ZKIZ Archives


$15億數殺埋身陳振聰撲水內幕

2010-02-11  NM





以 「過街老鼠」來形容陳振聰的境況一點也不為過,年近歲晚,輸了官司兼涉嫌偽造遺囑的他,不單被警方拘捕「遊街」,還要四出撲水,趕緊在三月二日前提出上 訴。原來以往他試過如賭局般開盤口,向各方人士籌錢打官司,賠率為一賠十,不過今鋪已輸一仗,還要為官司賠上可能高達十五億元巨款;屬豬的陳振聰,虎年運 程似乎凶多過吉矣!

陳振聰輸官司後第二日,警方絕不怠慢,高調到他的山頂豪宅、數碼港寫字樓進行大搜查,還讓他在警署度宿一宵,過程中,警方與採訪的記者十分合作,炮製了一場真人騷。

上 週三晚上八時,陳振聰被送入灣仔警察總部後,正當記者們以為「有排等,可以放飯」,卻聽到警察總部的車輛出口傳來一陣拖拉聲,原來警方正架起鐵馬。記者們 紛紛放低飯盒走到出口嚴陣以待,一名軍裝警員卻衝口而出:「未咁快出嚟,等多陣先。」大批記者走到對面天橋底準備拍攝,一名警察叫道:「喂,六個人過去好 啦,唔好太多人」。其間警察一邊叫「拍硬檔唔好亂咁過馬路」,但卻一邊為記者們開路。半小時後,聰嫂譚妙清乘私家車離開警局,長了鬚根的陳振聰於晚上十時 再被押往數碼港,警方一直狀甚從容。

而當記者們在數碼港宏霸數碼的辦公室大廈外等候時,警察與記者大搞警民關係,當無關的車輛出入停車場 時,警方笑笑口提醒緊張的記者們:「唔使驚,唔係嚟嘅,係嘅話你知。」直至凌晨一時許,一名沙展向本刊記者謂:「信我啦,差唔多出嚟,等我拉前啲條欄杆繩 俾你影……夠唔夠前呀?影唔影到呀?」一名交通警隨即補充:「出緊嚟啦,叫咗佢哋駛慢啲俾大家影,拍硬檔唔好衝出馬路。」

重獲自由充闊佬

在警署度宿一宵的陳振聰,回家後翌日隨即「出山」充闊佬,穿得身光頸靚到四季酒店用膳,並帶着保鑣跟身,仍然要以富豪形象示人,其實他的財政已外強中乾,曾經協助龔、陳雙方和談的大中華證券老闆蕭炎坤,便向本刊大爆陳振聰的臭史。

蕭炎坤九十年代初曾搞過柏聯地產,龔如心一度有意入股,生意往來令蕭與華懋老臣子如梁榮江、吳崇武等人都十分稔熟,華懋更找他做爭產案的中間人,幫忙調解。

蕭回憶當龔如心死後,老臣子梁榮江得知陳振聰手持○六年遺囑上,竟然有吳崇武的簽名,即大為震驚,還以為吳是「二五仔」,以為公司有內鬼。

他 稱自己肯走出來做「中間人」,皆因華懋不希望將王太的私隱爆出來。他曾與另一代表龔家的中間人,往律師樓跟陳振聰「講數」,當時在場的還包括陳振聰的律師 麥至理,「以前陳振聰只係跟在梁錦濠身後到處去,幫梁錦濠攞公事包,根本無人主動介紹佢係乜誰,但嗰次上律師樓,見陳振聰發達後肥咗好多,同以前唔同 晒!」

開價五百億

蕭說龔、陳兩方曾多次講數,最初銀碼由陳開價要五百億,最後講到五十億都肯制,雙方同意和解內容將來不會用 作呈堂證供。「陳振聰想醫生喺一至三個月內俾出五十億,龔醫生話佢冇錢,陳振聰就話雙方簽份嘢和解,不過要醫生搵個富豪做擔保人。陳振聰水緊,又話要俾住 幾億元誠意金先。但華懋最後都搵唔到富豪肯幫手。」

原來華懋曾透過另一中間人,找富豪李兆基及鄭裕彤為這五十億做擔保人,但最後無人肯制,「富豪做生意嘅,如果醫生俾唔到呢筆錢,富豪要上身,就算有利息回報,都不屑搵死人錢啦!」當時龔仁心又認為,錢是慈善基金所有,不可以亂給人,就算俾亦要律政司同意才可以,加上無富豪擔保,和解一事,到案件開審前仍無法解決。

