ZKIZ Archives


鄭俊弘《與諜同謀》結局孭重飛撈家慘變二打六

1 : GS(14)@2017-04-10 23:36:02

羅嘉良(撈家)貴為三屆視帝,重返大台拍劇,理所當然應該都係重點人物……你以為啦,《與諜同謀》前晚大結局,撈家fans應該都幾失望喇,因為套劇真正嘅男主角,係日前認咗講大話、同何雁詩拍拖嘅鄭俊弘……不過事件變得好快,前日有報道話大台不滿鄭俊弘抗旨,準備將佢送入雪櫃。鄭俊弘喺(可能係佢最後一套劇嘅)《與諜同謀》中,佔咗大結局最多戲份,而撈家呢?只係得一開始以幻影身份出嚟讀道歉信同鄭俊弘和解,之後就只得一幕戲交代佢放低所有心事,安心離世嘅場面。至於撈家助手歐瑞偉,就兩次都陪住一齊出現。講番鄭俊弘,前晚佢原諒咗撈家之後,幫歐瑞偉同黃心美揭穿一班大老闆嘅陰謀,守住美世代公司資產,由奸人變番好人,一套劇正反角色都做齊,睇得出大台原本真係俾足機會佢。有網民話套劇好睇因為有撈家,只係為咗撈家先開電視,仲挑通眼眉指大台叫撈家返嚟,只係想幫啲新人上位。講真,呢套劇新人一大堆,湯洛雯、賴慰玲、黃心穎、李佳芯,唔少得仲有大台想力捧嘅鄭俊弘。不過就算有撈家喺側邊傍住,鄭俊弘演技都係唔多掂,網民就咁評論,好聽啲就係話佢「唱歌好過做戲」,難聽少少就係話佢「演技虐待緊觀眾」。有人仲戥撈家唔抵,話難得撈家返大台拍劇,唔明點解搵呢啲對手俾佢,仲話劇情沉悶冇得發揮,浪費咗一次機會。




來源: http://hk.apple.nextmedia.com/entertainment/art/20170410/19985882
鄭俊 俊弘 與諜 同謀 結局 重飛 飛撈 撈家 慘變 二打 打六
PermaLink: https://articles.zkiz.com/?id=329964


ZKIZ Archives @ 2019