ZKIZ Archives


棄9萬月薪史丹福碩士砌錶月賺10萬

2016-07-21  NM

訂造手機殼、上衣的本地品牌Casetify、Snaptee,生意遍布全球。去年尾廿八歲的黎鈞國(Quinn)照辦煮碗,與三個拍檔合夥,將設計平台放在日本機械錶上,創立Eoniq,半年間facebook與Instagram專頁中已經有超過十四萬like,月賺十萬元。生意有成績,父母理應感安慰,但在他家人眼中卻是:「你唔為自己諗,都為下一代諗!做生意好大風險。」辭職創業的念頭,在家中激起千重浪,全因他之前月入九萬元。

Quinn會考後到海外升學,於史丹福大學機械工程碩士畢業後,先後於「顧問界的高盛」McKinsey中任職顧問、跨國個人電腦生產商HP中任產品經理,月薪九萬元,亦有大好前途,「我當時個直屬上司高我五級,中間有好多位俾我升,而且七年間做得好,一般可以跳出去做VP(副總裁)。」薪高糧準,前途一片光明,父母難免極力反對他辭職,對他說:「咁辛苦栽培你,拮据嘅情況下都花幾百萬,送你去美國讀書,有學歷、有好工,你走去創業,咁係浪費晒我哋嘅心血!」但他堅持將他的興趣化成事業。往日花錢買錶拆,今日砌錶賣。客人在網上頁面選擇錶殼的顏色、錶面款式、錶面圖案、指針粗幼等項目。他每天重複將錶肉放入錶殼,再放入刻上客人設計的錶面,裝上時分秒針,最後蓋上玻璃罩。

三招facebook宣傳

一個新品牌,賣二百多美元一隻錶,並且能夠每月賣近三百隻,成功在於Quinn識玩社交媒體。至今半年間,facebook與Instagram兩個社交媒體均有十四萬followers,最初他什麼方法都用,「follow其他品牌嘅follower、送錶俾KOL(網絡紅人),不過大牌子成本低,派十隻返一隻都有賺,我哋做唔到。」試過不同方法,還是賣廣告生意增長快,很多網店指facebook賣廣告成效逐漸減低,Quinn直指:「只係香港社交媒體marketing太廢,我搵過幾間公司,差唔多要我教番佢哋做。」Quinn有三大策略玩facebook。第一:唔好hard sell。「你目標係要俾好嘢人睇,多人睇自然有人買嘢,唔好不停叫人買錶。post內容夠唔夠好,你睇吓幾多人tag朋友就知。」第二:文青風。「返完工咁辛苦,都係想輕鬆吓。隻錶大特寫好悶,我發現最吸引人睇,係在錶旁邊加杯咖啡,背景白雪雪,有時加啲乾花,感覺好lifestyle。」第三:tag得夠細。「同樣係年輕情侶、未來一個月周年紀念或者生日、有上亞馬遜網購,分別tag鍾意錶同手作嘢,結果可以好唔同。你好難估邊個會有反應,要tag細啲,多試不同tag。」成功吸like之餘,亦吸到金,Quinn說他每月都用十多萬賣廣告,「因為有成效,平均用三十蚊美金,就有一個人買錶。」現時生意兩成香港,八成海外,而其中大部分是東南亞國家。成功俘虜他們,Quinn認為是他擊中當地人的消費習慣,「我有朋友喺印尼,佢話大部分富起來嘅人,因為經歷過貧窮,心底裡覺得要節儉,所以比較少買貴嘢,但其實佢哋買買吓中價貨都使唔少錢。」

用日本錶減退貨

Quinn自中學開始拆錶研究,拆過百多隻錶,再重新組合。他運用以前拆錶的經驗,分別拆開日本與大陸錶肉仔細研究,外表較平凡的日本錶肉,在防震方面贏九條街,「大陸嘢一跌,個軸就彎甚至斷。日本錶肉唔單止軸唔彎,佢個齒輪鬆鬆哋,我用手郁佢都識彈番轉頭,一般震盪唔會影響到時間。」因Quinn貪平買過一批大陸錶肉,大部分送出去都「打回頭」,「大陸錶肉一百蚊,日本起碼二百。大陸錶肉平得嚟打磨又靚,好多客都唔揀日本貨,要大陸貨。但原來得個樣,一跌就壞。」他測試過兩批錶肉,用泡泡膠紙包着錶掉到地上,結果唔使講都知,「大陸貨跌一兩次就壞,日本貨我用力掉,錶帶螺絲都斷埋都無事。」轉用日本貨後,「打回頭」的次數大減八成,少於一成會退貨。但同日本人做生意一向麻煩,「佢個貨期要九個月先有,我無可能等到,亦估唔到九個月後賣幾多。撞啱近排市道唔好,好多賣錶公司之前買多咗錶肉,依家放番出嚟。」日後零售市道回暖,向賣錶公司買錶肉的成本或會增加。