蕭炎坤估計,當時陳振聰根本無錢打官司,因此分五十億都肯制,「佢叫過人問我借一千萬,官司輸咗冇得還,贏咗賠十倍,佢冇抵押點借?好似龔如心家公(王廷歆)咁,輸咗冇得賠,但贏咗賠一百倍,呢個係江湖規矩!」

在金融海嘯期間,陳振聰炒燶股票,要典當私人飛機、大屋、遊艇等等,曾向城中的地產界、金融界富豪借錢,負責替他叩門的是一名私人銀行家,這位私人銀行家還不斷替他向傳媒發放陳振聰「大把錢」的正面訊息。

用完即棄過橋抽板

為 打官司陳振聰拉了很多人落水,但往往用完即棄,搵人笨,受害人包括梁錦濠前女友陳佩君(Esther)。事緣梁錦濠應承擔任龔家一方的證人後,陳振聰一方 即想方設法打擊梁錦濠,蕭炎坤說:「陳振聰知道華懋搵咗梁錦濠做證人之後,即刻派人去英國搵Esther,希望Esther踢梁錦濠嘅衰嘢,質疑佢嘅可信 性。華懋又搵我聯絡Esther,想佢做證人踢爆陳振聰曾帶白紙俾梁錦濠簽名。」蕭炎坤說。

然而最終被陳振聰搶先找到陳佩君,「有人答應俾數以千萬元,叫Esther做證人,又帶佢去數碼港宏霸數碼參觀寫字樓,話第時邊啲業務交俾佢管。Esther雖然同梁錦濠反咗面,但佢怕報紙再舊事重提,醜化佢,唔肯幫陳振聰做證人。」蕭炎坤說。

今 年四十二歲的陳佩君曾在英國Kingston University唸法律,早年曾透過梁錦濠認識陳振聰,陳的一方遂改為找她幫手做翻譯。「陳振聰個英國御用大律師Ian Mill背後仲有個英國御用大律師拍檔John McDonald,Esther就辭咗原本嘅貿易工作,喺John嘅英國古堡返工,幫手做搜集資料及翻譯工作。陳振聰原本應承會俾報酬佢,來往香港同英國 嘅機票、食宿都包埋,結果陳振聰最後冇俾錢人哋,機票、食宿費都追咗好耐先追到。人哋辭咗份工,變咗做義工,我為佢覺得好唔抵囉!」蕭炎坤說。

威逼利誘充當證人

最後Esther搵到梁錦濠曾向華懋購入一幅大埔梧桐寨地皮,並打算發展骨灰龕生意的計劃書,證明梁錦濠做華懋證人有利益衝突。

「當 初Esther將份梧桐寨地皮建議書,交俾陳振聰時,雙方簽咗保密協議,不可以透露來源係Esther。Esther同陳嘅律師講,如果陳振聰唔俾錢就唔 會將文件交出。後來陳振聰同大狀講,只要大狀認為值嘅就會俾錢。」某日爭產案開庭前,麥至理仍狂打電話求Esther交出文件。誰知文件交出後,陳最後卻 賴賬,反口說要官司贏了才會付款。

「後來庭上代表陳振聰的律師Ian Mill舉證時講錯文件來自大輝證券老闆曾華山,搞到曾華山好嬲,告上法庭要佢澄清,Ian Mill原本話可以唔講個爆料者出嚟,話自己講錯就得,係陳振聰想拖更多人落水,令Esther個名曝咗光,而家Esther已經離開香港唔敢返嚟。」蕭 炎坤補充。

「陳振聰好賤格,份文件唔可以拎出嚟用,用咗梗要付出代價啦。佢之前承諾好多人話會俾錢人哋又唔俾,我估佢就算贏咗官司都唔會 俾。佢原本話俾錢我幫佢做證人,『篤』梁錦濠,我話多多錢都唔制,佢話佢可以申請法庭傳召我上庭,我話就算係召我出嚟,都會話失憶,咩都唔講。」蕭炎坤 說。

