2011-2-11 AD
| ||||||
前聯想(992)「鐵娘子」馬雪征、平安保險(2318)總經理張子欣,兩個喺中國名字響噹噹嘅打工皇帝走埋一齊,可以搞啲乜嘢呢?家陣最時髦嘅私募基金是也! 《金融時報》噚日話,o依家係德太投資(TPG Capital)亞洲地區董事總經理嘅「Mary姐」馬雪征好快就會起身,自己搞一隻以中國市場為target嘅併購基金,而佢嘅拍檔,就係將會喺3月18日正式離開平保嘅張子欣! Mary姐同子欣哥點解會做拍檔,華華唔知內裏底蘊,之不過大家喺江湖上個朵都咁響,惺惺相惜又得、兩個一齊俾人睇中又得。 暫時嚟講,華華就覺得後者嘅機會大啲,因為華華八到,Mary姐同子欣哥呢個「征子基金」,幕後打本嘅,原來係「黑氣石」Blackstone! 華華收到風,先排張子欣同「黑氣石」嗰邊傾得好埋,仲以為佢離開平保之後,會過檔「黑氣石」,殊不知原來係「黑氣石」打本畀佢搞檔基金,都幾估佢唔到! 個名夠響較易傾交易 查實學《金融時報》話齋,家陣好多國產高管,都揀自立門戶搞私募基金,Mary姐同子欣哥呢pair唔係咩新奇事。 華華聽啲內地老友講,o依家不知幾多呢類私募基金,搞手個朵響啲,傾deal都會易啲;但係無乜知名度個啲都有好處嘅,因為好多人費事張揚,所以呢幾年不知幾多人悶聲發大財,然後,咪南下支持香港消費零售同埋地產業囉! |