ZKIZ Archives


空氣政治 左丁山

2010-7-19  AD





 

聞道鏞記兄弟股 東不和,於是心思思走去幫襯吓,食番件燒鵝,點知電腦J臨時甩底,研究C又話要演講,遲啲先至到,幾乎開唔成飯局。好彩研究C速速趕到,仲笑口吟吟,唔通 為咗食件燒鵝就咁開心?非也,原來研究C在賽馬煞科戲大豐收,命中混合過關三串七,全個馬季有賭本盈餘之外,仲賺晒全季馬會廂房之飲飲食食,正是又食又拎 嗰隻,馬匹對佢不薄也,不枉佢「咳」短北京行程,擒擒青趕返香港標尾會。

研究C不大明白鏞記兄弟為何不和,搞到要上法庭,點解唔搵人調解呢?所謂調解,唔係搵親戚前輩做中間人,而係真正搵mediator(調解人),唔掂傾到掂,傾到大家達成妥協為止。

正 路就係咁諗,人地有乜苦衷、怨憤,我地點會知呀。講起調解,點知食飯之後,下午行經萬年大廈周大福珠寶,就碰到調解C與佢嘅舊同事,可能係上司嘅史丹利, 在街頭傾偈。調解C得風氣之先,一早就轉型成為調解專家,曾介入香港仔某大廈賠償事件,與史丹利有乜好傾?多年不見史丹利,只見佢頭髮灰白咗,個人肥咗, 問佢最近做緊乜?諗都諗唔到,呢位昔日銀行界、珠寶界總裁級人馬,依家入咗中文大學法律學院讀JD(香港譯做法學博士)。中大JD課程好難入嘅噃,每年申 請人多到打崩頭,不過以史丹利之quali,麻省理工理學士、波士頓大學MBA、前金融界高層,係有資格入到嘅。

史丹利話做緊 project,研究「還原香港清潔空氣」,已經訪問咗不少人,包括財政司長曾俊華、余若薇、陸恭蕙等等等,各方意見紛紜,順便問吓左丁山有乜意見?左丁 山諗咗一陣,對佢講:「在香港講清潔空氣,係一個好大嘅政治問題,譬如路上咁多巴士,點解唔可以重整路線,減少巴士數目?因為區議會反對。要巴士公司淘汰 所有舊巴士,換過晒新型環保巴士得唔得?巴士公司唔制,因為加唔到價……」史丹利話:「唔俾加價,以免影響民生,無可厚非,一個方法係用納稅人公帑,津貼 番巴士公司更換新巴士……」嘩,如果係咁,又有人批評官商勾結輸送利益嘅啫。史丹利話clean air係above politics喎,各方面應該各自犧牲一啲嚟換取清新空氣……唔。



PermaLink: https://articles.zkiz.com/?id=16880

Next Page

ZKIZ Archives @ 2019