📖 ZKIZ Archives

湖北首富的碼頭 陳承龍

來源: http://hkcitizensmedia.com/2014/11/19/%E6%B9%96%E5%8C%97%E9%A6%96%E5%AF%8C%E7%9A%84%E7%A2%BC%E9%A0%AD/

大市又冇運行，都係繼續炒股仔。小弟上周做節目時發現有創業板股份異動，睇完資料先至知佢正嘢，所以今日要同大家分享嚇，呢隻就係近期公布季績勁增9.3倍嘅中國基建港口（8233）。

 呢間公司以武漢港口作主營基地，而在建中嘅通用港口標準箱處理能力將較現時大增50%，令其已具壯大為中型港口股的條件，加上過去數年業績均錄盈利，故估計好快就可成功跳上主板，現大股東卓爾發展（2098）掌舵人閻誌在2011年的入股造價都要0.36元，現位只處沈寂3年後的起步位，今年更是分享肥美成果的開始，首目標以0.9元為第一站。

卓爾發展（2098）掌舵人閻誌
卓爾發展（2098）掌舵人閻誌。Source:Google

2011年底，卓爾發展主席閰誌以每股0.36元作價收購中國基建港口51%股權，其後再以同價提出全購建議，令持股增至75%，刻下街貨其實只值數千萬元，一個規模稍大的對沖基金已可一口食去，而閻氏如此耐心將股權全數歸邊，必係希望分享今天開始成形的豐厚成果，微妙嘅係，大股東旗下嘅卓爾發展都係以武漢物業發展及投資為主業，近期股價亦見久未相逢嘅異動，閻氏同執一地產、一港口嘅兩隻上市公司股份在手，應有好多意念可以發揮，目前股價只處其接手後的首個起動期，所衍生嘅股價升幅絕對可以睇高好多線！

事實上，中國基建港口上周三公佈嘅9月結季績，應係大升浪起動訊號，當日股價最高抽上2005年上市以來嘅0.6元新高（亦係上市價），全日成交均價約0.45元，幕後掃入成本亦都如此，以此基礎謀求倍計目標，便可以0.9元為第一站。

武漢係內地港口業必爭之地，處長江與漢水交匯，係長江中遊最大內外貿易港口，又係全國重要水陸交通樞紐，而中國基建港口則紮根在陽邏港，佔權85%，除咗現有40萬個標箱處理力外，另一在建新港口——通用港口亦喺明年開始投入營運，總處理年為20萬個標箱，預期第一階段的5萬標箱於明年第三季投運，故此未來數年業績呈強勁複合增長已成定局。

截至今年9月底止的第三季度，集團盈利達580萬元，較去年同期大增9.3倍，而首3季盈利則為930萬元，同比大增6.5倍，尤其第三季較首兩季盈利增長更大更速，完全分享到第三季內地港口業務復興的勢頭，而第四季更喺內地基建及國際貿易增長的雙重帶動而猶勝第三季，所以預期全年應有1,700萬元，不僅連續3年錄得盈利，而且應係破紀錄嘅水平，股價起動絕對有根有據！

仲有一點值得一提，閻誌乃湖北首富，佢啲學歷仲驚人，佢係高級經濟師，武漢大學工商管理碩士、長江商學院工商管理碩士、武漢大學中國傳統文化研究中心博士研究生、華中科技大學兼職教授。更搞笑嘅，原來佢係一個作家，喺內地出版過好多著作，而且以寫詩為主，總之猛料。

另外，閻誌嘅卓爾控股主要專註於企業供應鏈物業服務，致力打造全球交易平臺，為客戶提供供應鏈物業、物流、港口、金融、傳媒、交易服務。集團係中國企業500強，中國服務業百強企業，企業總資產近400億元人仔。由於閻誌摣住中國基建港口嘅成本都唔平，估計最終佢會再註入相關資產入內壯大，真係唔怕同佢玩嚇。

陳承龍

PermaLink: https://articles.zkiz.com/?id=119775
Next Page
ZKIZ Archives @ 2019