2014年小妹投資唔算積極，出出入入股場賺得唔算好多，但勝在買左啲美股基金，都有好幾個巴仙的回報率。
但上個星期見到我地的金融掌舵手Norman陳話，因為投資環境困難，外匯基金回報率得1.4%，當堂眼凸。再見到大陸社保基金去年回報率高達11.4%，不得不封Norman為最差基金經理。
外匯基金億億聲，數字大到可能你根本唔care, 但我可以話俾你知其實相當重要，因為外匯基金每年都會分帳俾政府，分帳以過去六年平均的回報率計，即使話去年表現咁差，條curve就足足拉低六年！
更重要是，近年政府好鍾意搞基金，而好多都話會交俾金管局打理，例如去年財爺建議搞的未來基金，同埋全民退保預留的500億，就係其中之一。試諗下愈來愈多個億億聲交俾Norman管理，舊錢滾極都滾唔大，基建開支不停加，人口又不斷老化，再係每年跑輸通脹，我地真係輸就一齊輸！
我知，社保基金買A股多，去年A股升五成，當然大賺，不過我會問，點解外匯基金要咁保守？唔係叫你去炒股炒外匯，但當見到歐元、日圓勁跌時，究竟應變有幾快？減持有幾快？多元化投資買左咩？買約多，幾時買？點解明知回報好d都唔加快部署？從來都不透明。唔好諗住一句投資環境困難就敷衍了事。
我深信香港不是準備退休的六十後，保守的投資策略只會拖死我們，我們仲可以有無限魄力，香港需要的，是進取的選擇。
佟若喬
我開咗Facebook啦，請add www.facebook.com/financetung