ZKIZ Archives


三萬蚊租長實爛豪宅

2013-11-07  NM
 
 

 

本刊曾報導長實旗下服務式住宅設備舊管理差,再有讀者投訴以月租近三萬元租住長實名下豪宅,單位卻甩皮甩骨,半年來不斷投訴仍遭冷待,大呻被搵笨!

石小姐一家經地產代理介紹,今年一月起以月租二萬八千多元,租用大埔豪宅鹿茵山莊近一千四百呎單位,業主「德永發展有限公司」屬樓盤發展商長實旗下,租期一年。石指入住僅兩個月已知「中伏」,直言「一打風落雨就狂入水!」石曾致電長實租務部投訴,幾經交涉始有人跟進:「但佢哋求其即嚇膠就算,整完又繼續漏!」

屋漏更兼逢夜雨,冷氣機、廚房燈及主、客廁馬桶水箱此時相繼失靈:「部冷氣發霉又時熱時凍,我個女病咗五次!長實次次都叫人上嚟望嚇,但唔整唔換!最離譜係叫佢整個廁所,佢竟然話要招標先!」石堅持要長實跟進,職員卻大耍太極兼拒覆電話,石惟有「出絕招」停交租以逼長實回應,結果迅速收到長實律師信:「做嘢又無咁快,追數就最有效率!」

跟進設施舊更換慢

記者到訪上述單位,發現窗邊防水膠老化兼有多個洞未修補;廚房燈及主、客廁馬桶水箱仍無法運作,冷氣機款式則更陳舊發黃。及後長實安排的外判工人上門檢查,明言冷氣機運作多年機件已「到期」,但無法即時更換:「公司程序係咁,我檢查完寫報告講明你部機夠期要換,公司都會要你洗機先,洗完唔得先會換。」除服務式住宅外,長實住宅租盤不多,據知只有鹿茵山莊,及早年長實收購失敗的九龍塘和域臺等零星單位。曾任長實外判的工程人員稱,長實拖客屢見不鮮:「好多(設備)都係由入夥用到而家,和域臺部冷氣仲老過我都唔換,就算個客出盡力投訴都要半個月先換。長實拖到完約都唔換有咩咁奇?下手租客投訴,咪又拖囉!」

回應死不認錯

本刊將投訴轉介至長實,長實拒認拖延維修,指窗框滲水問題八月始出現,「現正處理」;又指廁所水箱與冷氣機問題同樣是「個多星期前接到通知」,指「已加快處理」前者,但拒回應工程是否須招標及會於何時完成,後者則會於月內處理,廚房燈則早已維修。惟記者上週到訪單位,廚房燈仍壞,而根據事主提供的錄音,長實代表承認維修單位「已拖咗半年」,亦私下向石小姐退回她逾期交租的行政費及利息等款項以表誠意。(陳凱敏)

壹判官

月租三萬蚊嘅豪宅,單位同管理質素都咁差,同長實租樓認真要諗過!劣劣劣(五個劣為最嚴重)

 
三萬 蚊租 長實 豪宅
PermaLink: https://articles.zkiz.com/?id=80965

前海有錢派1千蚊租樓2百萬津貼

2016-11-03  NM

國家主席習近平發很多「中國夢」。其中一個,是大搞代表「改革開放」的深圳前海。不過眾所周知,前海開荒六年,發展依然龜速。結果一雙有形之手,伸落香港 搶客。近月前海掟出銀彈攻勢,「利誘」香港後生仔北上創業。不單針對香港樓瘋,提出只要千多元人仔,就可租住前海五百呎單位;更提供高達二百萬元人仔津貼,幾乎只要出示香港身份證就可以成功申請。由於主力硬撬香港初創公司,與補貼不多的大埔科學園正面對撼,不少IT人已申請北上。創科局局長楊偉雄亦配合「國策」,轉而大力推廣前海,立法會議員莫乃光炮轟:「冇見過有政府會叫人去第二度發展,Donald Trump(特朗普)都唔會啦,簡直匪夷所思。」

