我的四個撐建制朋友（三） 人在中環
來源: http://manincentral.blogspot.hk/2014/08/blog-post.html
「如果我揾夠錢嘅話…」朋友C的話說得堅定：「我一定會移民離開呢度。香港，救唔返㗎啦。」
朋友C，是一個我認為思維有點複雜的人。他心裡很討厭建制，很討厭政府；但他的行為，卻又會撐政府，撐建制。
這位朋友，跟我年紀差不多，背景也跟我差不多，中產，讀過一點書，有家庭負擔，孩子還很小。
如果要說，我是個討厭建制的人，朋友C比我有過之而無不及。但最近那個反佔中的簽名運動，他還是想也不想就去簽名了。
他的理據，是這樣的：「香港人，鬥唔贏大陸㗎。既然鬥唔贏，就唔好浪費彈藥啦。得罪大陸，大家都冇好日子過呀。」
「依家嘅日子都唔見得特別好過吖。」我苦笑。
「係吖，我贊成。」朋友C回答：「但係香港呢個地方，已經冇得救㗎啦。依家仲有啖飯食，仲有得上嚇網玩嚇facebook，咪算囉。認命啦，我哋呢生呢世，都冇機會好似啲鬼佬咁生活㗎啦。你玩大咗，阿爺唔高興，你唔知佢會做啲乜，到時大家就一齊攬炒啦。」
有些朋友說，朋友C是個自私的人。也許是吧，但他這種想法，我認為我是理解的。老實講，對於各種反建制的活動，盡管我認同他們的理念，但問心，我也傾向認為勝算其實不高。問題是，勝算不高的話那又是否值得支持？我認為這是不少跟我背景相近的人，心裡所面對的掙劄。支持，因而你認同他們的理念，認為他們在嘗試做一件對的事；不支持，因為你心知勝算很低，你怕浪費了彈藥卻又得不償失。這件事上面，朋友C是個極端的悲觀份子，他不單止害怕浪費彈藥，還怕觸怒阿爺，給了他們「理由」去出力維穩，最後大家都會死得很慘。
「一個二個都響度話，this city is dying，」朋友C說：「OK，dying都有分快同慢的。我認同香港真係dying，不過要死，都死得有個全屍吖。你唔激嬲阿爺，你都係死，不過死得好睇啲，你激嬲佢，可能死得好慘呀。死得好睇同死得慘，我寧願死得好睇啲。」
跟朋友C相處，有時挺難捱的。他極端悲觀的思維，那份超強的負能量，有時真的很難應付的。對於別人罵他自私，他直認不諱：「自私？我認吖。但係你知唔知，點解我成日話，香港救唔番呀CK？就係香港有無數個同我一樣，甚至比我更自私嘅人呀。我哋呢啲人，唔會無啦啦改變㗎。我哋呢啲自私鬼，就係沈默大多數嘞，係『大多數』呀！香港點可能有機會turn around呀？」
「我夠想有民主，我夠想有真普選啦。邊個唔想？阿爺俾咩？佢只會俾個『假』嘅你然後老屈你硬食，仲要你認同話呢個就係貨真價實嘅『真』嘢。認命啦香港人。你諗住塞一萬幾千個人響中環就改變得到？阿爺係要唔俾，你塞曬七百萬人響度佢都唔會俾㗎啦。呢啲動作，你向個文明民主政府做就或者有啲效果遮，你響我哋阿爺面前做？唉。」
於是，朋友C基於覺得：「反正都係死，不如死得有個全屍」的理念，深信此時此刻，「撐建制」是相對理性的選擇：「你睇唔過眼有人賣港？唉，賣咪賣囉。佢唔賣大把人賣，阻都阻唔到架啦。佢地賣得『有啲秩序』，就住慢慢賣嘅話，大家咪命長啲囉。你唔識死搞對抗，只會死得仲慘仲快啦。我嘅諗法係『務實』咋。」
朋友C的想法，你會認同嗎？我跟他說，我很難認同他的想法，他說我這種人，太樂觀了。盲目樂觀最終會傷害自己。
政治立場上，很少人會說我是「樂觀」的，事實上，說我過份悲觀甚至盲目恐共的人還肯定比較多。
「你嘅過份樂觀，唔係對政府嘅睇法，而係對香港人呀。」朋友C說：「香港人，絕大部份同我一樣，係非常自私㗎。你自己可能都未必察覺，但你，去到嗰啲關頭，最終同我其實都只會係一樣。」
「當絕大部份人都如你同我一樣自私，呢個地方，唔會有機會turnaround。」
*****
寫完對上一篇《我的四個撐建制朋友（二）》不久，傳來了《主場》結束的消息。
主場的「遺言」當中，我只記得三個字：我恐懼。
讓我想起了身邊那位每日想著努力賺錢移民的朋友C，曾經跟我講過的一段話：「以前有報道話香港人想移民，係因為冇咗『家』嘅感覺。講到咁感性，多餘啦。香港人想移民，係因為佢哋知道香港冇得救，即使你願意留響度，都係唔會救得番。香港，係敗番響香港人自己嘅手上面，你同我，都有份整死香港。」
落筆時，又不其然記起，末代港督的那個預言:
"My anxiety is this: not that this community's autonomy would be usurped by Peking, but that it could be given away bit by bit by some people in Hong Kong"
那些人，有你，也有我。
Click here to add CK on your Facebook