ZKIZ Archives


拜拜Larry King 左丁山

2010-7-13  AD






 

昨日講起,《蘋 果》係全港最市場導向嘅報紙,如果一個專欄冇人睇,或者係the weakest link嘅話,一定冇得留低,所以因為左丁山講妥協政治而來電郵叫左丁山「收聲喇」嘅人士,你地或者會有一日終於睇到「GiGi細語」收檔嘅。

人 無千日好,花無百日紅,此乃左丁山阿媽生前成日講嘅,記得好似係一九九三年啩,力寶中心現在賣牛扒嘅餐廳嘅地方,有一間LA Cafe,開幕初期,非常旺場,曾經邀請CNN嘅明星主持Larry King到場,主持一個酒會,吸引力極強,Cafe內有逼爆玻璃之盛,左丁山、餐廳R等等爭住排隊同Larry King影相,佢個人冇乜架子,幾好傾,講起佢嘅招牌吊帶就眉飛色舞。

呢位先生自1985年開始在CNN每晚訪問一位政客/名人/明星,至 今二十五年,卒於今年六月二十九日宣佈退休,係唔係因為年紀大咗呀?當然唔係,真正原因係收視率下跌,CNN需要變陣,需要一個新面孔與霍士及其他收費電 視台競爭。隨住Larry King退出電視,老一派嘅節目主持人風格亦隨風而逝。

現在受歡迎嘅新風格係乜嘢?Larry King老早自行爆料,話訪問名人之前,從來唔做背景研究,唔睇名人出版過嘅書,總之一聲開麥拉,佢就隨機發問,不斷跟進問題,十分自然,溫和,似兩個老 友促膝對談。Larry King話過霍士電視嘅〈Bill O' Reilly〉唔係佢杯茶,自己做唔出。哎吔,原來美國電視觀眾現在已經唔喜歡飲清茶,改為喜歡酸辣湯,奧拉利呢類主持人,喜歡訪問時與對手爭咪,喜歡對 罵,訪問總統候選人奧巴馬與眾議員Frank時,講到手指指,夠晒刺激,與Larry King嘅訪問風格完全不同。之不過,奧拉利係霍士皇牌,霍士電視嘅清談節目係咁鬧奧巴馬與左派自由主義分子,收視率高出CNN好多噃,反映到美國人要睇 一啲有attitude,有主觀意見嘅節目,CNN嗰套傳統客觀新聞報導,反而輸晒!Larry King當然唔會臨老改變風格以遷就觀眾,退休係佢最佳選項。奧拉利與Larry King,一升一沉,正好反映出美國人嘅政治觀點日趨兩極化,中立人士無市場。



PermaLink: https://articles.zkiz.com/?id=16710

Next Page

ZKIZ Archives @ 2019