撲水上訴刻不容緩

機關算盡,陳振聰結果敗訴,之前口爽爽的承諾不兌現,更要四圍撲水,趕緊在三月二日之前上訴,事關敗訴的陳振聰,除了要支付逾億元的律師團費用,還要於二十一日內向法庭支付龔家逾億元的訟費。

由於原訴庭法官林文瀚是經過聽取眾多證人證供,基於事實作出判決,法庭接納陳振聰上訴的機會較小,但有律師細閱過法官判辭後,認為陳振聰仍可就當中一些觀點問題,提出上訴。如判辭中指「陳並非一個成功的生意人,因不認為龔如心會把華懋交給他擔任主席。」就是觀點不同,可作為上訴理據。

假 如陳振聰在二十八日內提出上訴,雖然可暫時擱置繳交訟費,但據黃國桐律師指,上訴前要先向法庭繳交保證金,他說:「龔家有可能懷疑你輸官司無錢俾,就可以 向法庭提出,呢筆保證金包括專家費、律師費,分分鐘係天文數字。」雖然陳振聰可反對對方要求,但仍必須要向法庭表列其資產有多少。陳振聰於上週五離開警署 後,即與兩名負責管理其資產的弟弟密會,未知會否商討變賣海外資產。

過街老鼠賒借免問

縱觀陳振聰旗下的資產,最值錢的是寶雲道十六號的楠樺居,以及上市公司宏霸數碼兩成三的權益;但是前者早已按予瑞銀來償還○八年炒燶股票的債項,即使出售,能落入陳振聰手上的不多,本來陳振聰還持有上市公司宏霸數碼百分之二十三的權股,可考慮賣殼套現,但就連殼王詹培忠也坦言對他的上市公司「無興趣」:「佢啲錢我唔會賺,何況佢隻嘢喺英國上市,喺香港係介紹形式上市,邊個借錢俾佢都要打折,佢嗰百分之二十幾,最多咪借到幾千萬。」

另一莊家坦言:「而家警方睇得佢咁實,買賣殼呢啲係非正式途徑嘅嘢,邊個黐埋去都被查埋,無着數;而且唔知佢隻上市公司有無隱形債項喎,如果佢之前用公司借過錢,收咗佢隻殼咪偷雞唔到,反而要蝕把米。」事實上,陳振聰打官司慘敗後又遇上大跌市,宏霸數碼股價狂瀉,至本週一收市只剩八元六角,公司市值賬面蒸發超過一億元。

如果華懋要將陳振聰趕盡殺絕,其實可以將小甜甜手上兩成四宏霸股權沽售,以質低股價。「到時陳振聰手上嘅股票就變成一文不值,就算佢已將股票抵押借錢,亦會被追孖展補倉。」知情者分析說。

年關最難過

以 陳振聰的聲名,即使資產抵押亦未必借到錢,富豪對借錢予陳振聰,表現得十分有保留。「佢舊年炒燶股票,都有問我借錢。我計過佢啲屋、飛機、船等等,係夠抵 押,不過因為不能夠認同佢嘅行為,最後都過唔到自己,佢太過分喇,女人錢都呃,人哋對佢都算係咁啦。今次佢再問我借錢,即使係fully secured都一定唔借,佢輸咗都無人可憐佢,而且佢行事太矚目,我唔賺呢啲錢囉。」一名金融界富豪說。

官司開打之前,曾爆出有富豪在金錢上力撐陳振聰,當時已傳出中國星主席向 華強曾借錢予陳。但本週二,向華強向本刊表示:「我完全唔識呢個人(陳振聰)。」據知陳之所以能搭上向氏,歸功於曾幫中國星打工的朱偉民,不過向華強就 說:「朱偉民係有幫過我打工,但陳振聰冇透過朱偉民向我借錢,我哋三個人亦冇錢銀瓜葛。」另外有知情人士認為:「以前陳振聰係老細,而家就光頭佬(朱偉 民)先係老細,因為陳振聰如今已六神無主。」據知商業罪案調查科,上週五曾手持搜查令到中環麥至理律師樓Haldanes搜查。

除了為官司「撲水」,陳振聰還要面對稅局有可能追討的接近十億稅項,連同律師費、訴訟費等,數目涉及十幾億元,挨年近晚,陳振聰飽嘗年尾撲水的滋味。



PermaLink: https://articles.zkiz.com/?id=14205

Next Page

ZKIZ Archives @ 2019