笑到最後：掟磚都驚 實輸畀索羅斯
1 :
GS(14)@2016-02-15 18:02:23一個投資者，如果經歷年初一旺角騷亂後，至今仍覺得好驚好恐慌、「班暴徒好暴力」，見到身邊有人炒股票但有呢種心理質素，大可以勸佢賣晒啲股票，將錢存入銀行定存，從此安安份份咁過埋下半世。因為年初一場騷亂，既係可預測，級數亦都唔高。投資本身就係一場預測嘅遊戲，所有股價都係反映緊世事嘅轉變，投資者本身都應該對世事有一定洞察力，至低限度都估到有啲危機會發生。以香港為例，主權移交之後，一般文書電話表達意見已經冇用，輿論同議會壓力政府又唔太理，所有「和平+合法」渠道失效。結果2014年佔領行動，測試政府究竟對「和平+犯法」會唔會有反應，最後都冇下文，自然會有人反思「和平」手段成效，再加上2001年特首董建華曾頒大紫荊勳章予「暴動之父」楊光，象徵「暴力+犯法」手段曾得到港府加許，隨後兩任特首都冇異議，令人以為效法楊光便可令政府回應訴求。
心靈脆弱勢被淘汰
以上並唔係乜「藉口」，而係預測，社會演化就係咁：政府冇反應，示威者就「加大力度」！戴定頭盔先，高明喺2015年2月10日專欄都講過「香港已有暴動嘅種子，只爭在有冇第一個人自我引爆」，剛好一年前講過，同樣發表過類似意見嘅投資者，印象只有孫柏文，不過佢賣埋樓準備移民，佢威啲。倒番轉諗，佔領之後，如果冇意識過香港會有機會發生騷亂、暴動，對社會了解都唔會太深，好打有限。至於覺得騷亂「好恐慌好暴力」嗰批人，高明真心建議你，唔好投資。香港係國際主要投資市場，你嘅對手全部都係世界級。加埋舊年股災後散戶死晒，主要對手就係索羅斯，佢今年真係嚟亞洲沽股市滙市。索羅斯1930年出世，經歷過第二次世界大戰，你認為佢會唔會覺得旺角「好暴力」、香港好危險？索羅斯係匈牙利出世嘅猶太人，佢同好友梁恒講過，細個行山，咁啱撞到納粹德軍，如果被發現割過包皮就死梗，因為割包皮係猶太習俗，最後佢扮鎮定行過冇事。香港投資者嘅對手係呢種心理質素嘅高手，如果見掟嚿磚仔都心靈脆弱成咁，被大鱷一啖食清唔出奇，定存可能係唯一出路，不過，一旦第日美帝行負利率，呢班人啲錢可能要搬去床下底。高明
https://www.facebook.com/bigricetea本欄逢周一刊出
來源:
http://hk.apple.nextmedia.com/financeestate/art/20160215/19491032