| ||||||
| 在永利、萬利賭 場輸咗幾千蚊，輸凸咗，要入肉，仲唔急急離場咩。以前聽經常與太太到澳門過周末嘅餐飲M講，威尼斯人酒店賭場最嘈，最多大陸客，永利賭場最細，最靜局。今 次左丁山冇到威尼斯人，唔知嘈成點，但親身體驗到，永利賭場確係比MGM賭場細好多，萬利賭場更加小型，似乎永利萬利係走高檔路線，爭取大戶為主。聽的士 司機講，在澳門，中文唔可以「有賭場」名稱，英文雖則一定係Casino，中文就一定要一律翻譯為「娛樂場」，但娛樂場內除咗賭枱之外，還有甚麼娛樂？據 講此乃以前澳葡所定，澳門特區無意改變，橫掂大家都慣咗掩耳盜鈴，知道娛樂場係乜嘢一回事，中文名稱改唔改都冇乜所謂啦。 餐飲M認為 Wynn（永利）係澳門最好嘅酒店，左丁山呢次就住在萬利（Encore），在永利前面，老闆同是Wynn，永利矮好多，想落當時係為求快速落成，開門營 業，爭取現金流，故此起得矮啲。賭場帶來現金之後，咪在原來嘅停車場起多一幢四十幾層高嘅酒店囉（按：酒店最高有五十六樓，還有一層Sky Casino，但冇四十至四十九樓之設）。呢間萬利嘅房間，全部係套房，標準面積係一千平方呎，每層有一間二千呎「尊貴套房」，八樓有八千呎嘅龐大套房， 都唔知邊啲客會入住。不過既然有八千呎套房，自不然有計，梗係用來招呼特別貴賓嘅啦，駛乜以日租租出去呀，普通人畀得起房租都未必可以入住呀。 左丁山住過不少東南亞大酒店，素來認為泰國嘅酒店平均最靚最大，物有所值，估唔到呢間萬利嘅房間會大成咁，比泰國有過之而無不及；論到舒 適及服務態度，就要大家親身體驗咯，畢竟人人嘅經驗都會唔同，左丁山就覺得非常好。老實講，澳門咁細，旅遊景點不多，除咗周圍搵美食之外，就係在賭場消磨 時間嘅啦，邊度會咁在意服務呀，飲食質素，呢啲小事啫！如果贏咗錢，永利嘅永利軒譚家菜就好值得一試，如果輸咗錢，或者覺得永利軒啲魚翅非常抵食o忝！去 完萬利返嚟，星期一在巴士站等巴士，碰到住在渣甸山嘅醫生C，佢竟然問：「喂，我喺澳門萬利酒店見到一男一女，男嘅好似係你噃，不過當時識做，唔敢同你打 招呼！」撞鬼，十世唔去澳門住酒店，去一次就俾朋友見到，好彩唔係偷食走私啫！ | ||||||