| ||||||
| 先說日本近代史上一宗大事：一九七二年二月，連合赤軍五名成員逃避警方追捕，跑到長野縣輕井澤町淺間山莊，脅持山莊管理人的妻子。 第十日，警察用吊臂大鐵球擊毀山莊，殺入屋救出人質，拘捕所有赤軍，其中一人的父親在家自殺謝罪。 淺間山莊事件中，兩名警察、一名平民被赤軍殺死，十六名警察及記者受傷，有人永久失明。事件拍成電影，役所廣司主演。 後來政府重建山莊，去年易手，買主就是香港正生書院。 受爭議的學校，買下受爭議的物業。 當年NHK電視台全程直播，錄得90%收視率，歷來最高，「當時新聞日日播，大單過正生（遷入梅窩事件）！」 正生會創辦人、正生書院校監林希聖說。 林校監五十五歲，開過室內設計公司，當過老闆；後來成立正生會，也用營商手法 運作，專執平貨。去年淺間山莊放盤，大割引只售一千四百八十萬日圓（約一百二十萬港元），「日本人避忌死人屋，其實裡面無死過人。」 本來已是激安の筍盤，也只有林希聖這粒搾不出油的癟芝麻，說中國人不喜歡四四聲，「佢死蠢又信，終於千三萬成交（約一百萬港元）。 如果佢係中國人，就叫價一千三百八十萬啦，你話死唔死？」 毋懼日圓高水，「點高都係筍！四千幾呎屋，一萬呎地，大陸都搵唔到啦，你搵俾我睇！」 幫助正生學生成材，也是一盤生意，「他們學會謀生技能，自力更生，可以減少社會負擔。我條數係咁計。」 近年港人大談社會企業，以商業手段達到慈善目的，廿四年前林希聖已經如此，「正生會係註冊慈善團體，如果唔做生意，靠社會捐獻囉，你認同這項服務，就一定要俾錢，但我希望用這筆錢運作這項服務之餘，同時產生造血功能，我覺得這是責任。」 做什麼生意？記者跟正生書院十數師生乘搭街渡，到達碼頭，林喝令記者：「俾錢啦，六十蚊呀！你可以寫埋：『嘩，佢要我俾錢！』梗係要你俾，鬼叫你訪問我，你可以開數嘛，俾我哋揩多少油水啦，這叫生意！」 近年生意，專攻日本房地產，「我哋專執筍嘢，待他日賣出賺錢。梗係為賺錢，唔賺錢做嚟為乜？淺間山莊事件就快四十周年，到五十周年半世紀的時候，發達咯，向每人收一千日圓入場費，都夠啦。」 一般港人到日本血拼買衫，他只買樓買地。東京池袋有塊四方形地段，政府買了大部分起路，餘下五百呎三角空地，落入正生會手中，「二千六百萬日圓，咁鬼平！政府收地，地主已賺了一大筆，池袋喎大佬！剩下的求其賣出，我又執到！」 趁低吸納，獲利回吐，誰都會說，林希聖做得到，「塊地一買已賺，現時升了一千幾百萬日圓！」目前正生會在中、港、日合共約有三千多萬港元資產。 計劃率領正生學生到日本見世面，住在自己的物業，「邊間學校的公民教育、通識教育有咁立體？」 籌錢開辦學校，幫助日本吸毒學生，「愈有錢的國家，愈多人吸毒。」日本人有的是錢，何須港燦多事？「香港人夠有錢，點解又要幫？」 開荒 八五年成立正生會，搞福音戒毒；現時學生戒除毒癮才入正生，「現在社會有戒毒資源，點解要自己做？黐孖筋！搵對方危險，搵自己辛苦。」 八七年開始做生意，五十萬元買下元朗萬八呎農地開荒，包括三層村屋，「平到冧樓！」教會捐十萬繳付首期，月供二千多，「利息又低到黐晒肺！」 九二年以一百七十多萬出售。埋單結賬，扣除利息，淨袋一百多萬，「這是正生會第一桶金。」 立即斥資九十多萬購入大埔三百呎單位，十二年後賣出，「又執幾十萬（根據土地註冊處資料，賺了七十三萬）。我們將這筆錢慢慢變，九七年一炮過買下長洲山頂道物業。」 話 說當時一名教會弟兄經營地產，以二百四十萬將該物業賣給林希聖。幾日後另一名買家出價二百八十萬，那時候林希聖未辦手續，那弟兄大可反轉豬肚，穩賺四十 萬，但他只拿廿萬，另外廿萬交給正生會，叫林希聖放手，林企硬要買。那可憐的弟兄呢？「死死氣少賺廿萬囉，做乜啫，識到我哋係咁o架啦！」 ○二年再以百一萬購入隔壁相連樓。