| ||||||
|
袁天凡加盟 Ortus，係一件大好事，上世紀八十年代尾，佢做聯交所行政總裁之時，亞洲華爾街稱呼佢為The Prince of Hong Kong Finance，當時仲未夠四十歲。現在呢，就快六十歲咯喎，佢可以退隱享清福，與老友打波，黃昏時候，飲杯馬天尼，坐山頂欣賞維港夕陽，都唔知幾嘆，點 解重要下山到中環再戰呢？ 左丁山識佢多年，知道佢係老驥伏櫪，志在千里，好願意貢獻自己嘅智慧與經驗，為鞏固香港嘅國際基金管理中心地位， 盡一分力，發一分光，不讓歐美基金經理專美。現時亞洲十五大對沖基金之中，據彭博資料，Ortus排行第五。第一名就係葉維義與謝清海嘅Value Partners（惠理），十五大之中，超過一半以香港為基地，可見香港係基金管理嘅理想亞洲總部。袁天凡梗係有意思配合Ortus創辦人Joe Zhou（內地人，華頓學院財務博士），將之擴大到亞洲以至世界性名列前茅嘅，佢自己話My association with Ortus will keep me intellectually engaged with some of the best talents in the investment field。可圈可點嘅係intellectually engaged，袁天凡修讀Rochester大學經濟學博士學位之時，在中文大學做過導師，後來「獲多利」請咗佢，佢就從沙田走入中環，於金融界成名立 萬。左丁山曾經聽佢講過投資方法，將Efficient Market Hypothesis與Capital Asset Pricing相結合，有理論、不脫離現實制約，十分精彩。本以為佢有日退休，返中大教MBA就最好，點知老馬有火，還要與今日金融菁英 intellectually engaged，以左丁山愚見，直情係香港基金管理界之幸。 | ||||||