正如老狐貍多次指出，股市除左似一個賭場之外，亦好似一個武林，雖然有統計指出投資者同賭徒一樣多數都係輸既，但「文無第一，武無第二」，個個都係認屎認屁，就算係細細註的，都會大大聲講自己的戰績如何突出，討論起上黎，大家都會由政治經濟大勢講起，再講埋得益行業/股份，跟住就基本分析、持術分析、財技分析，甚至什麼陰謀論、厚黑學、操盤都講到似層層，為左乜？好簡單 ─ 認叻。
好多新開始學習炒股票的投資者，有學識一點的會先學基本分析，就好似學少林功夫入門第一套拳 – 少林長拳一樣，又或者好似學紥馬一樣，呢點係好基礎，如果沒有呢D基本知識，連基本的P/E，P/B，ROE等等，又點會睇得穿d creative accounting 既詭計呢，相反，如果可以把呢d少林長拳耍得好，以前你一定係張三峯，換轉宜家就可能係Warrant Buffet。老狐貍好贊同大家學投資應該係由少林長拳開始既，但因為學習需時而沈悶，好多人會選擇走精面而去學另一樣野 – 技術分析。
我聽過好多新手會話技術分析好容易者，買本書睇下，上網睇下圖，咪可以實戰咯，就係容易掌握最容易以為自己係股神上身。簡單d講，技術分析就係睇住一d過往的股價表現，去估計未來的股價走勢，當中最初由Dow Theory開始，到什麼平均線，再發展到什麼黃金交叉、死亡交叉等，到架仔用黎炒米時用到的陰陽燭，之後既乾坤燭，再去到什麼七隻烏鴉、烏雲蓋頂、身懷六甲，而稍為科學少少的保歷加通道等，一切都係基於大家相信。直接少少，就係越多人信呢門技術，就會越準，睇下邊個部機快同貼市。當然，老狐貍都聽過一d莊家前輩親口講，個d日線圖、月線圖，由開市價、每日高低位、收市價等等每一點都係個莊自己mark落去既， 係咪好熟呢？ 大家都應該記得「賭神」入面高進同星加坡賭王講：「我呢個轉介指偷雞既動作，係我係過去500舖牌入面莊你呢隻老狐貍既！」莊唔莊到我呢隻老狐貍就未知，但小弟買股都會睇下圖，尤其係身痕炒day –trade時，而預計會持有的股份，圖表一般只作參考，會配合多d資料才會出手。至於有d會睇埋水星逆行，術數的預測，老狐貍只會一笑置之。
宜家多左d人講財技，老狐貍覺得財技派是有用的，但財技分析對投資者在學歷、投資經驗或市場經驗的要求都比較高。直接d講，人地點解要配股/供股？又或者點解要出CB先？唔通個莊真係想俾錢你贏咩，每一個莊只會想錢入自己袋，你贏到係你本事，但係十居其九都係你輸的多，而且非常配合市況同耐性，老狐貍係2014年曾經俾個一D用財技分析的建議俾朋友，股價最終大升了，但問番個朋友，佢已經捱唔住佢悶走曬了。
老狐貍明白好多朋友希望用財技分析去搵十倍股，要搵有得升既唔難，但就算俾你買到，我又唔係好信隻野升左50%，再震下倉你唔沽，俾你忍得到，1倍沽未？2倍點都沽了吧，死唔信你可以捱到十倍。老狐貍明白炒股的人梗係要貪，但就正因為呢D貪念，好多人會用幾萬蚊去學所謂財技課，學完初級未夠就學中級，中級未夠學高級，結果自己中曬毒，導師就發過豬頭。
有朋友近期上了一些所謂操盤課程，以為可以學會如投行的盤房交易員般跑贏個股市，但卻不知人地無論器材、消息都俾你勁，朋友話上完後只係話見到導師只以技術分析，project個股價圖，見到乜乜乜，大家就物物物啦，完全係無理論基礎，又話自己贏幾多千萬等等。老狐貍當堂嚇一跳，然後得啖笑，贏幾千萬計埋本咪過億身家，會唔會教你先？你估有好多人可以開住市同你講呢d牌係邊個，個d牌同個d牌係點做，大行用既VWAP、TWAP等等的盤咩？市場太多掛著什麼操盤王、操盤後、操盤神的名字去教人，其實操盤係一門好深的學問，老狐貍做左呢行咁耐都只可以話略懂略懂，但「操盤」二字太吸引了，以為學完FUND 佬上身，最終喊住黎呻。
「預知三日事，富貴萬千年」，個個都想學番一招半式得到財務自由，在股市中發達的當然有，但老狐貍見得更多既係輸家，小弟從無諗過會以股票去發達，但求每年有20%-30%增長於願足矣，在此亦希望大家多加努力，學費係要交，但交在股市中更實際了吧。
如大家有興趣，歡迎大家加老狐貍的FANPAGE交流下啦
https://www.facebook.com/oldfoxfanclub
老狐貍