📖 ZKIZ Archives

老點聖手

「先掃起二三線股，營造旺市氣氛，引散戶跟風，再藉機大手沽空期指出，跟住反手狂質細價股製造恐慌，拖冧大市，咁咪兩邊大賺囉……」，以上是電視劇《點金聖手》的劇情。

如果《西遊記》屬世紀級「膠」劇，那《點金》絕對有得比。只不過，此膠不同彼膠。西遊記的膠，是令人有熄機衝動，看不下去的那種膠。而《點金》的膠，則是劇情亂咁炒埋一碟，胡鬧堆砌得令人發笑，想繼續睇吓仲有幾膠的那種膠.

莊家和大戶的故事，大家聽得多。他們身份神秘，一般被傳媒定性為股市的長期贏家。不論在牛市、態市，甚或上落市（意即任何情況），這幫大鱷都在贏，至少大眾是這樣認為。假若實情真的如此，他們應老早贏得整個宇宙。大眾對這羣長勝將軍好像很熟悉，但又很陌生。每日同他們搏鬥，但又不清楚其真面目。到底他們怎樣 操作？怎樣賺錢？是否真的如大家所想一樣存在？

邊沽貨邊買贏大錢？

我覺得莊家同大戶就有如澳門賭場的VIP生意，又或者內地官場的關係圖一樣，對於局外人來說，永遠是一個說不清的謎。就是正正因為這種神秘，給人無限想像空間，坊間才會出現無數似是而非的炒神傳說。

例如，股市近年興起一個市場術語，叫「托沽」。意指大戶一邊托住大市，又一邊沽貨。至於怎樣可以一邊買，一邊賣，最後還能贏大錢，我就一直無法參透，雖則大家好似聽得明白，覺得是理所當然。

近日恰巧讀到幾位股壇人士的自白，分別指全職炒股道路並不好行。如果舞高弄低話咁易，有點頭腦夠勇猛就可炒出彩虹，滿街都是聖手。或者畢非德及索羅斯都未有想過，自己的成功為社會所帶來的負作用，就是吸引大量人才爭相仿效，結果惹來一幫聰明仔日日互相廝殺，浪費資源。如果把這些心力全用到解決人類正面對的難題，世界將會更美好。

話說回來，最驚嚇的劇情，當是數到聖手卓彧竟在大談頁岩氣概念。連師奶劇都拿來做題材，嚇得我把倉底那隻頁岩氣股急急沽出！

PermaLink: https://articles.zkiz.com/?id=177065
Next Page
ZKIZ Archives @ 2019