ZKIZ Archives


幾句粗口殺唔死你的 人在中環

http://manincentral.blogspot.hk/2013/12/blog-post.html
先旨聲明,寫呢篇既時候,正值盛怒。剛剛睇完阿仙奴慘敗俾曼城,剛過去既九十分鐘,我粗口橫飛。

那篇「如果孩子要一隻路姆西」的文章,我剛睇過。大概係我份人一向粗魯吧。我只能說,我覺得超超超反感。

事實上當偽中產每次都在高舉要和平理性斯文有禮服從權威諸如此類既論點時,每次都總係會將一切行為簡單化:「總之咁做就係唔岩」,「總之講呢啲嘢就係錯」;得出這些結論,永遠唔需要上文下理(甚至刻意cut走前因後果…),而我們既孩子,原來應該響一個真空無菌既環境中成長先至叫做健康。

我認識有些人喜歡將孩子訓練成超級斯文有禮,幾歲人仔manner好到嚇壞親朋戚友。莫講話係粗口,小朋友唔覺意講咗一句半句稍為俗些少既說話,個家長都好似個仔做咗殺人犯咁款,一副「我唔可以接受囉!」既姿態。每次見到呢啲情景,我內心都忍唔住會講句「妖,你其實係咪有病?」但實情係,中產既圈子當中,這類人,其實為數不少的。

我唔知這應該叫做「造作」還是「虛偽」了。如果個家長是真心的話,那我會認為是「不幸」…I mean,係個細路仔「不幸」。

人活到這個年紀,理應明白到世界上絕大部份的事情,都不可能會是「絕對啱」又或者「絕對錯」。去分析一件事是對還是錯,不同時間、背景、原因,會對「對」與「錯」有截然不同的解讀。父母的責任,是引導孩子去思考,在這些背景和前因後果底下,面前這件事情到底是對還是錯,但許多人卻偷懶(當然佢地又唔會認),貪方便跳過所有前因後果,直接指導孩子「總之咁樣做就係錯」…仲要理直氣壯。我偏見地相信,長期用如此方法教仔,個仔只會越教越蠢。

只不過,大家覺得孩子越教越蠢真的有問題嗎?我懷疑,許多家長其實不太介意孩子是個「高分低能」,又或者是個「好假的肥仔」…甚至仲可能有啲啲自豪添。

*****

後記

這一晚,電視又重播《大內密探零零發》了。看了許多次,還是覺得好好笑。

我們這一代人,許多都是看著周星馳的笑片長大的。問心,這些笑片,有幾多個笑位,係喺度玩粗口諧音、咸濕隱喻?然而這些所謂「低俗」的笑位,多年來又帶給過我們幾多歡樂?

不知那時開始,我們面對這些「低俗」東西的態度,有了翻天覆地的改變…我們從前認為這些只是「幽默」,小小粗口無傷大雅;今天同樣的諧音毛公仔,卻有人將它當成有如沙林毒氣,一時又話小學雞,一時又話會毒害下一代。

是不是大家都忘記了,在我們長大的歲月裡面,這些「低俗」產物,也曾帶給過我們許多快樂時光?到現在我們為人父母了,當年自己歡樂過後,現在就忽然高尚起來,掉轉頭要把它們嫌棄?
幾句 粗口 殺唔 唔死 死你 你的 人在 中環
PermaLink: https://articles.zkiz.com/?id=84799


ZKIZ Archives @ 2019