|
||||||
|
馬會公佈2011至2012年度自購馬，同埋2012至2013年度自購新馬中籤馬主名單。名單上財金圈嗰班馬主中，比較矚目嘅，應該算係中信泰富（267）前主席榮智健。 自 從炒燶外滙累計認購期權事件，榮太子低調咗好多。2009至2010年馬季，佢隻「來福」贏頭馬，但榮太子都冇出嚟。但作為馬會前大董，榮太子今次捲土重 來，唔知可唔可以回復當年勇。華華唔算係馬迷，但榮太子旗下嘅良駒好似「活力先生」、「奔騰」咁，都幫榮太子贏到開巷。話時話，唔知榮生會幫隻新馬改咩 名？ 「金手指」孫柏文晉身馬主 同樣榜上有名嘅大馬主，仲有升岡國際（485）嘅劉氏家族，劉錫澳、劉錫海喺自購新馬配額中分別中籤，至於劉錫康就喺自購馬配額中籤。講起劉錫康，大家一定記得佢嘅「靚蝦王」。 喺名單上，華華仲見到個熟悉嘅名字──孫柏文，即係華華以前舊鄰居「金手指」是也。孫柏文話，噚日朝早已經收到馬會SMS通知，第一次申請就抽中做準馬主，佢覺得超幸運，稍後就會同幾個partner去揀馬，心願係搵到一匹良駒，為港爭光促進香港賽馬運動。 話你知：唔係有錢就做到馬主 要成為馬主，首先要成為香港賽馬會會員。入馬會手續同細路入名校唔差得好遠，手續繁複苛刻，仲要有馬會成員推薦，通過遴選先得。 賽馬會員會籍入會費6.8萬蚊，全費會籍入會費40萬蚊，兩者分別係全費會員可以用晒所有會所同馬場設施。 做咗會員之後，仲要喺每年特定時間，向馬會入紙申請來季自購馬（曾經出賽）同自購新馬（未出過賽）許可證。抽籤以閉門形式進行，好彩抽中就成為準馬主，可以請練馬師或者搵人買馬匹。 李華華 |
||||||