2010-05-17 AD
| ||||||
| 一班朋友組隊去 上海世博，問左丁山參唔參加，可惜左丁山在五月底六月初早有約會，不能臨時取消嘅，否則就係食言，食言而做首相就話啫，食言而去世博？唔值得啩？朋友笑左 丁山：「你蝕底咯，我哋搵到若干關係，安排妥當，到時包冇失拖，你自己去碰，實會撞火啫！」祖國情況，點會唔知呀，自己如果要去，都會參加一個「穩陣 團」，唔會自由行嘅。 投資Ｌ就好嘢，正式開幕前就已經得到請柬，跟一啲領導一齊入世博參觀，領導指點佢第一站就去中國館，否則以後好難順利 入到裏面，投資Ｌ聽計，一入場就去中國館，雖然話未正式開放，但與領導有關係嘅人士，點止投資Ｌ一個，直情成千上萬，於是中國館階前排隊約四十五分鐘。入 去呀？未住，排隊搭電梯啫。入去館內，有瓦遮頭，又排隊約半小時，等搭升降機上一樓喎，上到一樓，先至正式參觀。點解入內要搭電梯與升降機？從圖片所見， 中國館前唔係有寬闊梯級嘅咩？點解唔直情行上去。對此，投資Ｌ只能答：「此乃國情，你自己諗啦。」 世博開放一百八十四日，上海預早宣傳話估 計有七千萬人參觀，計吓數，七千萬人，即每日平均有三十八萬人，但已有幾日嘅參觀人數在十萬或以下，咁咪要追數？如果今日得十萬，聽日就要有六十六萬人？ 點搞呀？呢條數唔識計。一位愛國人士Ｎ老早計劃去世博最少三次，對左丁山講：「上海嘅人數估計過份樂觀，唔好俾佢嚇親，能夠有四五千萬人，已經相當唔錯， 我預備六月去一次，八月一次，十月一次，希望在不同月份唔會同時遇上遊覽高峯期。」 自己大鄉里，乜世博都未曾去過，只係曾經參觀過三藩市金 門橋附近嘅三藩市國際博覽會遺址，覺得地方不大，規模應該好細，但那是1939-1940年，不可與二十一世紀相比。當年中國製造不了飛機戰艦，俾日本軍 佔領半壁江山，唔知有冇參加三藩市博覽會呢？ 中國館話係必要參觀之館，美國館可以不去，其實美國館幾乎冇錢興建，要在最後階段希拉莉出面籌 款，先至搵到贊助，美國素來威慣，不必在世博show off，心理上當世博可有可無，希望今次之後，中國人亦係咁諗。 | ||||||