目前正生超額收生四倍，宿舍爆棚，部分學生到長洲那兩幢宿舍住宿。 正生書院就是這樣捱出來的。 二千年購入長洲花坪路另一幅地，準備起分校，百七萬元，萬七呎地，「每呎九十幾蚊，買塊田都唔得啦！」 早前網友「踢爆」此事，「我踢爆佢個契弟！」林希聖着火：「離島區議會通過這項申請，所有區議員都知，踢爆？慳啲啦！有啲人唔知（長洲買地），現在發現，無問題；你話踢爆，即係話我隱瞞！」 他是基督徒，但言談寸爆不拘小節：「你（網友）試吓同我講，你客氣講，我客氣答，你懷疑這樣懷疑那樣，無問題，我解釋；你亂噏，我分分鐘告到你甩褲。我唔客氣，我諗你都幾難捱，咪以為我係善男信女，我絕對唔係！」 寸爆 談到學生，更寸，「感化官判你兩年，我哋加價，兩年半呀！唔嚟？唔好嚟囉，反正爆棚。古惑仔都知道我哋寸，你唔嚟關我屁事？」 有些學生離開正生，寧願坐牢，卻又後悔，盼望重收，「第一次你住幾耐都得，我幫你幫到盡；你一放棄，ＯＫ，你的責任。別人一次機會都無，你有兩次？憑咩呀你？你話：『對唔住呀，以後唔敢……』坐監啦講咁多嘢！」 極少學生打老師，一出手，即被眾人圍毆，「這裡邊個做庄？邊個馬多？」 林希聖中五學歷，不能當校長，因此找來陳兆焯；不能當老師，不可以走入課室教書，「校監無限制，只要係社會賢達。我話我係社會賢達，得唔得？」 只有在課室外抓住頑劣學生罵個夠，「鬧到佢喊，或者我喊，有幾出奇？上心就喊啦。」嘴硬骨頭酥，到底還是緊張學生，「佢哋唔係我客戶，係我仔女。」 有些學生感化令屆滿，自願留下，「你估這裡的飯好好食？這裡不是朝豬扒晚牛肉，逢禮拜一三五海鮮；沒有冷氣房，我用爛地吸引你，因為我把炮！」他又來了，「我唔牙擦，邊個牙擦？」 每 個學生每月學費七千，住宿生活費三千多，網友嫌貴。「特殊學校平均收二萬幾；我哋個個學生有案底，多過一般特殊學校，我哋收七千幾，三分一喎，貴咩呀？唔 識嘢！你唔好理我班學生食乜嘢飯，有時我甚至唔俾飯佢哋食，點吖？出來的product先重要，班o靚仔做到嘢，你就唔好出聲啦，你都要讚我叻，讚我醒。 我係寸，係值得我寸！」 正生開設薄餅店，讓學生打理，提升責任心，「客人俾錢食他們的功課，寸唔寸呀？」 記者上次訪問亞視高層鄭偉強，他打算聘用兩名正生學生，以示支持。林希聖說：「如果你（學生）成個阿福咁款，點支持呀？支持你唔住啦！但若你做到嘢，聽話有禮，老闆用到個好人，嗒糖啦。」 窮慣 論學業，正生舊生黃榮新剛獲嶺大取錄；當年林希聖會考只有三科合格，「可能我認為自己腦筋轉得快，不受規條限制。」本來有神學院取錄了他，「一見張cert，叫我找第二間。」第二間也不收，「我連張cert也撕了。」 在室內設計公司打工，月薪七百。當時中環有兩種飯盒，三塊錢、三塊半，他內心交戰，「最後揀三蚊的。」老闆請客，埋單百幾，「有時令我心理唔係好平衡，三六一十八，我一個禮拜食十八蚊，你兜友一餐百幾蚊！」 幾年後開室內設計公司，每月支薪四千，有好日子過，豈料九個月後退出，「身邊無一個人同意。」加入晨曦會福音戒毒，「我無讀過神學，教會唔要我；無讀過社工，有什麼社會工作要我？戒毒所要我，佢哋係人都要。」 三年半後自立門戶，成立正生會，月薪八百，打回原形，並且多了一仔一女一老婆。節衣縮食，送過花給妻子嗎？「有一次佢病咗，我送咗一朵。」 朋友將半個月薪金二千元交給他，「唔止一次喎，每個月自動轉賬，咁至寸喎！」又有教會弟兄借出吉屋給他一家住。咁大隻蛤乸？「對基督徒來說唔奇怪，我奉獻給社會，佢哋奉獻支持我。」 當年設計公司一個伙記，現在有幾千萬身家，「這廿多年我做生意的話，可能好發……可能啫，完全無根據。」 搞正生，犧牲了高收入，也用不着他的高轉數？「點會？對住出面班人，蠢啲都唔掂。佢哋係古惑仔，我係大古惑！」 更正：上期《非常人語》吳昊的主診醫生應是鍾尚志 | ||||||