2011-9-26 NM
眾所周知天水圍係超人李個地頭，新近曾俊華（其實係「財政司公司」[Financial Secretary Inc.]，即係政府
）竟然進軍天水圍之栢慧豪園；唔係買樓俾公務員住，而係用一百七十幾萬元買個廁所。何也？
個廁所原先係商場嘅一部分。商場設有廁所，方便客人，絕對正常，點解仲要財政司出頭，用納稅人嘅錢買個廁 所呢？即使利益輸送，冇理由咁濕碎o架。呢個廁所雖然係商場嘅一部分，但地處天水圍公共交通運輸交匯處，要方 便嘅人必定甚眾。若果商場唔肯俾冇幫襯嘅人到此方便，咁「福為民開」嘅政府係咪要想辦法與人方便先？睇嚟亦 係咁，由是有向超人李買廁所之舉矣。一百七十萬元看似濕碎，但都係錢嚟嘅噃。何況開放商場廁所方便公眾人士，既要請人打理，又要提供水電梘液廁紙，小數怕長計呀，老友。講計數，你話超人李抑或財政司叻啦？
梁永祥撐浸大 九龍塘浸大轉眼五十五周年校慶，得到唔少校友撐場，包括剛啱退落嚟唔做恒生銀行執董嘅梁永祥。唔淨止撐咁簡單，佢更加粉墨登場，扮美源髮采廣告裡面嘅曾江。各位，你話似唔似啦？即使冇八成似，撐到咁出力，都抵拍爛手掌啦！
廖銀八少奶想伐木 上個禮拜廖銀八少奶廖湯慧靄同兩個細佬湯文亮、子亮及乖仔廖偉麟Jeffrey去灣仔富聲酒家食晏。不過中午時分，佢已經開咗幾支紅酒，認真海量。廖太對敝刊早前寫佢有所回應，而不改其辛辣本色：「我一路都話《壹》仔寫嘢唔真實，今次篇文就寫得好真實！」佢又話睇到我哋專訪巴布亞新畿內亞森林女王，好關心林業，事關佢阿媽喺澳門開嘅「利源棧」係做木材生意者，故此佢細細個已經對木材深有認識。佢細佬湯生搭口問記者識唔識乜嘢叫「冧band」？原來即係啲工人唔識得?樹，以致棵樹「冧band」倒地，成為碎木，因而嘥料。八少奶補充，好耐之前佢已經派伙記去新畿內亞考察，「但住咗幾個月，唔肯再留喺嗰邊啦！」莫非佢想過同杜玉鳳爭飯食？
俾位黃生上 黃成華係賭王何鴻燊去北韓開賭嘅盲公竹。不過呢個已經係好耐之前嘅事矣，近排佢老哥已轉戰有利陣地，去越南開煤礦。上個禮拜佢喺銅鑼灣麻布茶坊同兩個口音濃厚嘅女郎茶聚。佢騷quali，話喺大陸、北韓過關有特別通道；跟住口風一轉，講到開礦：「依家做旅遊無乜錢搵，開煤礦就唔同啦，掘到個千萬噸嘅煤礦，唔使多，每頓賺兩蚊，都幾千萬啦！」一提到越南，其中一個女郎話說以前喺越南住酒店，啲床好細，要兩張拍埋先夠瞓，搞到中間有條罅。黄成華食住上，話張床唔夠瞓，咁就不如瞓條……敝刊冇情色版，下刪七七四十九隻字。然而，觀乎兩個女郎嘅精神面貌，兩張床拍埋有條罅之說，顯然特登係鬆章，俾位黃生上者。
本週熱賣 超人李揮低國父書鋪擺賣四款箴言，分別為國父孫中山、湘軍統領曾國藩、左翼文豪魯迅及當今香江首富李嘉誠。各位，你估邊位嘅箴言最賣得？燈登櫈，就係超人李啦。成戙書，佢嘅箴言只賣剩一本，足見渴市。香港地，邊位嘅說話值錢？仲使講乎！
中環人語迷你版
“其他範疇先至會爭風呷醋嘅！”估中邊個中環人講呢句說話， 送你JWATCH j-36-尊貴版手錶一隻 有意參 加者，請於十月三日24:00前將答案電郵[email protected]小宗只接受電郵，郵寄免問。本刊員工及直系親 屬不得參加。為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。 超過一位讀者估中，先到先得，恕不接受上訴。答案及中獎者姓名將於一一年十月六日本欄揭曉。
上週人語揭曉
“三年後香港員工依然比今年多。”答案：王冬勝得獎者：Cindy Wong中獎時間：1:00pm 21/9/11 本週企高 張茵唔腳踏實地玖龍紙業之業績如何唔到我哋評論，我哋只希望張茵今後腳踏實地，將生意愈做愈好，是為所盼，阿們。