ZKIZ Archives


田氏兄弟由細爭到大

2015-07-02  NM

田氏兄弟不和,商界早知;兩兄弟自幼為得到父親田源灝認同而互相競爭,不時爭崩頭,兩兄弟曾齊齊在家族公司萬泰製衣做嘢,大佬管廠,細佬睇零售,但兩兄弟合作不成,阿哥嫌有哈佛MBA嘅細佬理論多,諗嘢太耐,田父遂把萬泰分家;田北俊強攻地產,田北辰搞零售,來個成績總結,睇嚟都係阿哥贏,淨係揸住物業近百億已經贏開巷,唔使同你喺G2000逐件衫賣,利潤仲要被鋪租蠶食!正如田北辰話齋:「哥哥永遠係哥哥!」

金融逍遙客金融「燈頭」無料扮四條

游走於中港台併購、私募投資的金融多棲動物,現為多間上市公司主要股東及董事

隔行如隔山,大部分圈外人,都不了解金融行業;其分工之大、之廣、之細,令行內人都不敢認金融專家。單是後生仔最想入的投資銀行,已分investment bankingdepartment(俗稱IBD),equity sales(證券銷售)等,林林總總。有時拎起張投行卡片:MD、Director、VP、AVP……銜頭大到無倫,唔熟行情嘅人真係嚇死!查實出來見客嘅賓卡,無論咩銜頭,大家當佢係sales或高級sales就得。逍遙客每見呢班精英,都稱佢哋做「燈頭」,即係幫老蘭夜場拉客嘅經紀,只係多咗張名牌大學沙紙兼著套Zegna西裝而已。聽到「燈頭」稱號,呢啲精英只能尷尬而笑。最近新股當旺,被呢班燈頭點到陀陀擰嘅上市公司大把。沒拿到生意前,燈頭最叻講吓點將公司市值谷到天咁高,與各個基金關係又如何如何,講到令啲老闆們當真。查實市場好,阿貓阿狗公司都輕易籌到錢。到市況不濟喇,燈頭們就一大堆說詞,賴呢樣賴嗰樣。不幸遇到燈頭老點,新股老闆為face,唯有上市前幾日,動用所有私人資源撲飛湊夠公眾認購額,就算孭條貴利數都只好頂硬上,這也造就坊間另一產物:包底富豪認購團。老闆左一巴被投行誤導俾佣上市,右一巴付高息搵人包底圍飛,但計嚟計去,都好過錯過上市呢班車。大部分企業家生意做得叻,但上市多數係處女經驗,遇上專業燈頭,加上門高狗兇嘅投行,實力稍遜嘅老闆們好難有愉快經驗咯!

中環寸嘴

工廈大王楊耀松長子,是各大有名食肆之VIP,喜歡研究城中有錢佬對食之要求,透過美酒佳餚,細味人生百態,讓讀者「嗒」落有味。

天際波士吔粗嘢中環間波士廳,聽講係班馬主同埋唐唐一齊夾份開,見佢喺九龍站101樓開多間The Sky Boss,咪去踢吓竇囉,新開張有八折呀,不過,要撲去中環波士廳攞張八折咭,我梗冇執輸,擸咗先去食!呢間Sky Boss位置夠高啦,不過入口迂迴又陰沉,麻麻哋。諗住新開張,個大粒嘅Ben楊(註:餐廳CEO)都會坐鎮幫客寫菜,點知個僆妹(女侍應)話佢未返工喎,望吓個鐘十二點幾喎;唉!咁就求其啦,好嘅一餐,唔好嘅一餐!叫個僆妹每款招牌點心整啲嚟,試吓粉絲蟹煲、海王炒飯咁啦。坐喺呢間海景房,最低消費六千銀,搵四碗松茸燉鮑翅打吓底先。嘩!入口水鬼尿咁,唔夠味,我即刻問有冇金華火腿汁,俾我加兩匙吊吓味。嗱!呢招就抄新同樂嘅,鬼咩!Ben楊喺新同樂做過嘛!老友問我覺得啲菜式點喎,一句講晒:「粗嘢!」睇點心、菜式格局,就知個廚未夠班,淨係將啲「貴嘢」隊晒出嚟,小籠包加金箔,鮑魚酥,炒飯又鮑魚粒、帶子,食材都唔得時令嘅!時令嘢有嘅,咪粉絲蒸勝瓜,呢味我菲傭都識啦,使鬼喺度食咩!所以話,搵食要親力親為,早排歎咗時令肥美黃油蟹,係叫疍家佬留俾我,呢排股市冧,應景呀!

補白

有位讀者Ben Hui來電郵醒我,「佳哥,是鄧肇堅創爵士湯,唔係馮秉芬。」我識英雄重英雄,多謝Ben哥修正。

壹週圖片

喺荷李活道文武廟斜對面,有間「私竇」日間重門深鎖,到傍晚就會有個高大黑人站在門前,頗有神秘感,有啲中環友諗歪咗,叫小宗睇吓乜料,原來係間充滿藝術感嘅餐廳,叫Bibo。此高檔法國餐廳之招聘廣告稱Dishwasher「洗碗」為潔淨員;與「肉類分割技術員」同出一轍,乃是提升形象!

金牙大狀講嘢

催賬創意無窮繼上門放蛇、塞鎖匙窿、貼大字報、淋紅油、走去債仔間公司死坐後,收數佬再出新招;上門擺紙紮公仔、撒陰司紙;再唔係就用貨車載住貼上債仔大名同相片嘅橫額遊街。總之嚇你唔到就落你面、唱衰你。呢啲新招能否逼到啲債仔蒲頭,言之尚早;但一般人認為新招比淋紅油文明得多。好似紙紮公仔咁,頂籠咪燒咗佢,唔使洗餐死;係朝住文明踏前一步。自古以來,有放債就有催賬「服務」。催賬嘅手法層出不窮,足見呢一行同所有行業一樣,低啲轉數都唔掂。啲人成日話香港經濟嚟嚟去去,除咗地產都仲係地產,鬧啲人冇創意。呢啲人梗係未試過俾人催賬矣。


PermaLink: https://articles.zkiz.com/?id=151475

Next Page

ZKIZ Archives @ 2019