投資導航 炒家「玩具鄭」：政府辣招搞冧市
1 :
GS(14)@2013-10-13 11:06:00http://hk.apple.nextmedia.com/financeestate/art/20131013/18460037
人稱「玩具鄭」的炒家鄭躬洪，曾經手執幾十件九龍站的物業，兩年前睇淡樓市，沽剩五件，鄭躬洪也承認睇錯市。今次新地（016）劈價賣天璽，他雖認為豪宅樓價未必會跌，但亦唔代表會升，更深信有特首梁振英一日，樓市都冇得玩。
「幾時都有suprise」
鄭躬洪坦言：「我睇錯市！其實揸耐啲，可以賺多啲，鬼知咩！兩三年前，樓價高到我自己都腳軟。」
不過，就算揸到現在，卻有價無市，「我成日問代理有冇人跳樓（貨），但減幾個巴仙有乜嘢好買……你減5%畀我，我預期跌20%，嘩！買唔過。但呢期唔同，你預期跌十幾廿個巴仙，佢（新地）而家即刻減畀你，我咪有得諗囉！可能唔跌，如果真係下跌，我都唔使點蝕，你而家將明年個價賣畀我。」
新地劈價賣天璽實震散二手豪宅，「對我冇乜影響，我係自用。你話而家賣咗遲啲買番，係咪好啲呢，嚴格來講，係嘅！但如果人人預期都係咁，個市未必跌，樓市幾時都有suprise。」
為何認為豪宅唔會升，他這樣解釋︰「而家有錢真係唔會買豪宅啦，睇唔到大升，加上銀行做得五成，甚至四成，又乜稅物稅，幾犯本呀……香港樓市衰開，衰好多年㗎。」誰把樓市搞垮？他肯定地說：「絕對是政府出招，好坦白講，邊個做特首，都唔可以畀樓價升，你得罪一兩百萬中產有錢人，抑或600萬基層市民？尤其是梁振英，佢連李嘉誠都得罪。」
炒家 鄭躬洪
「好坦白講，邊個做特首，都唔可以畀樓價升，你得罪一兩百萬中產有錢人，抑或600萬基層市民？」