|
||||||
|
新地（016）郭氏兄弟決裂、南豐姊妹反目，單單精采幕幕新鮮。全港市民等睇戲，估吓下一家反面嘅係邊個望族。船王之後、自己亦已創一番事業嘅卓能（131）主席趙世曾話，絕對唔希望自己嘅仔女，第日都會係咁。 佢話：「我都有各種準備同分配，做得好仔細o架，三個仔女唔同媽咪嘛，更加小心啲同佢哋做好善後準備，唔可以馬馬虎虎……內容唔講得，而且遺囑隨時可以改得o架嘛，所以做得清楚啲，將來唔會有糾紛。」 做好準備免子女爭產 「每個人都希望自己事業成功，賺多啲錢o架，到咗下一輩就會產生啲爭產嘅問題，如果你無幾多財產，咁咪無人爭囉，大家兄弟姊妹反而和諧啲。」 南 豐陳家發生嘅事，趙世曾形容係「不幸」，「人生就係咁o架喇，你想成功，又賺多個錢，後面就會有啲咁嘅問題發生……o依家唔係淨係遺產嘅問題，係太太要求 離婚喎，唔使睇張遺囑都分咗畀你先喇，有份分遺產嗰啲梗係反對，咁睇吓個官點睇喇。照計太太要求離婚，無理由唔畀佢離喎，只係唔知佢嘅財產，有無做到入基 金入面，如果喺基金入面，太太都郁唔到。」 o依家仲係「單身」嘅趙世曾話，純粹以法律角度睇呢單嘢，因為人哋嘅家事，佢都唔清楚，雖然佢以前同陳廷驊好熟。 離婚後遺多現擁5女友 離婚可以導致俾人分一半身家，呢個可能係趙世曾唔結婚嘅最大理由，「我都有啲朋友係接近啲嘅（指關係親密、穩定嘅女朋友），但結婚機會就細啲，受制於香港嘅法律，如果婚姻失敗，會產生好多後遺症」。 「一個男人可以唔結婚，但仔女就一定要有，有啲人因為唔結婚而無仔女，就唔好……唔結婚都可以好happy，一種種人嘅choice啫，有啲人鍾意結婚，有啲人唔鍾意，我就屬於比較自由嗰種人，但係仔女一定要有！」 趙 生呢套理論都幾多人buy，至少城中兩大鑽石王老五──李澤楷同李家傑都係咁諗，只不過後者搞到有啲論盡。據趙世曾講，男人真係要步入戀愛嘅墳墓，四十幾 五十歲先係「適當死亡年齡」，千祈唔好後生結婚，佢教自己個大仔都係咁；但係open嘅另一面就出乎意料咁封建，「個女就唔同嘞，女仔一定要結婚，仲要越 早嫁人越好！」 單身自由到爆，但係又有仔有女，趙世曾已經做到，佢仲經常拖住唔同嘅女伴穿梭社交場合，咁樣亦係佢嘅養生之道，「做多啲運動，人生開心啲，交多啲女朋友喇……」最後，佢默認約有5個穩定嘅女朋友，其他拖住畀大家影嗰啲，唔係喎！ 對股票專一九成長揸 趙世曾嘅「專一」似乎只適用於股票，而唔係喺女人身上。「基本上，我九成股票係長揸嘅。」但強調無話死古古，「起得快，就賣咁啲；跌得快，就買番啲；如果我揸嘅股票唔到價，就永遠唔會賣，係三個大原則喇！」 有無必殺技呢？「最弊係跌嗰陣，（如果）個個去搶，你又去搶；（如果）跌到嚇親，你又去『揼』，咁係無辦法翻本嘅……除非買到一隻好差嘅股票，否則好難5年10年都唔起嘅，好少好少……總之有得賺我會走，呢個世界無撈底呢樣嘢。」
呢 幾個月股市風高浪急，但係趙世曾話投資策略無乜變，唯一唔同嘅係投資組合，「以前係藍籌多，o依家係紅籌同H股多啲，佔一半以上，香港就買公用股收息，滙 豐（005）就長揸。」趙生最長情嘅，原來係大笨象而非美人，唯一同佢絕緣嘅應該係地產股，「地產股好，即係地產好；地產好，我做地產嘅都好，所以唔需要 揸地產股。」 講開地產，卓能嘅地皮好早買落、又唔係做地產代理，所以趙世曾可以準時5點收工去打波，「政府干預基本上係OK嘅，香港政府同大陸一樣，做緊宏觀調控之嘛，呢次藥就重啲，啲地產代理好唔happyo架，點搞？修正吓囉，加到7%至唔超過10%就夠啦。」 講到發水限制，「發水兩成都OKo架，啲樓起出嚟靚啲之嘛！政府一味出口術，出唔到就落重藥，又嚇你唔減就再重啲……有少少打錯好人，太犀利係會整『彎』個市道……要收手嘞！」 後記 下晝5點做完訪問，74歲嘅趙世曾，趕住由灣仔過海去何文田打籃球；30出頭嘅攝影師，趕住去睇跌打，醫膝頭哥舊患；視年齡如秘密嘅華華，一走出門口就幫發炎嘅左手手筋搽藥膏。養生之道，都係得個聽字。 李華華 |
||||||