前海要發展,阿爺身邊的「牛鬼蛇神」通通現形。多個「大孖沙」如誠哥、四叔,都沒在前海有大型投資。最俾面的,當然是689隔籬的「梁粉」鄭家純。上年中前海搞「港貨城」招標,結果周大福(1929)順利投得,投資額三億多元人民幣,於去年十二月火速開業。不過,本刊到這個「港貨城」視察,發現不少商鋪都「拍烏蠅」,雖然有莎莎、美心及余仁生等二十多間香港品牌進駐,但佔地二十萬平方呎的商場,眼見顧客不足三十人!美食廣場人流十分稀少,附近商鋪員工都在休息,不少廚師在「呆企」,廚藝無用武之地,就在大門口的麥當勞亦幾乎零顧客。在深圳居住的楊小姐,第一次與友人來光顧這「港貨中心」,她直指未必再來:「東西又貴、又不齊全,這次都是跟朋友來,下次都不會考慮!」

前海變錢海

找港企發展前海,簡單來說,就是搵香港人做開荒牛。上年在香港科學園、創立「家務幫」app的吳宇森(Sam),獲新加坡商人投資一百萬元坡幣(約557萬港元)入股,算是近年成功的港產Apps之一。近月Sam不斷收到電郵,邀請參加前海講座,令他心郁郁:「有啲係交流會,有啲係招商活動。我都覺得香港做極都係得七百萬人,上到嚟多啲機會,未嘗唔係一件好事。」其後他到前海參觀,一開始尋找天使基金資料,已發現種類比香港多:「有好多option都可以搵到,資料比較易拎到。」最吸引他北上的原因,莫過於一個「錢」字:「喺香港科學園,下下都要填form申請,但前海就係一筆過俾,簡單好多!」前海的銀彈攻勢,包括:最高二百萬元人仔津貼,另有三厘低息貸款、上限二百萬;十二個月office免租金,兼且提供五百呎獨立房間;前海又經常舉行創業大賽,獎金達到一百二十萬港元;而最正是,附近屋苑「龍海家園」有七百七十多個單位留給香港人租住,由三百五十呎至五百呎不等,月租只是千一元;不單平過香港多多聲,亦一樣平過深圳其他私樓!

「政府逼港人離開」

相較之下,香港科學園可謂相形見絀:資助最盡三十萬、無住屋津貼、知名度最高的比賽ICT Award,不設獎金。Sam坦言:「我諗邊一間公司都好,最缺乏嘅都係錢。就好似我加入科學園嘅計劃,資助限額只有三十萬元,每一次都要準備晒資料等佢批,起碼兩、三個月先拎到。每個星期起碼用一日嚟搞呢啲admin嘢,係好麻煩!」他的拍檔Gary愈說愈勞氣:「講真一年得三十萬請得咩人?當請個有經驗嘅,一個月要兩萬,兩年都要四十八萬啦,一請人已經無晒!」他續指:「香港聽落好似好多資助,但好似工貿署個發展支援基金,話就話三至四個月審批,但最少九個月先有結果,同埋做醫療研究嘅優先。講真研究到點醫寨卡病毒,都唔使貪你嗰少少錢!」Sam坦言完成科學園十八個月培育計劃,「claim」足三十萬後,就立即遷出,決定北上:「之後租科學園office已無特別優惠,租金同出面差唔多。大埔又唔係特別近市區,所以搬出嚟好過。」

服務人員瞓緊覺

不過,為「錢」北上開荒,收成有排等。記者由深圳灣口岸出發,打算乘搭來往前海夢工場的穿梭巴士,發現早上只有兩班車出發,錯過了就要自行搭的士,頗為不便。到達夢工場,人流不算多,園區建築物平均只有三層,多用作手機應用程式開發,但只有一半房間有員工上班。到了午膳時間,只有約二十名員工出外用膳,連7-ELEVEN便利店亦未見有人出入。由前海當局設立的資訊中心,等到二時,才有一名園區職員上班;行上前詢問有關港人創業的資訊,他竟答:「上網都有了,自己去看吧。」而在櫃枱後的辦公室,隱約看見有員工在午睡。夢工場旁有一處銀行區,港人熟悉的恒生、中信銀行都找得到,但一樣是──無人。

