|
||||||
|
有去街市買餸的人，一定知道貨品以平見稱的佳寶；在百佳、惠康兩大超市夾擊下，佳寶仍能在十二年內，由一間細鋪擴展至六十五間分店，建立每年營業額逾十億元的小型超市王國。 佳寶的創辦人林曉毅，八○年偷渡來港，住在筲箕灣木屋區做無牌小販，憑着一個「平」字，令他成為凍肉大王，進駐半山千萬豪宅，身家保守估計逾三億元。 紅色為主的裝潢，光猛明亮的店面，表面看來，佳寶和一般街市的凍肉店無甚分別，但入內一看，便發現價格平到匪夷所思。 街市賣十六、七元一磅的雪藏雞翼，它賣二十四元兩磅，每星期可以賣出近三十噸；平常最少賣兩、三元一塊的漢堡扒，在佳寶十元有十二塊，難怪大批電車男在高登討論區分享各種煮法；就連特首曾蔭權去年落區巡視，行過佳寶亦不禁問句：「點解可以咁平？」 林 曉毅表示從不做蝕本生意，只是薄利多銷，「好似呢隻台灣即食麵，我入貨五蚊八毫，計埋成本賣十蚊九毫，我已經覺得利潤唔錯，但人哋賣十四蚊。」他拆解自己 賣得較行家平的原因：「我哋八成貨直接同廠家入，唔經代理。貨到埗後，全部自己做物流分貨落鋪，唔使俾人賺多幾重錢，咪平啲囉。」 跑美食展搵貨源 為了直接向廠家採購平靚正貨品，七、八年前林曉毅已跑到上海、新加坡及泰國等地的美食展搵貨源，「如果淨係靠香港代理入貨，根本無可能做得大，因為人哋俾咩你，你就賣咩，無控制權。」 最初，籍籍無名的佳寶並未獲得廠家青睞，「佢哋完全唔睬你，我喺美食展等廠家，由佢哋開工等到收工，排到最尾，先俾十幾分鐘我講。好似十蚊十二塊嘅巴西Sadia牛肉漢堡扒，暫時香港應該得我有得賣，當初就喺上海美食展等佢十幾個鐘傾返嚟。」 得罪代理商 為 了可以和廠家直接建立關係，他不惜以較幫襯代理更貴的價錢取貨，「開頭俾貴啲唔緊要，最重要係之後可以合作。」但由於他手法獨行獨斷，經常打破行規，故得 罪不少行內人。有代理商說：「大家都係搵飯食，就算係兩大超市都會透過代理攞貨，但佢就唔係，一見啲貨好賣，就自己聯絡廠家。」 林曉毅也直認不諱：「試吓嘛，唔試過點知得唔得。」而且他三不五時要求代理商減價，故部分代理商索性封殺佳寶，不做它生意，但他早已習慣，苦笑說：「好似廚師牌雞肉腸，人哋間間都有得賣，但我哋無。」 惟商場始終利字當頭，而且對代理商而言，佳寶不設上架費及雜費，數期僅一個月，較兩大超市普遍四十五天至兩個月短，因此也有不少人供貨給佳寶，有代理說：「百佳、惠康要收上架費、宣傳費、搬運費等等，所以我哋定價實貴少少，但俾佳寶嘅就係實價。」 對公司的一切，林曉毅瞭如指掌，巡鋪時隨手拿起一條龍脷柳，便開始說：「你睇吓呢條龍脷，一定要有中間骨嘅紋先係靚貨。」轉頭行到凍肉檔，發現價錢牌有誤，即向員工說：「阿姐，你價錢牌插錯呀，呢種係安格斯牛肋條，唔係巴西牛肋條。」 原來每件貨品，他都親自試過才決定採購，例如近年發售的高檔食材越南大頭蝦、熟八爪魚或虎蝦等，都是由他拍板去馬，惟他亦有睇錯之時，新近入貨的皇帝蟹質素 便一般，「開頭唔知呢隻蟹一定要膏多先好，但第一批唔夠膏，第二批就要求隻隻都要有膏。」若不幸入了死貨，「十蚊貨賣三、四蚊，或者連埋其他貨送出去。」 近年大眾對食物安全愈來愈關注，又落實食品標籤，對佳寶的確造成壓力。上週，食物安全中心驗出佳寶的急凍蝦仁含致癌物質，「其實批貨好耐之前，我哋都有抽驗o架，標籤通常供應商負責，之後我哋會再確認。」 燈光擺設有學問 至於店鋪的陳設，亦是由他精心設計，例如即食麵餅乾等乾貨貨架，大多貼牆擺放，留下較寬濶的通道方便行走，近門口位置則擺放新鮮蔬果，皆因這是吸引師奶的招數，「我哋啲菜價錢平通街市，但又乾淨無浸水。」他指師奶覺得菜平，自然會進店內幫襯其他凍肉。 至於店鋪中間位置的幾個凍櫃，亦大有學問，每盞吊燈成本便一千元，「有啲凍肉鋪會搵紅燈射住，令啲肉睇落去顏色較紅潤，但我無咁做，我用嘅吊燈有殺菌作用，所以一隻蚊螆、烏蠅都無，比普通燈貴幾倍。」 他的街市王國幾乎生果、蔬菜或凍肉雜貨樣樣齊，近年部分鋪還有新鮮肉枱，但從不賣新鮮海產；即使是賣魚，也僅售急凍魚。