ZKIZ Archives


重新做人(5) 陸羽仁


http://blogcity.me/blog/reply_blog_express.asp?f=5YTPBH5B812303&id=257443&catID=&keyword=&searchtype=


杜指及標普500指數美股繼7月份勁升近7%8月份第一個交易日延續強勢,杜指收市跳升208點或2%10674點,標普500指數漲24點或2.2%1126點,成功突破關鍵的技術位--200天移動平均綫。

 

中國製造業指數連續多月收縮,但歐洲及美國製造業指數就好過預期。加上歐洲銀行業績大好,BNP季度純利210億歐元,比去年增長31%;匯控稅前盈利更賺多咗一倍。銀行股勁升,推動歐洲股市向上。歐洲三大股市都升超過2.3%而歐元兌美元升近1.32水平新高,亦推動大宗商品價格向上,紐約原油彈升3%至每桶81.34美元。資源股及油股造好。推住大市向上。

早幾日講杜氏理論,話美股的走勢呈強,杜指和杜瓊斯運輸指數同時向好,係傳統向好趨勢。這個近百年的理論至今睇大勢仍然有用,美股走勢果然向上,早前杜指一直在9600點和10600點這1000點左右橫行,昨日升200點後,已向上突破10600點的上行阻力位,形成一個破位向上之勢。雖然不能排除美股破位後短期有小反覆,但向上之勢已成,而家短線看淡的風險更大。

港人最關注嘅匯控走勢尤其強勁,由倫敦升到美國,倫敦收升5.3%,喺紐約亦大漲5.2%53.74美元,匯按美國預托證券市場亦比香港收高3%83.45元。中移動就較弱,收80.01元,比香港收市低0.7%ADR港比指數收報21753點,比香港收市高340點。

       

 早前網友kawaing問起止賺,佢話「陸sir: 止蝕你講得多, 也比較易掌握, 都係講紀律。可否講下止賺的藝術呀~

         止蝕唔係Kawaing講得咁易,投注愈大,愈忍唔住止蝕,但無論如何,止蝕的概念較易理解,但止賺就更抽象,首先要統一吓大家係講緊同一件事。技術上,止賺係指買入一隻股份後,隻股升咗上去,已達理想價位,但隻股仲繼續升,那時就可以定一個止賺位,止賺位可以按一個百分比定,例如比現價低10%就止賺,亦可以按一個技術位定,例如隻股回吐到對上個突破位(對上一浪的浪頂)就止賺,假設你在1元買一隻股,佢升到1.2元成為第一個小浪頂,略回吐至1.1元,又升穿1.2元這個小浪頂,形成一個再破位向上之勢,再升到1.4元,又開始回吐,你在1.4元想定個止賺位,若比1.4元低10%,就係去到1.26元就止賺沽貨離場;若睇技術位,可以定在1.19元,即係佢跌穿埋第一個小浪頂1.2元先至止賺,背後的假設係強股會保持較強走勢,所以佢應守得住第一個小浪頂的支持位,若跌穿走勢惡化要走人。  

 上一日講到網友stockinvest97年買入1隻股叫547股票(民信), 以1元入10萬股, 不足3星期便升到1.4元以上但佢無沽, 危機之後, 佢以0.68元止蝕。因為佢定30%止蝕,所以跌到買入價30%以下才止蝕,若佢定止賺位,或者在買入價止賺,事後孔明咁去講,佢就唔使輸呢32%,當然唔止蝕隻股最後仲變埋零。

        當 然,止賺有代價,止賺之後,若隻股調頭再升,升咗幾倍,升到你唔信,咁就會好痛心,為防風險,錯過咗好股。所以止賺同止蝕一樣,在大牛市中使用,感覺會好 差,你會發覺唔止賺會好好多,隻隻股跌吓又升跌吓又升,散戶式死守會贏大錢,反而止賺者可能會走寶,那時盲賭的散戶笑你太「騰雞」。當然,在08年的跌市,甚至而家的上落市中,你又會發覺定止賺位幫到你。

          所以我早前講到,你買中一隻股,有兩三成升幅,可以先沽一部份食糊,或者換個方法,將其中50%持股定位止賺,其餘50%就以買入價為止賺。假如咁好彩隻股回完就大升,你即使到位止賺咗50%,仲有50%可以食盡升幅,若唔好彩沽完50%佢再回,連其餘部份都沽埋,夾埋尚有微利。這種做法在大升市或個股大爆上時食唔盡,但另一方面可以保證點都執番少少。我有這種假設,若果真係大牛市,成街隻隻都炒,我有一半止賺沽早咗套咗現,攞筆錢炒第二隻,亦都有機會中,只要個市好,唔憂無股炒。

           總的理念是「花無白日紅」,從過住散戶炒作的結局看,好多人都「曾經風光,難逃一刧」。所以放一些防險措施,如止蝕和止賺(或高位部份套利),在大升市時的確會減少回報,但希望在跌市中能減少損傷,長炒長有也。

 

陸羽仁

PermaLink: https://articles.zkiz.com/?id=17127

Next Page

ZKIZ Archives @ 2019