康健老闆變殼股大玩家
2015-06-04 NM
散戶玩股票，往往見急升就追，見大跌就放，最終命運，就是淪為大戶點心。正所謂知己知彼，了解大戶玩法，「掹衫尾」乘風破浪，才是其中一條贏錢之道。要數現時最紅的殼股玩家，非康健國際（3886）的創辦人曹貴子莫屬。市場傳聞，曹貴子與好友近年極之活躍股壇，牽涉的細價股達四十多隻，適逢港股大時代，收割得非常和味！曹貴子原本只是在沙田行醫的兒科醫生，後來成立首間在港上市的康健醫療集團，先獲長實入股，後得「玩具大王」蔡志明賞識，齊齊搵錢。他前年花一億元掃入天賦海灣頂層整圈單位，而蔡志明家人亦同樣掃入鄰座頂層，見面傾公事話咁易！外表如文弱書生的曹貴子，間中孭着背囊出入街坊診所；但他投資，卻又快又狠。如此進取搵銀，難怪成為股壇紅人。
即使貴為上市公司副主席，曹貴子至今依然堅持每星期應診。診所姑娘指，曹醫生會逢星期六早上八點半至九點半應診，而且只看舊症，不接新客。上週六早上八點半，果然見身穿西裝、孭着背囊的曹貴子，準時回到位於沙田希爾頓中心的康健綜合醫療中心。當時已有熟客在等候，排頭位的李太，八點半應診，九點三才步出診所。提起曹醫生，她即豎起手指公，大讚「Very good」，「我睇咗佢十幾年啦，由佢喺偉華中心診症已經睇佢，以前帶個女嚟睇，而家帶個孫嚟睇，因為佢有醫德，我對佢有信心！」她解釋，每次看症後，醫生都會請姑娘致電問候情況，「佢會打嚟問食咗藥有冇好啲，如果無就叫你返去再睇，幫你換晒啲藥唔收錢，呢啲醫生去邊度搵！」李太又指，曹醫生收費較其他診所便宜，熟客只收二百多元。當日來應診的老街坊約有三、四人，曹貴子早上十點半便離開診所。對於市場傳聞他與拍檔最近買下不少殼股，他笑笑口說：「你認為係咩？我唔覺得係喎，唔好講呢啲。」他本承認有投資殼股，但突然指着記者：「唔好成日話我買賣殼股呀！」他指自己現時只想做慈善工作，「我做咗醫生廿幾年，投資十年，最後呢二十年只想做慈善工作。」至於傳聞買入《都市日報》，他再笑一笑閉目搖頭：「唔係真，我連佢公司地址都唔知喺邊，但既然你哋講，我無理由出嚟澄清。」
曹貴子簡介
人緣廣友好多
表面上，曹貴子是一名普通的兒科醫生，實質上，他的股壇朋友卻奇多，例如金利豐（1031）的朱李月華（朱太）、位元堂（897）主席鄧清河，尤其與「玩具大王」蔡志明最老友。曹貴子曾指，因為對方患病求診而認識，二人一見如故，不久即變成生意拍檔。「金牌庄家」詹培忠多年前曾賣殼給曹貴子，他說：「我估佢都（喺股壇）做咗好多嘢，因為佢背後仲有個蔡志明嘛。佢呢啲後起之秀，我話佢衰又唔好，話佢好又貶低我自己，你問其他人啦！」殼股之神秘，在於細價股股票的真正老闆，往往隱身其後。市場傳聞，有股壇中人在過去一年掃入十多隻殼股，「好進取，連Due diligence（盡職調查）都唔做就買。總之乜都要，如果用追女仔做比喻，人哋揀女仔可能只揀十八廿二，佢就十八至六十歲都通殺。」一名股壇中人指。牽涉的股份，包括中國新經濟投資（80）、DX.com（8086）、智易控股（8100）、中國手遊文化（8081）及神州東盟資源（8186）等等，總市值達二百一十五億元。近年在市場炒殼股，方法有兩種。一種是借錢給莫財的上市公司大股東，但要求對方還錢時，債主只收一半現金、另一半為同等價值的上市公司股份，「拎住半隻殼，就諗辦法炒起佢。例如話有大陸公司要借殼上市，股價到時大升就可賺錢。」第二種方法，是直接將隻殼借出去，「有殼喺手但無項目嘅，咪借隻殼俾人，話有項目即入去囉，又係搏散戶追入。」股壇中的專業團隊已能「一條龍」，既有錢及殼借出去、又有多個大陸項目自己搞，還有財經演員、傳媒及大基金追捧，可謂立於不敗之地。現時市場最當炒的概念，就是「互聯網金融」，有這幾隻字，即點石成金。