Custom錶是雙刃劍

作為初創企業,Quinn還有一堆問題要解決,最大特色,亦是最大弊病,是要客人設計,「客人無信心自己設計得靚。」Quinn眉頭一皺,「唉!因為我哋啲錶千幾蚊,唔似一件衫幾百蚊!如果出嚟唔靚好嘥錢。而且香港人太忙,無時間慢慢設計,所以一般外地訂單設計得比較靚。」創意真的不是每個人都有,所以Quinn預先設計一批錶面,「對自己有信心嘅,佢可以選由零開始自己設計;無信心嘅,佢可以由四十款設計揀心水款式,再改動成自己鍾意嘅。」另一困難是要做獨一無二的手錶,等一個月時間,Quinn道出困難並非工序多,「要儲單呀!錶面設計我交俾廠做,但佢唔接太細訂單,所以要等夠單先送去。如果我單量夠大唔使等,一個星期就可以交到貨啦。」生意上的困難未解決,幸好家人的矛盾已化解,「我送咗隻自己設計嘅錶俾爸爸,佢收到好感動。錢係賺得比以前少,不過佢依家都支持我,間中會同我傾吓生意有咩地方可以改善。」

開業資料(10/15)租金$4,000 入貨、網頁設計$936,000 儀器$50,000 雜費$10,000 總投資$1,000,000

營業資料(06/16)營業額$500,000 人工*、入貨$385,000 租金$15,000 盈利$100,000

* 7個全職員工

撰文:孫樂祈攝影:鄭樹清攝錄:廖健昌ed_bn@nextdigital.com.hk

月薪 史丹 碩士 砌錶 錶月 月賺 10
PermaLink: https://articles.zkiz.com/?id=206661

周日專題:碩士棄厚職創業砌錶女友辭工力撐

1 : GS(14)@2017-11-05 15:54:20

■創立機械錶品牌的Quinn,感激女友共同進退。廖達燊攝


港人用時間換取財富,有人卻為了尋夢,以「製錶」創業,甘願放棄百萬年薪。畢業於史丹福大學機電工程碩士的黎鈞國(Quinn),曾經任職「顧問界的高盛」McKinsey及跨國個人電腦生產商HP,為了創業,說放下就放下。現年29歲的Quinn三年前創立機械錶品牌EONIQ之初,雖未獲父母支持,但背後有一位同甘共苦的女友李心儒,寧棄五星級酒店工作,陪伴在側共同進退。Quinn笑言,創業令自己嘗試到「低處未算低」,戶口甚至只剩下「幾百蚊」,更曾給女友送拖鞋作禮物。說起那對拖鞋,心儒顯得珍而重之,坦言「我知道已經係佢嘅全部。」一句話刺中了不少港男心聲。自小很喜歡不同機械裝嵌的Quinn,在McKinsey工作時,曾想買一隻得體手錶,但價錢貴得「離地」,遂萌生了砌錶的念頭,在砌了數隻手錶後,決定創業。Quinn稱現時公司年收入約150萬美元(約1,170萬港元),即使淡季一個月平均也賣出逾300隻錶,以每隻錶平均零售價約2,500元計算,月入逾75萬元。

■Quinn曾花萬元買零件,親自裝嵌一隻女裝機械錶送給女友。

收入大跌 送拖鞋當禮物

一直靜候在Quinn身旁的心儒,看起來少了一般「港女」的氣燄,好比一個「肯捱麥記的女人」。由外國回流香港的心儒,原在五星級酒店任企業銷售,前途一片光明。當時與Quinn拍拖兩年,Quinn便邀請她加入EONIQ。當時心儒的家人十分反對,姊姊和媽媽更擔心若二人出了問題,到時候是失戀又失業,而且薪金不如以前,加上心儒比Quinn年長,要有婚嫁的打算。幸心儒爸爸諒解,「佢(爸爸)好開明,想做就做!爸爸嘅支持令我哋有勇氣去接受呢個挑戰。」結果一年過去,「家姐跟媽媽經常問新錶款式,她們已經同我哋一齊參與呢盤生意,甚至會整lunch box畀我哋,擔心我哋顧住工作食唔飽。」
Quinn表示,當年為博紅顏一笑,曾花萬元在網上買零件砌女裝機械錶,前後花近4個月時間研究及裝嵌,這隻獨一無二的女裝錶令女友驚喜萬分,但創業初期收入大不如前,當時搬進辦公室後買了一對拖鞋送給女友。Quinn笑言「如果平時送份咁樣嘅禮物,我諗其他人會扔咗。」心儒則說:「當我收到嗰對拖鞋嘅時候,我覺得好貴重,因為我知道呢個係佢嘅所有。」■記者吳美茸



來源: https://hk.finance.appledaily.co ... e/20171105/20204970
周日 專題 碩士 棄厚 厚職 創業 砌錶 女友 辭工 力撐
PermaLink: https://articles.zkiz.com/?id=343740

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019