餘的食慾都冇埋。尊重保留傳統在當今香港真是難得，但要視乎保留的是一個什麼樣的傳統，例如「貓屎坑」可能是千年來中國 最具特色的廁所傳統，呢種傳統不保留也罷。一間連對衞生觀感也不重視的餐廳，如何去尊重客戶的味蕾？逍遙客偶爾幫襯美心大家樂早餐，看着戴了透明囗罩的員 工及乾淨整齊的食物與餐具，食物即使平平無奇，但至少有一份被尊重的感覺。與時並進，看來任何行業都有需要。 中環寸嘴：去好酒好蔡食「未知數」 工廈大王楊耀松長子，是各大有名食肆之VIP，喜歡研究城中有錢佬對食之要求，透過美酒佳餚，察看人生百態，讓讀者「嗒」落有味。 呢排林建岳由廣州引入「好酒好蔡」爆紅，啲食評專欄寫到好神化咁，即管去睇吓乜料，位置喺番岳少以前嘅Ritz Carlton，家陣叫建設銀行大廈五樓；標榜蔡師傅每日精挑最時令食材，菜式視乎師傅當日買到咩餸。嗱！我同大家講去得呢度食，要對自己好有自信先入得 嚟，因為收費如何完全係「未知數」而唔係「味之素」呀！除咗wine list有價外，個餐牌係冇價錢嘅，如果閣下嗰日發覺自己股票贏咗錢，多到唔知點使，咪去食個lunch囉！仲有溫馨提示，睇完個menu，要諗定三點三 去邊度飲下午茶，有食評家寫個「服」字俾佢，計我話，服咗佢咁癲呀！呢度啲侍應都係熟口熟面，以前Grand Hyatt班友仔，個set lunch每碟菜都十分精緻，有啲「廟細燈籠大」啫，配菜伴碟欠奉，最欣賞有碟秘製「柑桔油」，話係師傅喺潮州訂過來再自己「執」過，來蘸吓嗰件脆皮豬手 就冇咁漏。驚唔飽臨時加咗「欖油牛肉」同埋「脆皮婆參」，嘩，每碟慢慢上，一點食到兩點半都未食完，趕住三點開會，拿拿臨「扒」埋碗海參撈飯鬆人。呢度嘅 裝修有正宗法國餐廳情調，估唔到效率都好似食法國菜咁，預番三粒鐘去食先好。 上海仔包攬街外泊車 「上海仔」喺半島歎茶遇襲，隨即有「門生」趕到酒店護主，原來全港、九星級酒店「街外」泊車服務，都係由上海仔門生包攬，遇上擺酒或大型宴會，酒店車位有限，惟有泊街；泊街又唔想食牛肉乾，梗要外判予「專業」人士代勞嘅。 本週圖片 東華慈善嘉年華在啟德機場跑道舉行，其中最搶眼係「英國皇家絕技團」，帳幕外英國旗幟飄揚，大有機場回歸英國之勢。 | ||||