電視風雲 - 王奇雲 寸咀叻哥
1 :
GS(14)@2013-11-13 14:14:26http://www.am730.com.hk/column-180942
香港電視暫時發牌無望，即係話大家要繼續焗睇婆媽劇，最近無記重頭劇之一嘅「醫生劇」，又被網友頻頻插爆，劇情老土就梗，唔合邏輯都唔係第一次，但太唔合乎現實醫學常識就的確有啲過分，以往製作呢類專業題材嘅劇，必定有相關嘅專業人士做顧問，務求整體嘅設計可以合情合理，希望行內人睇得有共鳴，同時能夠將嗰個行業鮮為人知嘅事，加插落故事發展，帶俾觀眾資訊及娛樂。
無錯，上述所講嘅係一個應有嘅做法，但現實中可以話係一個希望，皆因當中過程涉及太多人同埋事，仲要顧及嗰個行業嘅人嘅感受，話晒人哋俾料你，甚至借埋地方俾你拍攝，度古仔時，總唔可以去得太盡，呢啲叫做人情道義，如果問咁有無影響創作，相信一眾無記同事會答你，幾十年嚟都係咁，兩者取得平衡咪算囉，但點樣為之平衡，就無人識答嘞。
觀眾都習慣無記劇，係邊睇邊習慣免費電視無得揀，惟有當係生活壓力嘅一種發洩，人家亂嚟吹水hea做都唔擔心無人睇，向來寸咀嘅叻哥都話如果收視跌到得兩、三點，佢就由將軍澳電視城跪到返屋企，口氣之大，引起網友鬧爆，如果成事，相信好睇過台慶，佢明知無可能發生，根本擺明寸所有觀眾，唔明白對於電視台嚟講嘅重要資產，有人可以誇下海口，聽到令人火滾，但無計，佢嘅言論的確反映現實，唔俾個牌你，任你幾有心機去製作，有幾好睇嘅劇同埋破天荒嘅資訊節目都要打入冷宮，惟有寄望香港電視嘅Plan B、C、D會帶俾大家機會有更多嘅選擇。
(逢周一至五刊載)