ZKIZ Archives


【光棍慎入】求婚唔送鑽戒送乜好? 霸氣港女:一張冇銀碼嘅支票啦

1 : GS(14)@2016-11-12 05:55:06

一講求婚,冧到呀



今時今日,做光棍又煩拍拖又煩,做老襯就煩上加煩,至少求婚嗰吓已經要使一大筆錢─無錯,就係鑽石戒指喇!於是我哋就追訪一眾港男港女,了解佢哋點睇一粒求婚鑽戒嘅意義,睇吓有冇其他物件可以代替鑽戒;同時我哋亦都搵嚟理工大學講師兼前廣告創作總監曾錦程,解構吓求婚=鑽戒嘅傳統到底係點樣出現。記者:余傲芝 攝影:Neo



前廣告創作總監曾錦程為我哋解構求婚=鑽戒嘅傳統點嚟

「鑽石恆久遠,一顆永留存」,就係呢句口號令到鑽石擁有非凡意義

Fiona認為鑽戒冇咩意義,都係用嚟炫耀居多

喺27名受訪者入面,9成人都認為求婚時需要一隻戒指,而指定鑽石戒指亦有6成人,其他就覺得銀戒指或自製戒指亦可接受。至於鑽石戒指嘅意義,大家嘅睇法不一,大概可以分為「有誠意同重視嘅表現」、「係承諾同永恆嘅意思」、「用嚟晒命或比較」、「人做我做」等等。有過半數人認為可以搵其他物件代替鑽戒,去旅行送支票送公仔等都榜上有名,不過亦有少數人認為要跟隨傳統,無論如何都要鑽戒。



李小姐話用汽水拉環求婚都幾浪漫,有時候唔一定要啲咩物件

李生認為求婚用鑽戒可免則免,因為求完婚隻戒指又冇咩用

曾錦程指出,求婚用鑽石戒指呢個傳統好大程度上係因為戴比爾斯(De beers)喺1947年推出嘅一系列廣告企劃,尤其係「鑽石恆久遠,一顆永留存」(A diamond is forever)呢個口號,令到原本毫無價值嘅炭變成擁有非凡意義嘅鑽石。當時戴比爾斯喺非洲有個好大嘅鑽石礦,而由於供應多會令到價格降低,所以佢哋就諗到將鑽石同愛情扣連,加一個好強嘅無形價值落去。不過曾錦程認為廣告嘅成功係「因為呢個社會好多嘢好脆弱,愛情亦一樣,所以鑽石『永恆』嘅象徵意義補救現代人嘅心靈空缺,所以係人本身有問題,再被營銷商利用人類弱點。」


鍾生話都係嗰句:首先要有女朋友啦

楊小姐認為冇嘢可取代求婚戒指,比佢一個信心去嫁比佢



來源: http://hk.apple.nextmedia.com/entertainment/art/20161112/19830913
光棍 慎入 求婚 唔送 鑽戒 送乜 乜好 霸氣 港女 一張 張冇 冇銀 銀碼 碼嘅 支票
PermaLink: https://articles.zkiz.com/?id=315241

【拜年送乜好】籐織懷舊福籃 有得食又有得玩

1 : GS(14)@2017-01-22 02:18:03

新年到,總唔可以兩手空空去拜年,點都要買啲禮物見人。想得體有心思,但又唔想年年買曲奇、朱古力咁悶?今年你有新選擇!



長沙灣美樂士多重現7、80年代士多模樣,加上各式懷舊小食同玩具,喺網上開始多人留意。老闆趁新年推出賀年福籃,有得食又有得玩,要大家過個充滿童年回憶嘅肥年。福籃用籐編織,外面貼上用牛皮紙印製嘅士多宣傳招紙,籃蓋上更有一張「福到」揮春,外形真係有啲似細個阿媽個買餸籃啊!記者一打開福籃,在場同事見到裏面嘅糖果都表現非常興奮。糖果共九款:史密夫蜜瓜味軟糖、史密夫鳥結糖、白兔糖、蜜蜂糖、瑞士糖、甄誠記椰子糖、本地手工水果糖、金幣朱古力,以及紅瓜子。其中蜜瓜味軟糖最令記者驚喜:「竟然食得返,仍然係清甜好咬口!」如果大家怕麻煩,可以考慮買個福籃就填滿一個全盒。不過假如你唔鍾意甜食,呢個福籃只得一包紅瓜子,可能未必夠過口癮喇。福籃附送老闆設計嘅「美樂賀年棋」,大家拜年之餘仲可以玩餐飽。賀年棋嘅棋子同骰仔都係木製,摸上手幾有質感,真係有小時候康樂棋嘅味道。話明係為新年而設,棋盤設計就以粉紅色配粉紫色為主,裏內不乏賀年圖畫,例如煙花、炮竹、小朋友舞獅同家人團圓嘅畫面,而且畫風一樣充滿懷舊味道。玩過康樂棋都知道,行到某幾格就會有懲罰,呢副棋都一樣有!不過新年最緊要開心,懲罰最多都係「為親友表演一次」或「打電話向朋友拜年」,無傷大雅以和為貴,一家大細都玩得。要注意嘅係,棋子同骰仔都太細粒,家中有小朋友就要小心,避免小朋友不慎吞落肚。老闆Patrick講笑話,「希望大家拜年時,有個新嘅小玩意,但又不失傳統風味。」新年送禮定自用,抑或想同家人、朋友歡聚,今年就多一個既傳統又新穎嘅選擇。福籃$98一套(附送「美樂賀年棋」),詳情可到美樂士多facebook查詢。記者:黃凱婷攝影:黃子偉2017果籽繼續認真知味。識買惜用。行以求知。好事多為。重修舊好。緊貼果籽報道,即like:http://fb.me/AS.AppleDaily


士多重現7、80年代士多模樣,仲有各式懷舊小食同玩具。

福籃用籐編織,外面貼上用牛皮紙印製嘅宣傳招紙,真係有啲似細個阿媽個買餸籃啊!

各款賀年食品,記者最驚喜嘅,係竟然食得返史密夫蜜瓜味軟糖,仍然係清甜好咬口!


「美樂賀年棋」,新年最緊要開心,懲罰最多都係「為親友表演一次」或「打電話向朋友拜年」,無傷大雅以和為貴,一家大細都玩得。要注意嘅係,棋子同骰仔都太細粒,家中有小朋友就要小心,避免小朋友不慎吞落肚。



來源: http://hk.apple.nextmedia.com/su ... t/20170121/19903826
拜年 送乜 乜好 籐織 懷舊 福籃 有得 得食 食又 又有 得玩
PermaLink: https://articles.zkiz.com/?id=323593


ZKIZ Archives @ 2019