| ||||||
呢一代的年輕人，不再風花雪月，愛談政治。食正條水嘅《100毛》近期又黃絲帶、又玩hehe團，立場鮮明，喺年輕一輩中可謂hit到不得了！就連王維基都要問高官：「你們懂《100毛》嗎？」 呢份流行雜誌，一直都話由商台DJ陳強、阿Bu，及填詞人林日曦創辦，舊年開始發行。不過小宗發現，股東仲有一個。翻開《明報》同系的萬華媒體（426）年報，原來早於兩年前，已用了一百萬元入股「黑紙有限公司」嘅一成股份。而「黑紙有限公司」旗下有雜誌《黑紙》及《100毛》。咁計落，即係《100毛》值成一千萬元，每條「毛」值十萬蚊呀！萬華媒體喺年報表明，有權參與該公司之財務及經營政策決定。咁萬華媒體老闆張曉卿，喺中國有咁多投資，有無插隻手落去先？身為創辦人之一嘅林日曦就話無：「暫時都無壓力，可能我哋太細無人理，何況我哋三個股東，佢先一個股東！我哋一如既往，乜都講。」對張曉卿來說，揼少少錢就知而家年輕人諗咩，掌握市場脈搏，呢筆小生意絕對做得過！ 神秘兄弟會 半山堅尼地道一號，有幢三層高米黃色建築物，外形四方，四面密封，十分神秘，原來是共濟會的香港總部，名叫「雍仁會館」。共濟會源於英國兄弟會，有三百年歷史。會員之間有暗號，傳聞會員唔可以公開身份，仲只收男會員。小宗帶大家去到呢個「神秘組織」，發現呢度以前嘅會員猛人如雲，包括前後十四任美國總統、英國前首相邱吉爾、前港督羅便臣及前首席大法官楊鐵樑等。入香港呢個共濟會做乜？原來有好嘢食！呢度平日嘅午餐有中西式套餐，如海南雞、煎三文魚等，九十五蚊位。逢星期五有咖喱自助餐，每人一百一十蚊，而晚餐由二百至四百元不等。小宗試過味，唔錯唔錯。咁嘅價錢，唔使同人逼，港島區算難搵。前立法會議員黃匡源，都係共濟會香港舵主之一，佢爸爸、關黃陳方會計師樓創辦人黃秉章亦係第一代入會嘅華人，佢話入會費只需二千蚊，除了有兩名會員推薦，仲要經過會員投票。而其中兩條會規係唔可以講政治同宗教，純粹happy。小宗入唔到會，唯有「菠蘿雞」囉。 錢志健：怕學生無命 雙學突然發動攻勢包圍政總，演變成流血衝突，睇住畫面仲以為去咗外國暴動區。長留金鐘嘅「佔中金融組」發起人錢志健，評估話警方已經失控，有機會有學生喪命。「如果有學生死亡，或被打至殘廢，我哋一定告上聯合國嘅禁止酷刑委員會，控訴梁振英政府係兇手！」為了引起國際關注，錢志健亦一早着手搞「新信報」，並有可能命名「2047」（因為相信五十年不變，最盡都只係做到2047年耳）。做得新信報，佢已搵咗多個前信報員工洽談，報紙主要係網上形式發布，逢星期五先出版實體報章。為咗外國人都睇得明，當中會有三成內容用英文撰寫。佢搵過肥佬黎，「不過黎生就好老實咁話，做報紙唔多睇好，不過會無限量精神支持！」 本週最hea 本週日，香港人再次經歷了沉重的一晚。連日望着警察揮棍亂毆，雙方失控，真係做乜都無精神。但小宗老友就發現，特首跑馬仔候選人梁錦松，當日下晝輕輕鬆鬆咁同老婆仔女，喺山頂盧吉道行山。佢哋行咗個幾鐘、影吓相，小伏同阿女仲著住紫色親子裝，一家人上到山頂廣場，食埋雪糕先走。呢排搞緊清場，阿松唔使急住出來「宣傳」自己，難得清閒，真係至hea係佢！ 金牙大狀講嘢 佔中至今超過兩個月，話對經濟冇影響，你都唔信啦。但影響有冇把聲好似雷公咁大嘅教授所講嘅一萬一千億銀咁多呢？睇怕冇囉。佔中由928開始，但成個十月，來港嘅遊客不跌反升，按年增長咗12.6%去到超過五百二十萬人次；其中差唔多近八成係大陸客。呢啲亦非即日來回嘅水貨客，事關過夜客更按年增加咗接近一成五，有成兩百九十二萬咁多。於此可見，酒店生意應該影響唔大。把聲雷公咁大嘅教授原先話佔中對金融打擊最大，但佔中以來，股市半分鐘都冇停過；滬港通1117號列車更加如期開通（有冇生意，另議）。佔中衝擊金融云乎哉？乜嘢叫做聲大夾冇準，把聲雷公咁大嘅教授親身演繹俾大家見識見識啦。 | ||||||