內地粉絲紅館力撐軒仔菀之：呢個騷有血有汗
1 :
GS(14)@2017-02-18 00:51:26張敬軒與王菀之（Ivana）「合體」舉行一連4場的紅館騷昨晚頭場開鑼，黃偉文、Ivana老公Eric So、蔡一智夫婦、蔡一傑等前來捧場。軒仔一頭紅髮，以白閃片西裝及黑褲打扮，與黑色閃片girdle騷腿、烏蠅眼黑帽造型的Ivana出場，二人合唱《開籠雀》、《相對論》、《柳暗花明》等多首歌，當中軒仔跳舞時差點掃低Ivana的帽。到二人唱蔣志光與韋綺珊經典歌曲《相逢何必曾相識》時，更全場歡呼，Ivana笑言：「一個opening用晒自己一年脫苦海存貨。」軒仔笑說：「咁辛苦為乜，今次呢個騷有血有汗。」
■軒仔與Ivana以黑白配服裝造型拖着手出場。
■未開場，已有近200粉絲排隊買紀念品。
■Eric So一早入場支持老婆Ivana。
「雷達監視老公」
軒仔更笑Ivana的黑帽似浴帽：「係雷達監視老公。」之後，Ivana落台，軒仔笑言：「過咗新十五，同佢開騷似初三咁，每次嗌交都嗌唔贏。」早前，軒仔傳被內地封殺，「被退出」內地節目《歌手》，昨晚有不少內地粉絲來港撐他，當中有來自深圳的蕭小姐在臉上畫上「軒」字，她買足四場飛來睇軒仔，表示覺得他好善良，自《歌》後更一直留意網上留言，覺得對他不公平。問到會否擔心軒仔以後冇得返內地開騷？她表示：「有擔心過，相信事件會解決，相信內地唔會咁。」另一來自美國的張先生就叫軒仔做自己。在場外，開騷前已有200位粉絲排隊買紀念品，當中有Eric So為兩人設計的訂做肖像figure，亦有印上「陪你對抗種種對手」的螢光帶，為軒仔打氣。採訪：馬建華攝影：沈健程
來源:
http://hk.apple.nextmedia.com/entertainment/art/20170217/19930494