ZKIZ Archives


李光耀有剩餘價值


 

2015-12-10  NM

新加坡國父李光耀於今年三月中逝世,佢其中一個遺願,係要拆除其位於歐思禮路(Oxley Road)三十八號嘅故居。該處係新加坡星級地段,以往周邊大廈都不能起得太高,以保護國父私隱。李光耀時刻想拆屋,足見佢想國家向前發展嘅胸襟。(嗰啲 屋企僭得就僭、收五千萬顧問費嘅行政長官,拍馬跟唔上!)

間屋等到李光耀個女李瑋玲搬走就拆得;未拆之前,佢個仔、總理李顯龍,日前就透過facebook話,將與其弟李顯揚,捐出等同父親故居市值嘅金額,予八 家慈善機構,兩兄弟各出一半錢,再之前佢哋已經捐埋屋內嘅傢俬同物件,此舉贏來不少掌聲。李光耀雖已過身,但剩餘價值仍在。近來當地不少反對派抬頭,主張 為國家帶來「改變」,不過李光耀過身帶來「同情票」,加上李顯龍派了唔少糖,結果早前大選,選民在「改變」及「穩定」之間仍揀咗後者。新加坡人民對李光耀 仍好懷念;呢種政治價值、李顯龍可以慢慢搣咯!

金融逍遙客:跟錯老闆慘到貼地

游走於中港台併購、私募投資的金融多棲動物,現為多間上市公司主要股東及董事

做老闆可能是大部分人的夢想,打工仔過着營營役役的生活,都希望有朝一日可擁有自由。其中財務自由尤為重要,創業做老闆是其中一個主要出路。很多打工仔唔 會真正體會到做老闆的難度。逍遙客認為,能做老闆與否,與學歷或能力關係不大,最主要係性格。略具賭性基因是所有老闆必備,可惜大部分打工仔,特別學歷愈 高兼又稍有能力之士,十居其九都是risk adverser,即係船頭驚鬼船尾驚賊之輩。認清自己性格,不適合做老闆勉強去做,就不如安分守己做好份工,其實也可快快樂樂。香港歷年都出咗唔少打工 皇帝,和黃霍大班算是表表者,但大前提,是如何搵到一個好老闆?一個唔好彩做咗亞視伙記,咁就慘到貼地。葉家寶的遭遇完美示範跟錯老闆的結果,實在令人欷 歔。能在長年缺水缺糧的環境下,老闆出手小家不在講,作風又古靈精怪,最近一任號稱要做香港CNN的騎呢老闆,招呼亞姐貴客就坐正主家席威威,將廣場大媽 舞蹈肉麻當創意帶到立法會門口,家寶也要一一配合。到斷糧斷水時,平時攞盡彩嘅老闆卻一直潛水,每日喺媒體上只見家寶熊貓眼獨力承擔,做到我見猶憐。可以 喺勢孤力弱又唔慌有飽飯食之下,家寶仍能盡忠職守、任勞任怨喺亞視做咗四朝元老,服侍着世上最難頂嘅老闆,逍遙客認為家寶真係岳飛再世。出唔起糧摺咗間公 司天經地義,而家任由忠臣擔起刑事責任,遇到咁嘅PK老闆真係家門不幸。做老闆做到咁冇人格,真係少見!

中環寸嘴:食魚翅當食公仔麵

工廈大王楊耀松長子,是各大有名食肆之VIP,喜歡研究城中有錢佬對食之要求,透過美酒佳餚,察看人生百態,讓讀者「嗒」落有味。

上個禮拜同大家「些牙」嗰張夾雜玄學嘅炒股「路紙」,我啲老友幾鬼驚青,猛問係咪會跌到萬四點喎!仲要喺手機度睇,將張「路紙」放大慢慢研究,真抵死。 聖誕快到,啲芬佬window-dressing完就收爐放假,啲兄弟話最實用係新同樂魚翅酒家嘅hamper,入面有樽袁家中山辣椒醬、XO醬同埋特級 蝦籽,屋企啲工人煮得唔啱胃口,用來蘸吓蘸吓,話晒有蚊錢,唔好難為自己,當係有啲新同樂味道落吓肚唔使咁灰。其實新同樂係魚翅批發起家,早年代辦墨西哥 翅,嗰度啲人唔識發魚翅,就攞返香港發,發咗之後會俾番啲個agent,所以喺L.A.食魚翅就抵啲,啲針翅好似筷子咁粗,咪當食公仔麵囉!吖!上期講錯 少少嘢,禮賓府搞公益金慈善晚宴,每道菜配一隻酒,吳志誠係贊助一道菜嘅酒,唔係全場,仲有其他善長贊助嘅,只不過吳志誠嗰支1961年嘅酒,仲有氣有 力,我覺得好有驚喜,咪興奮過頭噏錯咗!

美國網站追蹤「掙爆」

澳門賭業由盛轉衰,一眾食開大茶飯嘅賭場大哥亦冇運行。年中時,江湖猛人「掙爆」張治太,被控洗黑錢近十八億元,案件仍在審訊中,明年三月再提堂,掙爆獲 准保釋候查。不過除了香港警方,源自美國的澳門賭業獨立監察網站MacauGamingWatch.com,亦咬實掙爆唔放。佢哋追蹤到張治太及家人在中 港的物業及公司,指他涉嫌轉移資產,當中包括香港數間豪宅,市值高達二億五千萬。根據調查,張治太與妻子吳楚霞及其他張氏家人,合共持有近二十個物業。一 三年至一四年間,其中四個豪宅陸續以公司名義轉手。網站特別提到其中一個有份接貨的人,叫梅雪珍。梅氏同樣活躍於澳門賭業,經營疊碼仔業務。海王集團前主 席連棹鋒亦是其生意拍檔,而連則是張治太老友。關係千絲萬縷,小宗睇到眼花,都係交番個波俾香港警方查清楚啦!

今期又係你!

呢兩位外表普通夫婦,今期好紅。他們是港姐亞軍蔡思貝父母,早前蔡母被指與假學歷風波有關,今期本刊的「壹號頭條」報導師奶夾錢買股搞上市,在早前銷售部門搞的晚宴上,又見到兩人有份出席飯局。奉勸兩人要小心睇清楚,以免又中伏!

 



李光耀 剩餘 價值
PermaLink: https://articles.zkiz.com/?id=174550

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019