2011-4-29 AD
伯明翰環球（2309）主席卡臣楊家誠，自從晉身做首位華人英超班主後，最近連辦公室都要「升呢」，由上環信德中心，搬去九龍站上蓋全港最高嘅ICC（環球貿易廣場）。華華收到風，佢老哥訓示班員工，要日日着老西同套裝裙返工，搞到啲馬仔鬼殺咁嘈。
華 華問卡臣搞邊科，佢笑笑口話：「大家要做好image，緊係要執到正，表現自己，唔係使乜去ICC！」據講伯明翰會喺下個禮拜正式喬遷，到時新 office起碼過萬呎。相比信德中心呎租家陣做緊40蚊左右，ICC呎租起碼50至60蚊，咁先襯得起前後用10億港紙買返嚟嘅老牌英超球隊嘛。
升呢租ICC 要員工着套裝
不過江湖傳聞，伯明翰自從由卡臣接手後，近日要步同係卡臣旗下嘅《成報》後塵──遲出糧。華華問佢因乜俾人唱，卡臣反應好大話：「黐線，緊係冇遲過！」至於伯明翰喬遷後會點大搞？佢就賣關子，話睇埋今季表現，斷估隊波今屆唔會點大輸。