📖 ZKIZ Archives

填版新聞 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120924/18023098
在左丁山眼中，不時有一啲報紙做埋一啲無謂報導，用來應景填滿報紙篇幅啫啩，譬如中秋月餅上市，某報就大字標題：「奶黃月餅脂肪陷阱，奇華『三高』」。睇 完你會點？今年唔食月餅？唔買奇華、美心月餅？講笑咩，美心可能係全港最大月餅製造商，奇華月餅亦享盛名，左丁山每年都食（其實係乜月餅都食，內地製月餅 就當垃圾丟掉），邊度驚得咁多呀，食完月餅最緊要識得飲杯熱茶，普洱鐵觀音之類，蔡瀾月餅附送暴暴茶仲更加正斗，如飲可樂凍飲，抵你啦！
某報又試 報導新加坡房屋比香港好得太多，香港遠遠不如。人地新加坡可以猛咁填海而不聞環保組織反對聲音，可以話起賭場就起賭場，唔會出現黃之鋒一類學生活動家，電 視台唔可以播出新聞特輯批評政府收地，香港可唔可以呀？大家社會文化差天共地，點比較啫，報紙編輯評論員樂此不疲，其雙重標準令人莫名其妙。
每年 開學又有消委會出報告講書價太貴，上星期講小學課本，小學課本總平均加幅係2.2%，中學總平均係2.5%，與通脹比較，根本不是新聞，試嚇搵間麪包舖嘅 菠蘿包，一年只係加價2.5%吖。既然冇新聞可做，報紙竟然可以搵到條標題：「小一書單最平最貴差五倍」，消委會列出數字，小一書單最平509元，最貴 3089元，平均2015元（平均數上升咗1.8%咁多）。小學書單有貴有平，好自然啫，拔萃係貴價學校，新界某保良局小學係平價學校，有乜好爭論？英基 學校最近要求入學申請人付出五十萬元debenture，新科教育界議員葉建源批評英基優待富有家庭，真係講到明就唚啦，鬼唔知咩。英基與國際學校話到明 係俾外國人與富二代讀嘅，中產家長何必強求，學人送子女入英基/國際學校，本地學校好差咩，唔該諗真啲。如果消委會時間多得滯，做多一個調查，指英基小一 學費比官校小一學費（免費）高出N倍，可能報紙都覺得係新聞呢！
好似發牢騷咁，餐飲M話不如飲番枝靚酒，佢今年參加「香港餐飲展」，拿出一款 Jaume Serra Cristalino Brut Casa參展，就得到大獎The Best Sparkling Wine of the Show，真巴閉。佢送來一樽half-bottle，擺入雪櫃雪到凍一凍先至飲，果然醒神醒胃，冇得彈！
PermaLink: https://articles.zkiz.com/?id=38039
Next Page
ZKIZ Archives @ 2019