|
||||||
|
讀者來電郵指出，中國上次參加世界盃，係2002年，唔係2004年。又有讀者指正，魯賓尼任教於NYU，並非哥倫比亞。係嘅，左丁山往往想到就寫，冇花太多時間去查證，久唔久就有疏忽之處，鎖你鎖你。 講 起中國足球就心酸，中國國奧隊與香港隊雙雙出局，無緣參加2012年倫敦奧運，中華台北隊當然亦冇行。大中華地區人口有咁多，竟然搵唔到十一個人組成一隊 有資格參加奧運（世界盃唔好講住嘞）足球，你話幾醜呢！同樣係大國，印度人踢足球都好水皮，但在團隊球類項目之中，印度打板球（cricket）夠晒叻， 今年擊敗斯里蘭卡奪得板球世界盃，舉國歡欣若狂。中國人除咗女排，好似未在團隊（兩人以上）嘅球賽攞到甚麼榮譽噃，反而單打獨鬥就最叻，可以在乒乓、羽毛 球方面橫掃世界，女子網球都出咗一個李娜，唔通中國人真係冇團隊精神，還是先天體質有問題？球員經不起體力衝撞？ 睇過一篇內地體育報道，話中國球員體質好吃虧，喜歡食麪，營養不足，但八、九年前曾在曼城踢過好多場正選後衞嘅孫繼海，能在英超立足一段時期，有乜秘笈呢？孫繼海話佢自己從細到大都係最鍾意食牛肉，每日無牛肉不歡，故此體力追得上韓國、日本球員喎。 中 國有好多美食，單吃牛肉未免寡一啲，但最好之食物往往是最毒之藥。呢日午飯時間，醫生C告誡我地返大陸吃美食要非常小心。佢有一位朋友為咗減肥，每日吃 「排油」藥，將食物嘅油份從小便排走，於是在香港往往屙黃色尿，習以為常。但佢愛吃，不時返大陸飽嚐所謂「平靚正」美食，返到嚟就屙黑尿，幾次都係咁，問 醫生C點解。原來理由好簡單，香港食油係黃色嘅，大陸一啲食油係黑色嘅──意思即係大陸食肆可能採用坑渠油或工業油！食落肚梗係對身體有害啦，排番出體外 就算夠運o架嘞。咁講法，上到大陸咪要去高級飯店食貴嘢？醫生C話：「工業油平好多，睇食肆有無良心嘅啫，安全性與食肆價格無必然關係！」 |
||||||