【撐老行業】72行狀元多 港漫畫家執筆致敬
1 :
GS(14)@2016-12-06 03:57:02Pen So出名係仔細王，到場記得慢慢睇。
「如果有時光機，我想番去睇睇呢啲舖頭，因為我覺得好有趣，好新奇。」採訪這個有關老行業的畫展時，遇上讀小學六年級的廖敬謙小朋友，佢出動金睛火眼逐幅畫細睇，看出了畫家藏在畫中的巧思，犀利。「依家啲士多好少嘢賣。」小朋友慨嘆的同時是漫畫家Cody Chow擔心的事。舊式士多像雜貨舖，也似兒童樂園，你以為啲細路食緊孖條珍寶珠嗎？係快樂呀，快樂呀。好老土呢，兒時回憶總是土，一定係，無除非。「呢一代小朋友應該唔知道以前士多會有個盤，用膠蛋殼裝住大菜糕放响大冰上面，依家可能仲有，但你要搵都難。」
今次這個名為「七十二行」(Project72)的展覽，頭炮在饒宗頤文化館舉行，十七位本土漫畫家的十八幅作品描繪他們心目中的老行業「狀元」，獻畫的包括白水、米奇、阿傑多、袁家寶、梁光明、梁偉家、畢亦樂等。Cody Chow選擇畫士多，貪佢畫面豐富，又盛載集體回憶。「以前汽水廠會請外國的搖搖王來港表演，士多會公佈時間，成班細路落街話要睇搖搖王，好開心。」他執筆前想做資料搜集，發現連相片都找不到，「既然上網都搵唔到，我覺得有畫的必要。」他另外還畫了米舖，與士多畫作拼合成一幅長畫。「以為啲米舖，有油有酒賣，啲人要帶個壺去買，唔係現成一樽樽的。啲員工用手推車送貨，車上有米、火水、豉油，想搵啲相關圖又係搵唔到，呢啲係我嘅回憶，盡量將我記得嘅畫出來。」畫作細節甚多，七十後肯定有共鳴。至於曹志豪選擇畫的是他踏入漫畫界的起點──後巷理髮店！「第一次認識香港漫畫，就是我細個在後巷剪頭髮嗰時。」對佢來講，嗰度直頭係漫畫圖書館。「係最多漫畫書，又唔使用錢嘅地方，因為阿媽一定肯畀錢。」為咗睇漫畫書可以去到幾盡？就係明明留緊長頭髮都要去剪。「嗰時我比較反叛，喜歡長髮，但又想有得去剪，唯有頭師傅講『你剪一吋就夠啦，我下個月再來』。」畫中有對手拿着漫畫書等剪頭髮的，就是曹志豪。相信佢當年一定寧願慢慢等。畫作細節同樣多到嚇親人的還有Pen So的「賣魚勝」。「每個街市好似總有一個賣魚勝。畫作中的勝記海鮮雖然係虛構，但我諗大家都會有共鳴。細個唔鍾意街市又濕又髒又腥，但大個咗反而覺得有個著水鞋的大叔同你傾偈、賣魚，嗰種感覺好有人情味。去超市，好乾淨企理，反而唔慣。」為求逼真，佢去咗幾個魚檔觀察，發現好多有趣細節。「魚檔有好多好多燈，數都數唔晒，佢哋特登用燈光令啲魚睇落光滑啲、新鮮啲。」七十二行畫展另還有兩次，將招攬插畫師、畫家、美術老師加入創作。有份策展的曹志豪說：「希望藉着這個機會，有系統地整理一下已消失或被遺忘的老行業。他們更計劃訪問行內人士，與畫作結集成書。「想啲畫生命力更強。」七十二行第一季畫展日期：即日至12月10日（周一休館）地點：饒宗頤文化館查詢：Project72 Facebook記者：葉青霞攝影：劉永發
Pen So提到屋企逢喜慶才會買魚吃，所以細個跟媽媽去買魚都因為做冬、過年，去魚檔對他來說是快樂的時光。
曹志豪很喜歡舊式理髮店那張機關多多的椅，畫得很細緻。
曹志豪說自己小時候沒錢買漫畫書，最期待「飛髮」時可以免費睇。
Cody Chow筆下的士多很懂得用盡每吋空間展示貨品，這也是上一輩人的傳統智慧。
Cody Chow繪畫時發現搜集資料、舊相困難重重，覺得更值得畫下來。
「畫得好細緻，好靚。」小朋友認真地逐一細看展出畫作。
梁偉安筆下的三角碼頭苦力工人。
米奇的涼茶舖好繁忙，有很多故事上演中。店舖貓與風扇上的老鼠並存，很幽默。
來源:
http://hk.apple.nextmedia.com/su ... t/20161205/19855196