2010-7-27 AD
| ||||||
| 餐廳Ｗ以前在周 刊做廣告推銷，係神童輝嘅主力手下，近年轉型做餐廳，先在駱克道，現於軒尼詩道/波斯富街經營日本家庭料理。呢日餐廳Ｗ搵咗昔年周刊老總Ｌ與財經記者Ｃ等 等上去試菜，帶挈埋左丁山。餐廳Ｗ親力親為，幾乎係兼職打雜，當今餐廳生意競爭激烈，生存不易，中小企老闆非施展渾身解數不可。我哋乘機訪問餐廳Ｗ：「最 低工資假若定於三十三元，對你有冇影響？」餐廳Ｗ話：「托賴啦，我哋叫做有啲生意，夥計數目亦唔算多，所以平時畀人工，時薪在三十元以上，最低工資如果係 三十三元，對我哋冇影響嘅，但我知道好多行家畀唔到呢個時薪，一般在二十七、二十八蚊左右啦。張建宗局長冇講錯嘅，有咗最低工資之後，一啲六十幾七十歲嘅 兼職洗碗清潔工、與有障礙嘅工人，係會解僱嘅嘞，畀三十三蚊，梗係會請個眼明手快，比較年輕兼做得嘢嘅啦，送外賣嘅老人家最受影響o忝。」 原 來餐廳Ｗ所言，與一般經濟學者嘅估計，大致相同。如雷鼎鳴教授講過，各國經濟學家對最低工資做過大量實證研究（empirical studies），已證明最低工資不會有利於年青人、老人及殘障人士，無助於推低失業率。如何民傑（西貢區議員）在《蘋果日報》評論版（七月二十日）所 講，最低工資會削弱社會上最弱的一群，呢個係客觀市場現象，不以個人立場（堅持或轉軚與否）為依歸。 飯後返到中環，地鐵站 見到旅遊Ｓ，醒起惡女珍，於是同佢開玩笑：「喂，上京推廣誠信旅遊啦，做好香港形象。」旅遊Ｓ話：「你咪咁天真啦，現實社會唔係咁美好嘅。我在內地一個大 城市行入一間旅遊社視察過，旅行社職員對一位女士講，嗱，我哋嘅香港團只收一千幾，隔籬旅行社嘅團，同樣住在××酒店，要收四千，落到去香港，主要目的都 係購物啫，參加我哋個團，慳番二千幾蚊，買多個手袋啦。位女士覺得幾有道理，於是選擇咗平價旅行團，點知道落到嚟要強逼購物兩萬幾銀至得o架。呢啲嘴頭， 日日發生，日日有羊生羊太上當，內地旅行社搵內地人笨，出事就影衰香港，冇得搞！」 | ||||||