工作量大成日OT 與范巧茹裸辭主播林小珍寸無綫：「留喺度需好大勇氣」
1 :
GS(14)@2016-09-11 05:50:26■資深財經女主播林小珍自覺工作量與回報不成正比，離職後希望有更多時間照顧9個月大囡囡Cosette。
無綫主播吹起一片離巢風，由體育台吹到財經台。無綫今年2月將「高清翡翠台」改為「J5」，主攻財經節目，有指近半年主播工作量激增，兩位工作逾10年的資深財經女主播林小珍與范巧茹均以湊B為由齊齊「裸辭」，分別在9月中和10月底離職。二人昨日在社交網貼與一班同事及股評人食飯相，透露前日是她們在幕前最後一天，非常值得紀念！
■育有一子一女的范巧茹，謂想找工時較短的工作。
■「裸辭」的林小珍和范巧茹，前日獲同事及資深股評人歡送。
■林小珍前日在Ig貼最後一次幕前出鏡相。
「人工不嬲微薄」
林小珍昨日在電話中直認工作好辛苦，她說：「因為好多節目要serve，未開台（J5）都知有少少……做落就真係非常之吃力。」據了解無綫財經部門台前幕後只有30餘人，但要負責翡翠台、J2、互動新聞台、明珠台及J5所有財經節目，在人手嚴重不足情況下，同事經常要超時工作，但每年人工僅加數百元，對此林小珍回應說：「我哋人工不嬲都微薄，我覺得我嘅工作量同回報係唔成正比。」問有沒有向上級反映？林小珍說：「有，但我諗真係資源有限。」她亦戥繼續留守的同事慘，笑說：「係㗎，留喺度真係需要好大勇氣呀！」林小珍的囡囡Cosette只得9個月大，她希望離職後可以重新出發。
「成日都想走㗎」
而傳媒資歷有21年的范巧茹亦於今年誕下B女千林，被問為何離職？她在電話中帶點嘆息說：「做工總會有好勞氣嘅時候，成日都想走㗎喇！而家有個辭職理由叫湊吓BB，我個仔而家讀三年班，個女8個月大，咪幫佢做吓功課。」並否認被迫退下，她說：「我係全台年紀最大嘅主持，唔係而家冇得做，過多幾年都冇得做，將來想搵一份冇咁長工作時間嘅工作。」採訪：嵐山
來源:
http://hk.apple.nextmedia.com/entertainment/art/20160911/19766854
【回歸20年】生於97年7月1日20歲少女︰我想留喺英國
1 :
GS(14)@2017-07-02 14:19:3697前政要出巡會唔會封路？
有人話，呢個世界唔係非黑即白，在黑與白之間，還有灰。不過有一樣嘢只有兩個可能，沒有中間。就係，你出生於回歸前，定係回歸後？
97前嘅香港街道。
1997年有59250位嬰兒出世，按比例除返365日，每日平均只有162.32位誕生。而生於97年7月1日嘅，就有今天的主角，劉杏怡小姐。
劉小姐小學及中學階段皆在香港就學，及後赴英國升讀大學。
出生於1997年7月1日嘅劉杏怡（Myolie），1秒鐘都未曾活過喺香港嘅英治時期，但就對97年前嘅光景非常好奇，「好想知道英殖時期同依家有乜嘢唔同。」作為同特區政府同一日出世嘅人，佢哋老早就被冠以「回歸寶寶」嘅稱號，仿彿一出世就注定不凡。5歲、10歲時，百多個回歸寶寶們都分別到過禮賓府等核心內圍——同特區政府一齊開party、切蛋糕、唱「happy birthday to me」。呢啲經歷，好多人恨都恨唔到，又或者咁講，同岩布仙尼唱可能仲多人恨。
回歸10周年慶祝大典，一班同特區政府同一日生日嘅回歸寶寶應邀到禮賓府出席生日會。
唔知生日會有冇唱Happy Birthday to me？
喺香港長大，再到英國讀大學，Myolie算係比多數人幸運，可以離開香港嘅教育系統，呼吸外國嘅空氣。不過Myolie一樣注意到，香港近年嘅「味道」有所改變︰「大家嘅唔開心指數比較高，對於政府嘅批評，大家嘅意見亦係多咗，小朋友嘅學業上，可能有普教中啦，除咗要補習英文，甚至而家要補習普通話……」黑與白之間，果然灰。
劉小姐直言畢業後希望留喺英國發展，因為喺香港「好似每日生活喺個框框裏面」。
對於前景，劉小姐坦承好迷茫。於是呢張相加咗啲配色，灰灰地。
於是，Myolie選擇他日畢業後留在英國發展︰「香港呢個地方壓力太大，好似每日都生活喺個框框入面，所以希望喺嗰邊試吓。」都啱嘅。現世道嘅香港人，也許普遍只有兩個願望︰上車同離開。能夠離開香港到外國地方闖闖，相信好多網民都好想留返句︰「真係恭喜你呀！」茫茫人海中搵一個生於1997年7月1日嘅人，難，仲要呢班同特區政府甚有淵源嘅寶寶肯為《蘋果動新聞》做訪問，就更難上加難。所以，衷心感謝劉杏怡小姐，你令本來有點灰的今天，變得不再灰。生日快樂，劉杏怡。文、採、編、剪︰Roy攝影︰廖達燊協力︰表妹、張展陶 tag：_mt_娛樂,_theme_712017
來源:
http://hk.apple.nextmedia.com/entertainment/art/20170702/20075962