ZKIZ Archives


很久以前,她也曾經和我捱過麥記。 人在中環

http://manincentral.blogspot.hk/2013/10/blog-post_31.html
午飯時間,我經過同事既座位,幾個女同事圍住電腦,響度睇緊近期熱爆既《男人一生,只為尋覓一個肯同自己挨麥記嘅女人》果條youtube片。

「老細,有冇睇過?」其中一位同事問我。

「睇咗啦。」我答:「都幾寫實丫。」

「你地啲男人,總係要誤會我地。」女同事說:「喺香港,其實肯同男朋友一齊挨麥記既女仔,有好多的。」

我敷衍地點了點頭。事實上,我冇反對同事既講法的。我都認識唔少肯同男友/老公一齊挨既好女仔。只不過,那個曾經同你一齊挨過麥記既女孩子,你最終有冇福氣娶到佢返去做老婆,又係另一回事。緣份呢家嘢,有時好似鬼掩眼咁,唔到你控制的。

「男人總係以為我地貪錢,但實情係,我地都唔介意同你挨,但底線係,個男既要有上進心至得!你唔掂果陣陪你挨麥記,我地真係冇所謂的。但係如果個男仔,只懂得安於現狀,甘心一世都只係食麥記既話,你叫啲女仔點忍?」

我又點了點頭,點得比上一次…更敷衍。

男人怨女朋友貪錢,女人怨男朋友唔上進。

真的嗎?

*****

我想起了阿偉同Stacy。

阿偉係好多年前既一個舊同事。當年佢同我一樣,係個長期唔到數既潦倒sales。Stacy則係公司裡面既marketing officer。我入職既時候,阿偉同Stacy就以經拍緊拖了。

阿偉屋企環境唔好,細佬妹全部未出身要佢幫手養。每個月佢份糧,都交咗一大截俾屋企人。有時冇生意咬老底既日子,份糧交完俾屋企之後,佢真係搵個銀刮痧都冇。一場同事兼朋友,我有時都會接濟佢一餐半餐。我份糧查實都唔係多架啦果陣,不過我比佢幸運一啲,屋企負擔冇佢咁重。偶然請佢一餐茶記,還是應付得嚟的。

Stacy屋企既環境,其實都唔係特別鬆動,不過我估,比阿偉好一點點吧。佢地兩個拍拖,其實日子都唔易過,但Stacy份人我覺得幾唔錯的。阿偉擺明係窮,但Stacy都冇介意過。我仲記Stacy曾經講過:「阿偉係窮,但係我都唔見得係咩有錢人吖,咁我憑乜嘢介意呢?」

如果男人既一生,就係要尋覓一個肯同自己一齊挨麥記既女人,咁我能肯定地講,Stacy絕對配得上果三個字:娶得過。當年我親眼見證過,佢地一齊挨過N咁多餐老麥同茶餐廳,我亦從未聽過Stacy怨過一句。假如果陣我唔係已經有個穩定既女朋友,又如果Stacy果陣冇同阿偉拍拖,講唔埋我都或者會試吓追Stacy都唔定。

阿偉同我作為「同事」既緣份,大約只係維持咗年幾。果陣市道好差,我地呢班做Sales既,幾乎完全搵唔到食,同事走下一個,走下又一個。我自己都係響果個時候,把心一橫離開左打工仔既行列,決定創業的。至於阿偉呢,卻反其道而行。儘管生意淡薄,齋咬老底既月份一個接住一個,阿偉卻沒有半點離開既念頭。Stacy看在眼裡,總覺得阿偉安於現狀,每日總係響公司胡胡混混,每逢月尾交數既日子,佢總係徘徊於「被炒」既邊緣。就係果時開始,阿偉同Stacy既關係,就開始起變化了。

「我真係唔介意阿偉窮的。」Stacy有一次同我講:「但係如果佢連上進心都冇咗,我就真係冇辦法接受了。」

那段時間,阿偉面對嚴峻既市況,所表現出來既「唔嗲唔吊」,真的讓Stacy急壞了。Stacy認為阿偉應該為轉工做多點準備,也應該好好裝備自己。當年嘛,打工仔好興去「進修」的。環境唔好,失業率升到去新高,打工仔都以為,讀多個咩證書咩課程都好,總會對保住飯碗又或者搵工跳糟有一丁點的幫助,於是人人都一窩峰般走去讀乜讀物。Stacy正正係呢班人既其中既一員,白天返工,晚上佢就去進修,都挺辛苦的。至於阿偉呢?與Stacy相比,簡直係天同地。因為生意唔好,靠咬老底為生既阿偉,份糧已經唔多夠洗,但果陣佢仲幾乎晚晚跟班上咗岸既同事,去飲酒呀、卡啦OK呀,成日玩到半夜三更,洗錢洗到身無分文,信用咭仲要碌爆晒。Stacy覺得,阿偉已經再唔係佢當初所認識,果個有抱負,有上進心既年輕人。挨窮,Stacy唔怕,只要阿偉仍然會上進,Stacy係肯陪佢挨的…但世事總係事以願違。

