ZKIZ Archives


Donald Trump做總統 純官腳軟


2015-12-24  NM



共和黨總統參選人Donald Trump,言論出位,呢位紐約寸嘴同香港啲富豪都甚有淵源,如果佢當選美國總統,新世界嘅鄭家純可能最腳軟。

牙擦擦嘅Donald Trump都有過坎坷嘅日子,九十年代初美國地產市道低迷,Donald Trump缺水,於是引入鄭裕彤、羅康瑞、邱達昌及梁昌家族等,入股紐約火車站附近一幅地合共七成股份,後發展為River South住宅。呢單交易由純官與Donald Trump交手,後來市況轉好,以純官為首嘅香港財團遂把股份出售予基金獲利,點知Donald Trump入稟法院控告他們「賤賣」資產,雖然最終敗訴,純官與Donald Trump從此反面冇偈傾;鄭氏家族的私人錢包周大福,有唔少地產、酒店及物業投資喺美利堅,如果Donald Trump當選總統,睇嚟純官又要好似上次CY當選咁,撲上台去做人肉布景板囉!

金融逍遙客:呃咗「金融精英」肥佬張

游走於中港台併購、私募投資的金融多棲動物,現為多間上市公司主要股東及董事

經常留意香港政壇新聞,奇人奇事真係一單接一單。建制派出咗個搞笑版樹根議員,為市民茶餘飯後提供不少話題,最近又有金融界代表肥佬張大議員,被電話騙徒呃咗幾萬大元。嗚呼哀哉!逍遙客睇完真係要對天長嘆三聲,香港金融界從業人員何等命苦,竟然搵到個咁易被呃嘅「金融精英」代表我哋。冒認某人的電話騙案喺《警訊》都做咗十幾廿年,相信唔係聾嘅人都會聽過。牛頭角順嫂都唔易再被呃,居然代表我哋決定大事嘅尊貴議員會上當,能力如此,真係令人無言可對。那邊廂嘅民主派,都係五十步笑一百步,貌似不食人間煙火嘅高尚議員將捐俾政黨嘅錢擺喺自己戶口,直至傳媒曝光先交出,對公眾嘅唯一解釋是:可以處理得好啲。立法會調查委員會民主派人士竟可視若無睹,幫親唔幫理,咁寬己嚴人嘅行為何以服眾?如果公司一張大額支票唔小心入錯我戶口,數月後老闆發覺,我先急急腳交番出嚟,唔知老闆會唔會覺得我無據為己有嘅意圖呢?其實三軍未動糧草先行,現代社會做事從政,中外皆是,真係no money no talk。選舉時印張海報,派個飯盒俾義工都要錢。離不開錢嘅政客,又偏偏要將自己擺喺道德高地,咁矛盾嘅行為點會唔搞到自己醜態百出!正如久唔久就會見到神父搞幼童嘅新聞,但就好少聽話幫襯砵蘭街嘅麻甩佬,會做啲咁反胃嘅嘢。逍遙客接觸嘅五湖四海中人,愈道貌岸然、唔承認自己有七情六慾嘅,愈是虛偽。香港政壇欠嘅唔係有才之士,欠嘅係一啲「真」嘅人!

中環寸嘴:通縮殺到滾水淥豬腸呀!

工廈大王楊耀松長子,是各大有名食肆之VIP,喜歡研究城中有錢佬對食之要求,透過美酒佳餚,察看人生百態,讓讀者「嗒」落有味。

上個禮拜幫襯港福(港島福臨門)買冬菇瑤柱過節,太子爺肥仔徐見到我就撲埋嚟捉鬼住我,感激流涕咁滯,邊有人好似我咁,鬧住嚟幫襯o架。唉,呢啲時勢生意難做呀,富豪飯堂都要整個boutique賣吓乾貨增加收入;油價跌到三十蚊美金一桶,大家準備捱通縮,嗱,乜嘢叫通縮呢,我同你哋講,搵啲滾水淥豬腸,睇吓條豬腸縮咗幾多就知啦。週六認真頻撲,一早收到個老友call,叫我入沙田馬場睇佢隻馬出賽,撞啱東華三院一百四十五周年盃,班東華董事局成員撲晒去馬場威威,又咁啱東華旗下嘅文武廟兩點半有「文昌啟智禮」,咁我咪幫吓手戥腳主持儀式,我講嘢有台型,落場冇詐型嘅,著埋套老西企足成粒鐘,揸緊時間,去舊警察宿舍嘅元創方搵食,試咗間「料理農務」,三個字——「呃鬼佬」囉,餐牌有杯由嘉道理農場種嘅綠茶配雞蛋花沖調嘅飲品,點知侍應話非時令,冇貨,OK呢啲夏季先有,冇位俾我入,改飲Honey Black Berry啦。

周凱旋「萬一」有道理

誠哥在九月至十月期間被大陸媒體狂插他走資,咁插法,背脊梗係痛啦,周凱旋近日爆出誠哥當時受腰椎管狹窄困擾,背脊痛到要飛到美國做手術。吊詭的是,周小姐說:「如果有什麼事,有什麼萬一……」呢個「萬一」唔係冇可能o架,小宗請教過醫生,誠哥因打「哥乎」經常旋轉條腰,而且通常向同一個方位轉,導致腰椎管收窄,但在腰椎動手術萬一失手的話,可以引致半身不遂甚至癱瘓,周小姐的「萬一」不無道理。

聖誕日審判日

澳門回歸十六周年,竟然被黑沙環爛尾樓「海一居」抗爭搶晒鏡,發展商保利達集團老闆兼九建(34)主席柯為湘有「澳門李嘉誠」之稱,在澳葡甚至何厚鏵時代做生意都如魚得水,涉事嘅地皮九十年代獲政府批出興建紡織城,不過最賺錢嘅係賣quota,柯為湘單是每年獲批美國的配額,年年有過千萬收入,後來向政府申請把紡織城改變土地用途,○六年獲得當時運輸工務司司長歐文龍批准興建住宅,補地價只需九億元,不過去年澳門頒布新土地法,政府有權收回未能於指定日期發展之土地,而呢塊地嘅死線係「聖誕節」當日,保利達能否向澳門政府申請延期發展意義重大;成功的話,咁華置面臨被政府收回土地的澳門御海•南灣地皮,係咪都有得傾呢?
 
文章編號: 201512241120117     


PermaLink: https://articles.zkiz.com/?id=178777

Next Page

ZKIZ Archives @ 2019