「發展比想像慢好多」

在香港開餐廳的Wing,就因為業主的超平租金吸引,上年與三位友人投資過百萬元人民幣,在前海夢工場旁開設西餐廳。她不諱言:「速度係比想像慢好多。」翻開餐廳的菜牌,午市套餐平均要五十多元,單碟更要七、八十元人民幣,價錢與香港相若。她指客人消費能力不低,但人流卻是一大問題,餐廳提供150個座位,但從未坐滿過,Wing指:「呢邊食飯時間係兩個鐘,所以係鬆動啲。同埋呢邊嘅人見到要等就會走。」除了人流外,Wing還要遷就客人口味:「呢度好多四川人,佢哋鍾意食辣,我哋要調校番。同埋佢哋始終都鍾意用筷子食飯,覺得食西餐好滯,一個禮拜食三餐已經好俾面!」她直言在港一天的營業額,在這裡要做三至四天才能做到。

轟政府無視問題

現時Wing的餐廳每個月都蝕錢,她仍信前景比在香港好,但未解決的困難仍然不少:「呢度發展真係好慢!無論係新進駐嘅餐廳,或者客增長都好慢!去到夜晚都係得十枱八枱客,到八點後基本上已經無人!」她指這區很難做到區外客,現時惟有寄望長遠發展:「翻本期一定長咗,(驚唔驚回唔到本?)都無得驚,唔做都做咗!」近月創新科技局局長楊偉雄不斷推廣前海,上週五又有前海深港創新中心來港招商,馬不停蹄。立法會資訊科技界議員莫乃光直指:「本地政策一定係鼓勵啲人留在本地發展,好似特朗普、希拉莉咁,點會同你講,你要去加拿大發展,嗰度好好,簡直係匪夷所思。」他補充,過往政府對初創企業,都是「俾嚿錢養肥佢,養肥咗就叫佢去第二度發展」,缺乏高瞻遠矚:「係咪應該增撥資源去做市場推廣、購買多啲本地公司產品同服務?唔係下下谷大公司,大公司又將產品外判俾細公司,剝削細公司盈利。」IT界人普遍指,創科局對本地創業資金及人力支援不足,本刊曾就此向局方查詢。創科局以書面回應指,「自成立以來,香港的創科生態系統已得到明顯的改善」,並細數過往香港創科的成績,未有直接回應問題。

撰文:梁延宇攝影:關永浩ed_bn@nextdigital.com.hk

前海 有錢 千蚊 蚊租 租樓 百萬 津貼
PermaLink: https://articles.zkiz.com/?id=222304

自成一格:3.2蚊租架BMW去媾女!