除了因為新鮮食品食用周期短暫，容易變壞外，還另有原因，「我希望可以做到一個小型街市，但地板要乾爽唔會濕，要好整潔。」一改以往街市濕濕??的形象。 年賺過億 憑着一個平字，佳寶自九七年成立至今，規模越來越大。除了在葵涌自置全幢工廈作為寫字樓及貨倉外，一直穩打穩紮，慢慢擴充，但今年卻一口氣開了二十二間分店。林曉毅說：「金融海嘯之後，鋪租平，選擇多，所以趁機開多幾間。」而且經濟不景，愈來愈多人食平價貨，佳寶的同店生意增長達一成。 最近他還趁低息，以約九千萬元自置了牛頭角及天水圍兩個鋪位，令佳寶現時約有一成屬自置鋪位，其餘則在屋邨附近的二、三線地段租鋪，林曉毅說：「買鋪其實亦係同銀行租鋪，例如五千萬嘅鋪，唔計首期，每個月先供幾萬蚊，但租就要十幾萬，加多四次息都有着數。」他表示每年營業額約十五、六億元，行內人估計利潤亦有一成，即賺逾一億元。 林曉毅表示經營佳寶十多年，大部分時間順風順水，「我覺得最影響係禽流感，唔係話啲生意少咗，啲人唔食雞咪食其他嘢，但所有同雞有關的產品都無人買，放晒喺度。」幸好他賣的都是凍肉及雪藏貨，兩年的食用期限未過，禽流感便過去了。 至於對普通人來說的經濟大危機，例如亞洲金融風暴或金融海嘯等，林曉毅更自誇「斗零都無蝕過！」因為他既不炒股亦不炒樓，無投資自然無損失。 而經營之初，他從來沒想過有任何目標：「話有係呃你，邊有諗咁多，淨係打算盡力做，做到就做，一有機會就開分店。」 過去十多年，林曉毅幾乎每天工作十七、八小時，人生最大興趣是巡鋪、搵位開鋪及行超市，「我架車試過四年幾行四十萬公里。」足夠環繞地球十次。就連競爭對手亦讚他：「佢真係好勤力，成間鋪幾千件貨，佢熟到件件可以講得出價錢。」 無牌小販起家 今年他一改事必躬親的作風，從管理冷凍倉庫的上市公司大同集團挖角請來馮華高做總經理，外間指他希望借馮華高執靚盤數後上市，惟他卻否認：「暫時無計劃，上市太多限制。」 但無論如何，如今林曉毅已大富大貴，食飯倒自己米，鍾情吃海魚，現時更有司機開着近百萬元的凌志接送他巡鋪。一家現居於港島半山四千萬元的豪宅，早前其新鋪開張，太太更拎着數萬元的愛馬仕手袋到場。 但二十年前，他不過是住在筲箕灣木屋區的無牌小販，太太則是工廠妹。問林曉毅為什麼成立佳寶，答案是：「無嘢做，無人請。」現年四十七歲的他，學歷只有小學程度，八○年自家鄉潮州游水偷渡來港，是最後一批受惠抵壘政策的偷渡客。 來 港後，他曾在電子廠做工人，但上班三、四個月便被炒魷，他懷疑上司眼紅自己工作效率高，「因為我做得太快，所以佢炒我。」又試過在地盤工作，但怕做死一 世，難有發達，遂在柴灣擺街邊做無牌小販，凌晨到油麻地果欄入貨，最辛苦是常常走鬼：「成日都要走嚟走去，俾人捉到就要罰錢，架車仔又無埋。」 九一年，他決定和街市內一位在凍肉店打工的朋友，夾份開凍肉檔，「兩個人夾埋兩、三萬蚊，頂咗個市政大樓嘅檔口做，後來我想擴充，認為不進則退，可能佢唔想。」 最終二人拆夥，九七年一月一日，林曉毅在筲箕灣開了首間佳寶，專賣平價凍肉，「叫佳寶，意思好直接，希望係街（佳）市嘅一嚿寶。」連公司標誌亦相當簡單，「有間屋，入面有佳寶食品，我係諗如果間間屋都有佳寶食品就好啦。」 能否做到家家戶戶幫襯佳寶，現時仍是未知之數，惟隨着規模與日俱增，倒惹來小部分顧客混水摸魚，「有個客一年換我四支蠔油，每次食到一半就話變質，唔換就搵報紙雜誌投訴，換當然照換俾佢，但最後，我將閉路電視影像俾佢睇，叫佢唔好再嚟。」 不過，最大危機始終是兩大超市開始認真對待，有行內人說：「如果佢低調做間街市凍肉鋪，人哋就隻眼開隻眼閉唔理佢，但佢咁高調，傳聞某大超市已經決定用五十間鋪，開喺佢附近，貼住佢嚟打。」 林曉毅簡歷 年齡47歲 家庭狀況已婚，育有一子一女 80年偷渡來港 80-91年在柴灣臨時街市做無牌小販，賣水果 91年與朋友合資開凍肉檔 97年與友人拆夥，成立佳寶 06年購入葵涌全幢工業大廈，作為貨倉及辦公室 09年一年內開設22間分店，佳寶分店增至65間 林曉毅揸$3.8億物業 |
||||||