為撐樓市，有分析開歪理出盡, 唔加息, 有需求、供應很快現缺口之外, 今日花旗連貸存比率一招都出埋。
花旗邏輯是, 人民幣越弱, 港元存款多, 同一時間貸款需求減少, 貸存比率下降, 意味存款冇出路, 繼而令坐擁大量資金銀行, 因為想投入有回報「生息業務」, 導致按揭貸款定價能力進一步削弱，按息只會持續喺低水平。
花旗分析咁曲折、為的是要引證按息, 唔會因為美國加息而上升, 但將剔除中間涉及的一系列曲折關係, 淨係睇引言同結論, 即係話, 人民幣越貶值, 按揭利率越會處於低水平, 真係咁？
中環人反駁，銀行越水浸，不代表銀行越願意低息貸款, 因為關鍵要睇金融機構本身風險管理, 同當時貸款政策處於擴張、抑或收緊﹖
更重要係, 如果本港大量流動性之中，部份是受人民幣升值吸引而來, 人仔越貶，資金唔單只唔再流入, 更可能加快外流。
美國加息，畀八十八樓高層幾個難題:
一，零八年起流入的過萬億資金，走與不走？何時才走？及外流數目？
二，美元因為加息而持續強勢，直接做成港元亦強，同香港經濟完全唔配合
三， 相比美國，本港經濟基調及槓桿水平，更不適宜加息，但不加息，變相要港元繼續強，拖累經濟。
交銀國際嘅洪灝, 有一個觀點幾有見地, 就係港股比內地更衰, 祖國至少可以用貨幣調節、香港就要假手於人, 只係可以調整資產市場, 如果股市是前瞻指標的話, 港股已經衰咗咁耐，今日股市，是否明日樓市及經濟？
老實，聯儲局緩步有序加息, 同出四次加息預測，談不上鴿。
八十八樓高層, 由上任當日，到第二任期，開口埋口都呼籲市民關注美國加息風險, 薪酬遠比耶媽高嘅佢, 七年來, 又有冇為美國加息, 過萬億熱錢可能流走做過準備？
所謂半厘息差走資論，十年美債比同期外匯基金債券已見半厘，美國三個月拆息亦已較本港高約20點子，陳細，醒來吧!!