1 : GS(14)@2016-11-18 17:22:14

美國西岸最大的車展LA Auto Show今個禮拜開始,越野兔有幸可以搶先入去睇新車,雖然各大品牌有成20架新車發佈,但越野兔覺得,最正的是寶馬(BMW)ReachNow計劃。
Reach Now是寶馬將旗下3系車款,以及Mini Cooper周圍泊供大眾租用,只要利用手機應用程式預約,30分鐘內前往取車即可,現時收費為駕駛時每分鐘41美仙(3.2港元),停車時收費為30美仙(2.3港元)一分鐘,不同地區有不同收費。咁樣計咪好鬼貴?其實仲有收費上限,3個鐘最多收50美元,12個鐘最多收80美元,24個鐘收110美元。最方便的是,唔使去到租車點還車,何時何地都可租車還車,而且價格已包含保險及油費等瑣碎費用。現時在美國紐約布魯克林區(Brooklyn)、奧勒岡州的波特蘭(Portland)及華盛頓州的西雅圖(Seattle)試行。其實在歐美地區,汽車共享概念已經玩咗好耐,最先由Benz的姐妹公司car2go於2008年開始,為了迎戰ReachNow價錢就減咗少少,最近仲進軍內地重慶,只不過越野兔就唔太鍾意,因為個車款係好鬼肉酸嘅smart car,你話租嚟溝女嘅話情何以堪呢……其實BMW早於2011年搞汽車共享DriveNow,無奈地在三藩市因法例問題而搞唔成;到今年4月全新的ReachNow才在西雅圖啟行,但話咁快就發展到3個城市,搞咁耐BMW都要搞呢個汽車共享,睇好未來呢個市場發展潛力,未來越來越多汽車品牌出嚟爭,到時仲邊使個個月供車保險牌費油錢丫,一時揸吓BMW,一時揸吓mini cooper,日日換晝都得丫!越野兔
https://www.facebook.com/Sailorrabbit/本欄逢周五刊出




來源: http://hk.apple.nextmedia.com/financeestate/art/20161118/19837198
自成一格 自成 一格 3.2 蚊租 租架 BMW 去媾 媾女
PermaLink: https://articles.zkiz.com/?id=316075

一萬蚊租樓要求「入屋十件事」!樓主離地定樓市離地?

1 : GS(14)@2017-06-18 21:42:12

安居樂業邊個唔想,不過樓價逼人,租屋幫人供樓都係等閒事。不過,可唔可以合理價錢,有間企理小小嘅樓呢?最近就有網民啖facebook出po幫朋友搵租(佢朋友係咪佢就唔知喇),列出十大要求,要市區樓又租金最多萬一,又趕住兩日要搬到,感覺諸多要求,但睇真啲其實都幾令人唏噓。首先睇吓搵樓嘅係咩人先:一對父女,兩個收入穩定,不過就講明「不要要行一層先搭lip(?)的」,因為阿爸要靠拐杖行動。睇吓,阿爸即使行動不便,仍然努力做嘢,收入穩定,呢啲咪係香港人打不死嗰種精神囉。而佢哋想搵個10,000蚊樓下嘅標準兩房單位。雖然唔知佢哋收入幾多,當佢兩個份人工大概係香港入息中位數,即係15,000蚊左右,兩個人加埋就30,000蚊,其實都佔咗佢哋3分1收入喇。再睇多啲要求先,譬如要有廚房、廁所,嘩,呢啲係咩要求嚟?聽完好似去咗非洲咁,連乾淨食水呀、食物呀都係「非份之想」,要特別講到明架!佢哋仲要求廚廁唔可以太污糟,咁有女仔住,呢啲要求算正常;不過如果你話用10,000蚊租間樓,係冇資格有個乾淨嘅廁所,喺生活重擔中有個小小嘅空間refresh吓,咁都無咩好講,人人價值觀唔同嘅。然後地點呢?佢列出嘅地點主要係旺角附近嘅地鐵沿線,同紅磡大角咀,亦話其他九龍市區都會考慮。呢個要求配搭廚廁唔好太污糟,就真係絕配,睇返幾個流行嘅樓盤網,10,000蚊樓下,一般都係交通方便就好舊咁,企企理理嘅就可能係村屋,市區嘅企理樓,好多都超晒價,雖然唔可以話冇,土瓜灣大角嘴都有機會搵到,但得幾個少到要搶,個網民都話曾經搵到,不過「上緊堂missed call就俾另一個買家簽左」。



97年主權移交至今,香港前進還是倒退?「蘋果」與你細數廿載風雨。【回歸二十年】專頁:http://hksar20.appledaily.com.hk




來源: http://hk.apple.nextmedia.com/financeestate/art/20170616/20058010
一萬 萬蚊 蚊租 租樓 要求 入屋 屋十 十件 件事 樓主 離地 地定 樓市
PermaLink: https://articles.zkiz.com/?id=335844


ZKIZ Archives @ 2019