【棚仔別走】真‧剪布50年
1 :
GS(14)@2015-12-21 07:54:1682歲的東叔，已經在棚仔賣布38年，布檔看似雜亂，但只要客人講出要咩布，東叔都即刻搵得到。
「呢把鉸剪跟咗我50幾年，人手打造o架，o依家無晒喇，唔捨得揼...唔捨得揼...」望着已經生鏽、何正岐出品的鉸剪，82歲東叔憶起做疋頭業逾五十年光景，在汝州街賣布十多年，再搬入棚仔三十八年，至今仍然熱愛這份職業，「敬業樂業做咗幾廿年，我都覺得幾開心，82歲都希望繼續做落去」。記者：鄒倩婷 梁智威攝影：陳家文
呢把何正岐刀莊打造的鉸剪，跟咗東叔50幾年，生晒鏽都唔捨得揼。
東叔爆賣布暗語，「旦底月心」即係12蚊。
咁多年嚟儲落唔少熟客，好似黃生(左)咁，指定要搵東叔買布。
早前政府提出收回位於深水埗俗稱「棚仔」的賣布市場，用作改建200個居屋單位，引來社會很大迴響。在棚仔開檔38年的陳如東（東叔）稱得上是疋頭業老行尊，他指因為收地，忽然間很多人到訪棚仔，更有不少熱心青年為他們發聲，爭取保留這個擁有香港特色文化之地。賣布逾五十年的東叔，憶述五十年代，人人都是買布造衫，自從大陸開放市場後，匹頭業漸漸式微，由批發變零售，至今買布的人每次只買少量，或許只是一碼兩碼，「細細塊嘅賣畀人做短褲，再細嘅賣畀人做公仔衫，再碎嘅做威士，用嚟抹機器」，這些布碎都是東叔從製衣廠回收而來，他笑言自己也是環保一份子。東叔的故事真是「一匹布咁長」，採訪時，他滔滔不絕，非常樂於向記者分享往事。忽然間，他醒起入行時學過的暗語，就主動說要教記者。他戴起眼鏡，在紙上寫了一至十，說「『旦底』即係一，要『旦』字嘅底部，『月心』即係二，要『月』字嘅中心，啲布返貨係幾多錢呢？『旦底月心』即係12蚊買返嚟囉！」
東叔行路籌款助學，每年幫到200至300個山區小朋友有書讀。
出錢出力幫人，但係想保留自己嘅心血，就有心無力。
時裝設計師陳刀成日喺棚仔蒲，積極為保留棚仔發聲。
望着東叔分享，知道他有多熱愛自己的職業，為此故事做旁述的時裝設計師陳刀，正是最欣賞東叔對工作的熱情，以及他對客人的親切感。東叔說過，從來沒有後悔過入這行，無論是順境，還是逆境！「好難頂o架，夏天有成40°C，我咪自己頂高個帳篷透光、透氣，等空氣流通，大家好。」東叔和棚仔密不可分，可說是他第二個家，見證棚仔歷盡每次災難，「打風啲水會打橫撇入嚟，整濕啲布o架，火燭大大小小燒過四次，都係我哋夾錢自己搭返好，政府無理過我哋！」在棚仔，你會找到自食其力的獅子山精神，街坊間交織着的老香港情。走進棚仔，抬頭會發現掛着大大小小的電話號碼，檔主不在，其他檔主不會搶生意，只會叫你：「你打電話啦！」人不在，布照擺，不怕人偷，不怕人搶，因為每個棚仔的一份子，已經建立了一家人的感情，互信互助互愛，「喺第二到搵唔到架喇」，東叔自豪地說。靠賣布，東叔養大四個子女，全部大學畢業；靠賣布，東叔賺到「水腳」行路上廣州，助學二十年。他興奮地說，「我每年幫到200至300個山區小朋友讀書，我唔識字，都唔想下一代唔識字，自己賺多少，幫吓人，幾開心！」為山區小朋友出錢出力，但是想留住一手一腳建立的心血，東叔就有心無力，「唔知政府點諗，或者佢覺得我哋人少，力量少，又話揼幾多億打造本土特色文化，深水埗嘅特色文化產業就喺呢度！」棚仔的每匹布都有一個故事，拼湊成香港人集體回憶的百家布，亦成為設計師的創意秘密基地。過去，香港多個特色文化之地失守，變成今日無農田的菜園村，無囍帖的利東街，下一個會否是無布賣的棚仔？香港人還有多少吋回憶可以被剪斷？
陳刀拍下多位檔主的訪問，紀錄佢哋嘅心路歷程。
又舉辦《別走那麼快》欽州街棚仔藝術展覽。
旁述 陳刀 時裝設計師
畢業於理工大學設計系，大學時期已常去棚仔尋寶，現積極為保留棚仔發聲，並舉辦了《別走那麼快》欽州街棚仔藝術展，與多位設計師以棚仔為主題進行集體創作，向棚仔致敬。《別走那麼快》欽州街棚仔藝術展日期：即日至2016年1月31日(星期日)地點：尖沙咀誠品生活館
來源:
http://hk.apple.nextmedia.com/news/art/20151219/19418528