2010-6-22 AD
| ||||||
| 上星期《壹週 刊》有一篇報道講「中大內戰」，有圖片顯示一啲不知名激進分子惡搞新亞書院，在水塔下嘅孔子銅像背後劃花，寫上「打倒孔家店」呢啲紅衞兵式口號，又在錢穆 圖書館貼上大字報，「反共錢穆可恥」。睇到《壹週刊》報導嘅新亞校友，無不震驚，想唔到今時今日中文大學內（還是校外激進人士嫁禍？）竟有人如此幼稚可 鄙，侮辱孔子及錢穆。 新亞創辦人尊孔，人所皆知，昔年新亞學生參加周會，例必首先起立向掛在幕上之孔子像躬鞠，唱校歌，方才坐下聽演講，歷 史哲學大師錢唐牟三人皆儒學信徒，世稱新儒家，佢哋嘅著作三幾十年前被大陸禁刊，但現於北京王府井新華書店，擺放在當眼位置。文革時期，四人幫批鬥周恩來 及林彪，將周公及「克己復禮為仁」謾罵，後來又大搞批林批孔，最後去到一九七六年初，仲有一個深入批林批孔批鄧運動，當時有啲本港大學生及學生會領袖受 騙，到深圳學習批林批孔批鄧，點知不久就有打倒四人幫事件，呢批「學運先鋒」回港後，為之思想混亂。 「打倒孔家店」口號，失蹤三十四年，料 不到重現新亞水塔，係乜嘢人惡搞，無人知道。八月上任之新亞書院院長信廣來教授係儒學專家，精研孟子；夠膽、有勇氣之搗亂分子，假如真係學生嘅話，不妨上 吓信教授嘅堂與信教授辯論吓，勝於在背後偷偷摸摸，唔見得人。 新亞校友會會長陳志新乃係經濟系畢業生，但愛好儒學，不時捐 錢支持儒學教育及研討會，得知有人塗污新亞孔子像後，非常勞氣，打電話搵左丁山講：「呢啲人好離譜，唔知會唔會惡搞埋校友評議會，我本來唔得閒，o依家都 要抽出時間參加六月二十六號嘅AGM。」李八方篇「中大校友吹雞護校」講到校友為中大籌款，認真刺激。坦白講，若無早年校友及社會人士捐款，今日中大有咁 多風涼水冷無敵海景嘅宿舍畀班學生住在裏面商量如何反對學校大罵校長乎？不少以前校友住在臨宿捱熱捱冷o架咋。當年宿舍間房放兩張上下格碌架床時期嘅校友 如梁英偉、陳志新、林榮德、王文彥、黃桂林及1967年會計系校友合共捐咗六百萬元畀新亞做發展基金，得益嘅係邊個？咪係今天及以後之新亞學生囉！ | ||||||