*****

今天既阿偉,係行業裡面,其中一間跨國機構既香港區總經理,每個月賺著六位數字的薪酬。麥記和茶餐廳,我估佢有好一段日子冇「挨」過了。

「CK,當年你其實信我的,Right?」那天我約咗阿偉飲茶,講起當年佢那段夜夜笙歌既日子。

「朋友,我信。」我認真地點了點頭:「我都有同Stacy講過,不過佢就係唔相信。女人要安全感,要實在,好難怪佢的。」

當年阿偉曾經同我講過。以佢果條爛到無可再爛既數,肯定會俾人炒的。以果陣咁既環境,俾人炒咗,怕且短期內都唔會搵得到第二份工。外面環境咁差,幾努力都唔會一下子扭轉到形勢,但係佢好清楚,佢必定必定唔可以冇咗份工,不然的話屋企啲細佬妹唔知點算。佢望住果個形勢,認為最能夠讓佢可以保住飯碗既方法,就只有埋果班top sales同上司既堆。我認識既阿偉,肯定唔係一個喜歡social既人,但當逼到埋身既時候,為咗「生存」,你總會發揮出意想不到既潛能。

「有一、兩次,都係響酒吧度同佢地講掂數,叫果個top sales射一張半張單俾我過關,我先唔洗炒咋。」阿偉說。

阿偉既呢段「往事」,當年我一早就知道了。問題係,佢身邊既人,到底信抑或唔信?Stacy每晚返學,阿偉每晚蒲吧。阿偉對Stacy講既理由,也許落差實在太大,所以Stacy冇辦法說服自己去相信。

我倒係好佩服阿偉的。為咗飯碗,我覺得佢其實係去得蠻盡的。男人同女人,對前途,對工作既睇法,好多時都總係南轅北轍。Stacy認為,努力嘅意思係不斷的做做做,不斷的自我增值,再加不斷咁搵工再搵工。阿偉既想法係,飯碗必須先保住,佢選擇去努力既地方,係人脈同關係。佢並冇放棄佢既上進心,只係響度咬緊牙關等待機會。這樣有沒有錯?觀乎今天阿偉爬到現在既位置,當日既選擇當然係冇錯。事後孔明係人都識做,但當局者迷,作為女朋友,眼前既畫面再加上身邊一眾八婆既疏擺,信心的確係好容易動搖的。

*****

阿偉保住咗份工之後,及後經濟環境轉好,佢就搵機會轉工了。自此之後,佢既事業就慢慢地好起來了。跟Stacy分手之後,阿偉也拍過好幾次拖。四年前,認識了現在這個老婆,生了個趣緻既小孩子。也許係我偏見吧,但我總覺得,這個「現任」老婆跟阿偉搭上既時候,阿偉已經算係飛黃騰達了,感情亦沒有當年在挨窮的時候那樣真摯。當年Stacy,是個會肯和阿偉一起挨麥記和茶餐廳的女朋友,「現任」老婆呢?聽阿偉講卻是個購物狂,她的手袋怕且要租好幾個迷理倉去放先夠。

阿偉份人,其實挺慳家的。跟購物狂太太,結婚後自然有很大的磨擦。結果呢?他們現在也分居了。

自從阿偉跟Stacy分手後,我就沒再見過她了。直至半年前,阿偉的爸爸過身了。因為阿偉跟太太分居了,靈堂之上,主人家就只坐著阿偉和他的小兒子。

老人家既正牌「媳婦」在喪禮上倒沒有出現,但靈堂的另一方,我卻找到了Stacy。

「以前世伯對我好好。知道佢走咗,還是覺得應該要來鞠個躬的。」Stacy說。

「咁耐冇見,最近幾好嘛?」我問。

「還是一樣啦,都仲未有人肯娶我囉。」Stacy苦笑:「我聽講你生咗兩個啦喎…」

我又一貫敷衍地點了點頭,心裡忽然閃過一個念頭:Stacy仲未嫁,阿偉又失婚,一對曾經一齊挨過麥記既人,會唔會走得返埋一齊?

祝好運。
很久 以前 她也 曾經 和我 我捱 捱過 過麥 麥記 人在 中環
PermaLink: https://articles.zkiz.com/?id=80233

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019