雖然人民日報啲黨八股非常難頂,但如果阿爺有乜聖旨,都係會經人民日報轉達。做中國生意嘅人,難免要目及目及人民日報。而最近人民幣係咁跌,就更加要睇住人民日報,睇嚇阿爺會唔會出口術救人民幣。
而果然不出所料,阿爺真係喺11月28日,喺人民日報發表文章,叫民眾唔好咁急換外幣住,想穩住人民幣 匯價。只不過,人民日報呢個出口術方法,反而令一眾中環友更加驚。
人民日報叫得人唔好換外幣住,其實係反映咗,最近有傳大陸國有銀行出現搶換外匯現鈔熱潮係堅,唔怪得東鐵線無曬啲人運奶粉同益力多,而係運港紙現鈔入去。大家都知,人民日報叫大家做乜,大家往往倒轉嚟做,咁搞法,人民幣同港紙變番1換1真係指日可待,大家更加唔敢摣人民幣喺手。
所以依家如果仲有人以為有鋪摣手可以發達,中環客建議果個人得閒多啲去上環啲找換店睇睇形勢,零售界點只寒冬,睇嚟冰河時期都嚟緊,更加唔好講啲酒店,以及其他依賴自由行搵食嘅行業。
中環客