靠得力助手
現時曹貴子身邊都是股壇紅人，例如葉志輝（Steven Ip），現任智易控股（8100）獨立非執行董事，公司旗下智易金融，在一三年時，重金禮聘打算退休的財演藺常念出山。藺常念當時指，智易給了他一條賓利（Bentley）車匙，只要他答應，就可以日日用賓利載他上班。而同是兒科醫生的許家驊（Ronnie Hui），亦是曹貴子的好拍檔。許家驊行醫多年，在九七金融風暴下炒燶六層樓，損手過千萬元後，決心鑽研經濟，考了特許金融分析師（CFA）牌照，成功轉行。現任康健國際行政總裁的他，跟隨曹貴子多年，○七年起已為曹貴子旗下的確思醫藥（8250，現稱中國天然氣投資）及香港體檢（397，現稱君陽太陽能）出任副主席及財務董事。一○年「天下第一奇股」漢能薄膜（566）借殼上市，許家驊出任漢能首席財務官。多年來，許家驊先後做過漢能的執董、行政總裁、財務董事及高級副總裁。同期漢能股價亦由幾毫子升到幾蚊。去年五月許家驊離開漢能，而漢能亦於上週爆煲。,
身家大暴漲
「曹醫生極聰明，亦守信用，好多人都好放心搵佢合作，尤其係內地人脈廣泛嘅玩具大王蔡志明。而曹醫生對搵錢亦好有衝勁。」一名認識曹貴子的庄家指。根據土地註冊處資料，曹貴子現時持有三項物業，其中一個是前年豪花一億元，大手掃入天賦海灣三座頂層全層單位。而蔡志明仔女加敏、加怡、加讚亦於差不多時間，以逾二億掃入天賦海灣三個不同座數的頂層單位。今年一月，蔡志明再用三億元掃入屋苑第十座全幢。兩家人對這個大埔豪宅都情有獨鍾。曹貴子物業不多，對比買樓，他更精於投資上市公司。旗艦康健國際醫療於○○年創業板上市，○八年轉為主板，身為副主席的曹貴子去年年薪一千六百萬，股息袋二百三十多萬。過去一年，康健股價上升近一倍，現時市值逾一百七十億元，並由曹貴子與蔡志明合組的公司，持近兩成股權。而康健又分別持有康宏金融（1019）、新銳醫藥（8180）一成六股權及兩成一股權。按股權計算，曹貴子間接持有的股份市值近十八億元。近年已進軍內地的康健，去年先引入台灣富邦保險為股東，集資近九億元；今年一月，又泊着好碼頭，引入中國人壽（2628）母公司國壽集團，成為第一大股東，集資近十八億元。
傳奇冒起
曹貴子的成功，絕對是「醫學」傳奇。他父親曹金陸，是印度華僑，在當地經營木材生意，所以曹貴子生於印度，可惜初出生不久便遇上中印邊境糾紛，被關進集中營一年，家財散盡；後來中國政府接收當地華僑，但回到內地又經歷文化大革命，最終在八歲那年輾轉來到香港，住在沙田。當時完全不懂英文的他，全靠父親讀夜校學英文，回家再教他和哥哥曹貴宜。最終他都出人頭地，考上港大醫學院。曹貴子出名食腦，畢業後向父親借了二十二萬元，在沙田偉華中心開設康健診所。但他不甘做死一世屋邨醫生，九一年便與大學死黨馮耀棠和陳永樂等，開始與不同的西醫和牙醫結盟，建立起康健醫療網絡的雛形，又首創二十四小時應診服務，不足一個月便收支平衡。除了食腦，曹貴子亦非常勤力，他曾指自己剛做私家醫生的頭五年，都沒有放過假，他的老友蕭若元向本刊指：「佢最勤力，連年初一都睇症，而且睇足十六個鐘。」曾與曹貴子買入確思醫藥的股壇中人呂志華指，曹貴子做事有魄力，「我最初係幫佢做公關，佢間公司搞上市時，佢朝早去睇症，中午又要管理業務，夜晚八、九點仲搵我哋去開會。」○八年金融海嘯，等錢使的呂志華賣走股份後，便沒有再與對方聯絡，但他以「發財立品」來形容曹貴子，「佢對朋友十分之好，唔會虧待人。做到上市公司主席，都親自幫我睇症，仲唔收藥費o架！」