| ||||||
| 民以食為天，何況o依家啲中國人越嚟越有錢，食得豪，加上養殖業喺中國屬於受資助嘅農業，做開玉米提煉生意嘅大成糖業（3889）主席孔展鵬（圖），喺舊年一於學養安格斯牛牛。 孔總雖然係養牛初哥，但唔夠一年已經賺錢，搞到孔總鬼咁高興，仲話要發大嚟做，計劃3年內要養5萬頭（o依家養開1萬頭牛），所以孔總近期同埋啲高層好忙，四圍睇緊牛場，向中國「牛王」寶座進發。 聽完孔總養牛大計後，華華好奇呢盤生意真係咁正？孔總話呢盤生意唔使交25%企業稅，管得好實賺，「我嘅牛向農民買返嚟，每頭5000蚊人仔，然後用自己調配過嘅飼料，一定要平均地谷肥隻牛，養多半年至1年，賣得。」 咁每隻牛賣到幾多錢？孔總講，有紅標、黑標同藍標三級制，紅標賣到1.8萬至2萬銀，黑標、藍標可賣1.5萬同1萬，扣除成本，紅標賺到成萬幾蚊。咁筍，怪唔之得孔總為牛「狂」。 | ||||||