呢日中午飯後，行路行到國金二期嘅city'super，聖誕之後，內裡人流大為減少，收錢櫃檯再無好似聖誕前夕咁有百幾人排隊俾錢嘞，於是放心在內行嚇，買番幾包殼果或堅果（nuts）作零食，呢輪有四種殼果在國際市場炒得幾勁，就係almonds，walnuts，pecan， cashews（即杏仁、胡桃或核桃、美洲胡桃、腰果），呢四隻堅果據講係健康食品，對抗老化有益，近年在美國與歐洲引起強大需求，於是價格穩步上揚（當然亦視乎生產增長率），杏仁嘅國際牌價在十八個月內由每磅2.5美元升至近月嘅4美元，升足60%，但環球需求依然強勁。
除咗歐美人士好吃健康食品之外，堅果之需求從何而來？又係關強國人事啦，中國從境外輸入嘅核桃由2008/09年嘅30,200噸急升至2012/13年度嘅150,000噸，增幅五倍，可謂驚人。據金融時報報導，去年11月份嘅「新英倫醫學期刊」（New England Journal of Medicine）有一篇文章講述哈佛學院嘅研究，發現「地中海食譜」（常吃nuts）可以減少心胸科疾病，常吃nuts可減低死亡率。
左丁山兩年前睇到類似醫學研究報導，開始每日吃堅果，體驗到愈食愈貴嘅經驗，美洲胡桃尤其貴得驚人，食核桃較為便宜，食食嚇，真係想買呢類食品生產商嘅股票，研究嚇先。
付鈔之後，走到國金一期出口，竟然碰到過去幾年長駐廣州嘅財務B，問佢係唔係趁聖誕新年假期回港度假？財務B話：「非也，已經辭咗職，返嚟香港休息一個月，過年之後，就到上海返工，轉投內房公司跟強國人老闆做事。」咁就要問清楚嘞，企定定講多幾句先。據財務B講，佢在廣州主要為港商搞投資買賣地產項目，二十年前佢嘅老闆憑此發達，在廣州設立分公司，但過去四年來，財務B話，港商在內地投資愈來愈難做，講資本、講豪氣、講關係，港商都輸曬俾內地公司，佢哋過去四年來，只能做一啲小眉小眼嘅地產生意，財務B恐怕長此以往，自己唔走都會被炒，趁自己還有市場價值，咪追隨大形勢，轉投強國內房公司陣營囉。 