ZKIZ Archives


《蘋果》專訪:為負評唔開心 祝福林宥嘉新婚G.E.M.最憎被稱宇宙巨漿

1 : GS(14)@2017-01-12 08:03:27

■G.E.M.昨日接受本報訪問,承認在內地掘到很多金,但自己好重視香港。



鄧紫棋(G.E.M.)近年轉戰內地市場狂賺人民幣,25歲已拍音樂紀錄片《一路逆風》,將於下周假兩間戲院上映三天,有網友認為歌神張學友都未出紀錄片,究竟G.E.M.憑甚麼呢?昨日她在紅磡接受本報專訪反駁:「作為一個故事紀錄,由自己遇到經理人到?家,行咗十年追夢過程,希望自己嘅故事,可以鼓勵到歌迷。」



■G.E.M.坦言最不喜歡「宇宙巨漿」花名,覺得漿同G.E.M.讀音不同。

■舊愛林宥嘉和丁文琪結婚了,G.E.M.祝兩人生活愉快。資料圖片

■G.E.M.憑《我是歌手》節目在內地爆紅,隨之而來被指態度差是非不絕。資料圖片

「我好重視歌迷」

問到在內地是否搵到好多錢?G.E.M.坦言:「都有賺到多過以前,冇幾億,幾多位數字唔講,但開始去諗點運用。」是否多些時間賺人仔好過留在香港?她說:「其實唔係,邊度畀到舞台我就好想去,好多人覺得點解你成日唔喺香港,之前開演唱會去咗49個地方,我好珍惜呢個機會,原因唔係開演唱會賺錢,原因係我想唱歌。」
G.E.M.近年負面批評不絕,是否鍾意返港?她說:「聽到呢啲聲音都唔開心,原因唔係啲人成日話你唔好返嚟香港,唔開心係我好重視我喺呢度嘅歌迷,我好重視香港呢個地方。」對「宇宙巨漿」、「時裝災難」等花名有甚麼睇法?G.E.M.說:「心情好嘅時候一齊笑,嗰排比較忙或攰會覺得好煩,最唔鍾意個漿字,因為漿同G.E.M.讀音都唔同。」怎睇藝人被批評為賺人仔跪低,在內地節目飲尿?G.E.M.愕然說:「有啲咁嘅事?點解嘅,咁勁,咁我又唔得喎!你唔可以斬釘截鐵話佢做呢樣嘢係為錢,之前都有節目要我跳笨豬跳,我係畏高嘅,但我都有跳咗,唔係因為節目畀幾多酬勞,我要挑戰嘅只係我嘅恐懼。」而紀錄片內重提前度林宥嘉,不怕被指消費舊情?G.E.M.坦言:「都唔會驚別人點講,只要你知道唔係,唔需特別證明畀人睇,呢套電影記載生命裏面影響我幾深嘅經歷,所以冇刻意避開邊一個部份。」林宥嘉同丁文琪結婚,會否祝福他?G.E.M.笑笑說:「會祝福佢,祝福佢哋生活愉快。」不再恨他?G.E.M.說:「時間會令你慢慢消化一啲嘢,呢一刻已經冇嘢嘞,好健康快樂。」



■天后林憶蓮參加《歌手》被歌迷抨擊,G.E.M.就期待憶蓮演出。資料圖片

期待憶蓮表演

此外,問到G.E.M.是否贊成林憶蓮參加《歌手》?歌迷都疾呼「愛錯憶蓮」!G.E.M.表示:「我有留意,其實都幾期待佢,自己覺得大家唔好當比賽睇,唔認同賽制咪唔理,有機會見到自己鍾意藝人表演,只要欣賞表演就得。」



採訪:余燕儀攝影:郭賢興、林德雄
Stylist:Emma Wallace化妝:Dora Chan assisted by Phoebe Ho(Spotlight Image)髮型:Freddy Chiu場地:紅磡都會海逸酒店




來源: http://hk.apple.nextmedia.com/entertainment/art/20170111/19892641
PermaLink: https://articles.zkiz.com/?id=322189

Next Page

ZKIZ Archives @ 2019